Gurtaaki 39 - Fulfulde Bible

Baɗki limce liman'en

¹ Ɓe mbaɗi limce ngam kuugal nder suudu seniindu bee gaaraaji carwinaaɗi e boɗeeji seɗɗa e boɗeeji coy. Ɓe mbaɗani Haruna limce ceniiɗe, bana Jawmiraawo umruno Muusa.

² Ɓe mbaɗi ɗancikiire bee kaŋŋeeri e gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy.

³ Ɓe mbaɗi tappaaɗi kaŋŋeeri cewɗi, ɓe ceeli ɗi, ɓe cannyi ɗum bee gaaraaji leŋ ɗigguɗi e carwinaaɗi e boɗeeji seɗɗa e boɗeeji coy. Tuppitoowo baawɗo waɗi ɗum.

⁴ Ɓe mbaɗi balbe haa ɗancikiire ngam jokkindirgo nde. Nde jokkindira haa seɓattooji maare ɗiɗi.

⁵ Taadorgol gonŋgol dow ɗancikiire ngam haɓɓugo nde, ɓe mbaɗi ngol bana ɗancikiire bee kaŋŋeeri e gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy, ɗum laati kuuwaaɗum gootum bee ɗancikiire, bana Jawmiraawo umruno Muusa.

⁶ Ɓe mbaɗi kaa'e onikis, ɓe nastini ɗe nder jogorɗe ɗe kaŋŋeeri, ɓe mbinndi inɗe ɓiɓɓe Isra'iila dow maaje bee karfeeje ta'aaɗe bana no goɗɗo ta'irta haatummeere.

⁷ Ɓe peɗi ɗe dow balbe ɗancikiire, ɗe laato kaa'e ngam siftorgo ɓiɓɓe Isra'iila, bana Jawmiraawo umruno Muusa.

⁸ Tuppitoowo baawɗo waɗi jiiba wiɓɓere, bana o waari ɗancikiire, bee kaŋŋeeri e gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy.

⁹ Ka mari buttuli nayi potanɗi, ɓe cowi ka, njuutirka maaka hapakaare, njaajirka maaka boo hapakaare, ɓe cowi ka.

¹⁰ Ɓe takki kaa'e marɗe saman dow maaka, jabbi nayi. Jabbol aranol: Sardiyus, tupas, imiradi.

¹¹ Jabbol ɗiɗaɓol: Haako-haakoore, safira, yaspa.

¹² Jabbol tataɓol: Yakintus, agate, ametistu.

¹³ Jabbol nayaɓol: Kirisoliti, haako-haakoore, onikis. Ɗe nastinaaɗe nder jogorɗe ɗe kaŋŋeeri.

¹⁴ Limgal kaa'e waɗi sappo e ɗiɗi bee inɗe ɓiɓɓe Isra'iila, bana binndi ta'aaɗi diga cehoowo kaa'e bana haatummeere. Hayre fuu koo ndeyeere bee innde lenyol gootol.

¹⁵ Ɓe mbaɗi haa jiiba wiɓɓere callalluhoy kaŋŋeeri laaɓndi ɗiɗoy, mbamaakoy bana ɓoggi.

¹⁶ Ɓe mbaɗi jogorɗe ɗiɗi ɗe kaŋŋeeri e kalagaaje ɗiɗi ɗe kaŋŋeeri. Ɓe peɗi kalagaaje man haa seɓattooji jiiba wiɓɓere ɗiɗi.

¹⁷ Ɓe kaɓɓi ɓoggi kaŋŋeeri bamaaɗi ɗiɗi haa kalagaaje gonɗe haa seɓattooji jiiba wiɓɓere.

¹⁸ Seɓattooji ɓoggi goɗɗi, ɓe kaɓɓi ɗi haa jogorɗe go. Kanje, ɓe takki ɗe dow balbe ɗancikiire, wakeere yeeso.

¹⁹ Ɓe mbaɗi kalagaaje kaŋŋeeri goɗɗe ɗiɗi, ɓe peɗi ɗe haa seɓattooji jiiba wiɓɓere ɗiɗi, haa gawargal keeduŋgal ɗancikiire, haa nder muuɗum.

²⁰ Kadiboo ɓe mbaɗi kalagaaje kaŋŋeeri ɗiɗi, ɓe ɓili ɗe haa balbe ɗancikiire, wakeere yeeso haa les, haa jokkindirki maare dow taadorgol ɗancikiire.

