Gurtaaki 38 - Fulfulde Bible

Baɗki hirsirde e daaro

¹ O waɗi hirsirde nde leggal gawaral. Njuutirka maare meetir ɗiɗi bee reeta, njaajirka maare boo meetir ɗiɗi bee reeta, waato marnde tolɗi nayi potanɗi, towirka maare boo meetir gootel bee reeta.

² O waɗi luwe haa coɓɓuli maare nayi, luwe man laati kuuwaaɗum gootum bee hirsirde. O suddi nde bee njamndi mboɗeeri.

³ O waɗi kuuje hirsirde fuu: Payanɗe e ɓoftirɗe e pehe biccirɗe ƴiiƴam e tufirɗe e pehe gulduɗe. O waɗi ɗe fuu bee njamndi mboɗeeri.

⁴ O waɗani hirsirde kuuwaaɗum jamɗe boɗeeje gaafiiɗe, nannduɗum bee zubaawol, les taarnaaɗum maare, ɗum yotti reeta towirka maare.

⁵ O waɗi kalagaaje nayi haa seɓattooji kuuwaaɗum jamɗe boɗeeje gaafiiɗe go, ngam jogaago cabbi.

⁶ O waɗi cabbi leggal gawaral, o suddi ɗi bee njamndi mboɗeeri.

⁷ O nastini cabbi man nder kalagaaje haa buttuli hirsirde ngam roondaago nde. O waɗi nde bee kaataakooje, walaa koo ɗume nder maare.

⁸ O waɗi daaro njamndi mboɗeeri e jo'inirɗum maago ɗum njamndi mboɗeeri. O waɗi ngo bee njamndi e daarorɗe rewɓe huuwooɓe haa dammugal laymaaru fottirde.

Daldal jooɗorde

⁹ O waɗi daldal jooɗorde. Haa wuttudu fombina, o waɗi wiirndallooji daldal bee gaaraaji leŋ ɗigguɗi baalaaɗi, meetir cappanɗe jowi,

¹⁰ bee daŋraŋge maaru noogas e kosɗe maaje noogas ɗe njamndi mboɗeeri e ɓilduɗe daŋraŋge e gaafe maaje ɗe cardi.

¹¹ Haa wuttudu woyla boo meetir cappanɗe jowi, bee daŋraŋge maaru noogas e kosɗe maaje noogas ɗe njamndi mboɗeeri e ɓilduɗe daŋraŋge e gaafe maaje ɗe cardi.

¹² Haa wuttudu hiirnaaŋge boo wiirndallooji meetir noogas e jowi, bee daŋraŋge maaru sappo e kosɗe maaje sappo e ɓilduɗe daŋraŋge e gaafe maaje ɗe cardi.

¹³ Haa wuttudu fuunaaŋge boo meetir noogas e jowi:

¹⁴ Wiirndallooji meetir joweeɗiɗi bee reeta haa wakeere woore, bee daŋraŋge maare tati e kosɗe maaje tati.

¹⁵ Wakeere ndeya boo, waato buttuli dammugal ɗo bee to, wiirndallooji meetir joweeɗiɗi bee reeta, bee daŋraŋge maare tati e kosɗe maaje tati.

¹⁶ Wiirndallooji daldal fuu ɗi gaaraaji leŋ ɗigguɗi baalaaɗi.

¹⁷ Kosɗe daŋraŋge ɗe njamndi mboɗeeri. Ɓilduɗe daŋraŋge e gaafe maaje ɗe cardi. Cudduɗum ko'e maaje boo ɗum cardi. Daŋraŋge daldal fuu kawriti bee gaafe cardi.

¹⁸ O waɗi wiirndallo ngam nastirde daldal bee gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy, ɗum tuppitaaɗum. Njuutirka maago meetir sappo, towirka maago boo meetir ɗiɗi bee reeta, kal-kal bee wiirndallooji daldal.

¹⁹ O waɗi daŋraŋge maago nayi bee kosɗe maaje nayi ɗe njamndi mboɗeeri, ɓilduɗe maaje boo ɗe cardi, non boo cudduɗum ko'e maaje e gaafe maaje.

²⁰ Tiggirɗe jooɗorde senaande e daldal fuu ɗe njamndi mboɗeeri.

Lisaafi kuuje jooɗorde senaande

²¹ Ndaa lisaafi kuuje jooɗorde senaande, nokkuure ngam seedamku alkawal. Lewi'en mbaɗi ɗum fodde umroore Muusa dow ardaaŋgal Itamar ɓii Haruna, limanjo.

²² Becaleel ɓii Uuri taaniraawo Huuru mo lenyol Yahuuda, kaŋko waɗi ko Jawmiraawo umri Muusa fuu.

²³ Kuuwdiɗɗiraawo maako Oholiyabu ɓii Ahisamak mo lenyol Dan, o cehoowo kaa'e, o tuppitoowo e cannyoowo limce leŋ ɗigguɗe carwinaaɗe e boɗeeje seɗɗa e boɗeeje coy.

²⁴ Mooɓgal kaŋŋeeri ndi ɓe kuuwtiniri ngam kuuɗe suudu seniindu fuu, waato kaŋŋeeri dokkal, waɗi baakin kilo teemeɗɗe joweetati e cappanɗe joweeɗiɗi e joweeɗiɗi (877) fodde etirgal suudu seniindu.

²⁵ Cardi diga yimɓe jama'aare limaaɓe fuu waɗi baakin kilo ujine tati e sappo e joweetati (3.018) fodde etirgal suudu seniindu.

²⁶ Koo moy fuu hokki reeta ceede cardi fodde etirgal suudu seniindu, waato koo moy nastuɗo limgal limaaɓe fuu mo duuɓi noogas e ko ɓuri: Worɓe ujine teemeɗɗe njoweego e tato e teemeɗɗe njowo e cappanɗe njowo (603.550).

²⁷ Kilo cardi ujine tati (3.000) ɓolinaama ngam kosɗe suudu seniindu e kosɗe wiirndallo, kosɗe teemerre bee kilo ujine tati (3.000), waato kilo cappanɗe tati ngam kosŋgal gootal.

²⁸ Bee cardi baakin kilo sappo e joweetati luttundi, o waɗi ɓilduɗe haa daŋraŋge, o suddi ko'e maaje, o hawriti ɗe bee gaafe.

²⁹ Dokkal njamndi mboɗeeri waɗi baakin kilo ujine ɗiɗi e teemerre e noogas e nayi (2.124).

³⁰ Bee maari o waɗi kosɗe dammugal laymaaru fottirde e hirsirde njamndi mboɗeeri bee kuuwaaɗum jamɗe gaafiiɗe haa maare e kuuje hirsirde fuu

³¹ e kosɗe daldal fuu e kosɗe nastirde maagal e tiggirɗe jooɗorde senaande e tiggirɗe daldal fuu.