²¹ Ɓe njokki jiiba wiɓɓere bee kalagaaje maaka haa kalagaaje ɗancikiire. Ɓe njokki ka bee ɓoggol carwinaaŋgol, ngam jiiba wiɓɓere laato haa dow taadorgol ɗancikiire, taa ka seeda bee maare, bana Jawmiraawo umruno Muusa.

²² Cannyoowo sannyi alkibbaare bee gaaraaji carwinaaɗi,

²³ waɗi daande haa caka maare, bana daande sulkewol. Daɗɗaare taari daande man ngam taa nde seeka.

²⁴ Haa gawargal alkibbaare ɓe mbaɗi ɓiɓɓe rummaanooje ɗe gaaraaji carwinaaɗi e boɗeeji seɗɗa e boɗeeji coy.

²⁵ Ɓe mbaɗi leŋngi kaŋŋeeri laaɓndi. Ɓe njo'ini leŋngi hakkunde rummaanooje, haa gawargal alkibbaare taarotooŋgal fuu,

²⁶ leŋnguru e rummaanoore, fahin leŋnguru e rummaanoore, haa gawargal alkibbaare taarotooŋgal fuu, ngam huuwugo kuugal limanku, bana Jawmiraawo umruno Muusa.

²⁷ Bee kuugal cannyoowo, ɓe cannyi toggooje bee gaaraaji leŋ ɗigguɗi, ngam Haruna e ɓikkoy muuɗum.

²⁸ Ɓe mbaɗi boo meetaleewol bee gaaraaji leŋ ɗigguɗi e kufneeje bee gaaraaji leŋ ɗigguɗi ngam fawne e sirlahoy bee gaaraaji leŋ ɗigguɗi baalaaɗi

²⁹ e taadorgol tuppitaaŋgol ngol gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy, bana Jawmiraawo umruno Muusa.

³⁰ Ɓe mbaɗi jaagnorɗe, waato alaama ceniika bee kaŋŋeeri laaɓndi bana rummaanooje. Ɓe mbinndi dow maajum bee binndol ta'aaŋgol: Senaama ngam Jawmiraawo.

³¹ Ɓe mbaɗi haa maajum ɓoggol carwinaaŋgol ngam haɓɓugo ɗum haa dow meetaleewol, bana Jawmiraawo umruno Muusa.

Timmuki kuugal jooɗorde senaande

³² Bana non kuuɗe jooɗorde senaande, waato laymaaru fottirde fuu timmiri. Isra'iila'en mbaɗi koo ɗume fuu bana Jawmiraawo umruno Muusa.

³³ Ɓe ngaddi jooɗorde senaande haa Muusa: Laymaaru e kuuje maaru fuu e jokkinirɗe maaru e kaataakooje maaru e gaafotooɗe maaru e daŋraŋge maaru bee kosɗe maaje

³⁴ e suddaare nde lare jawɗi baali boojinaaɗe e suddaare nde lare liɗɗi mawɗi e wiirndallo

³⁵ e sundukru seedamku e cabbi maaru e jooɗorde ngam kefergal

³⁶ e taabal e kuuje maagal fuu e tamseeje jo'inteeɗe

³⁷ e jo'inirɗum pittirlaaji laaɓɗum e pittirlaaji maajum tokkotirɗi e kuuje maajum fuu e nebbam ngam jaynuki pittirla

³⁸ e gulduɗum uurle ɗum kaŋŋeeri e nebbam cenirɗam e uureteeɗum e wiirndallo ngam dammugal laymaaru

³⁹ e hirsirde nde njamndi mboɗeeri e kuuwaaɗum bee gaafiiɗe ɗe jamɗe boɗeeje e cabbi maare e kuuje maare fuu e daaro e jo'inirɗum maago

⁴⁰ e wiirndallooji daldal e daŋraŋge maagal e kosɗe maagal e wiirndallo haa nastirde maagal e ɓoggi maagal e tiggirɗe maagal e kuuje fuu ngam kuugal nder jooɗorde senaande, waato ngam laymaaru fottirde

⁴¹ e limce dewal ngam kuugal nder suudu seniindu, waato limce ceniiɗe ngam Haruna, limanjo e limce ɓikkoy muuɗum ngam huuwugo kuugal limanku.

⁴² Isra'iila'en mbaɗi koo ɗume fuu bana Jawmiraawo umruno Muusa.

⁴³ Muusa laari kuuje fuu. Ndaa, ɓe mbaɗi ɗe bana Jawmiraawo umruno mo. Nden Muusa barkiɗini ɓe.