Gurtaaki 29 - Fulfulde Bible

Sarɗiiji ngam lii'eeki liman'en

¹ “Ndaa ko a waɗata ngam a sena liman'en haa ɓe kuuwanammi kuugal limanku: Hoo'u ngaari kalhaldi e jawɗi baali ɗiɗi ɗi ngalaa aybe

² e tamseeje ɗe ufnaaka e tamseeje ɗe ufnaaka jiiɓaaɗe bee nebbam e tamseeje bette ɗe ufnaaka, gujaaɗe bee nebbam. Sey a waɗa ɗe fuu bee kuroori alkamaari ɗiggundi.

³ Waatu ɗe nder silaawo, lii'anam ɗe nder silaawo hawtaade bee kalhaldi e jawɗi baali ɗiɗi go.

⁴ Ɓaditin Haruna e ɓikkoy muuɗum haa dammugal laymaaru fottirde. Ɓe laɓɓina ko'e maɓɓe bee ndiyam.

⁵ Hoo'u limce go, ɓornu Haruna toggoore e alkibbaare e ɗancikiire e jiiba wiɓɓere. Haɓɓu ɗum bee taadorgol ɗancikiire.

⁶ Meetu mo meetaleewol, waɗ alaama senaare haa meetaleewol.

⁷ Hoo'u nebbam cenirɗam. Ruf ɗam dow hoore maako.

⁸ Ɓaditin ɓiɓɓe maako boo, ɓornu ɓe toggooje.

⁹ Taadu ɓe taadorgol, hufnu ɓe kufneeje. Ɓe laato liman'en bee farilla am nduumiika. Bana non a nastinirta Haruna e ɓikkoy mum nder kuugal muuɗum'en.

¹⁰ Waddu kalhaldi go yeeso laymaaru fottirde. Haruna e ɓikkoy mum njowa juuɗe dow hoore maari.

¹¹ Hirsu ndi yeeso Jawmiraawo haa dammugal laymaaru fottirde.

¹² Hoo'u ƴiiƴam kalhaldi, wuju ɗam bee hoondu ma haa talkumooje hirsirde. Ruf ƴiiƴam luttuɗam haa les hirsirde.

¹³ Hoo'u ɓellere suddunde teteki e ɓellere dow heŋre e ɓooƴe ɗiɗi fuu bee ɓellere wonnde dow maaje. A wula ɗum fuu dow hirsirde.

¹⁴ Kusel kalhaldi e laral maari e coowoowe maari, a wula ɗum bee yiite yaasi saŋngeere. Kanjum woni kirseteeŋga ngam ittugo hakke.

¹⁵ Nden hoo'u ngoori jawɗi baali. Haruna e ɓikkoy mum njowa juuɗe dow hoore maari.

¹⁶ Hirsu ndi, hoo'u ƴiiƴam maari, wiccu ɗam haa buttuli hirsirde nayi fuu.

¹⁷ Ta'u njawdiri geɓe geɓe. Lootu teteki maari e kolce maari. Wallin ɗum dow geɓe maari e hoore maari.

¹⁸ A wula njawdiri fuu dow hirsirde. Kanjum woni nguleteeŋga nga yiite nyaamata ɗum ngam Jawmiraawo, uureeŋgol belŋgol maaga fottanan Jawmiraawo.

¹⁹ Nden hoo'u njawdiri ɗiɗawri. Haruna e ɓikkoy mum njowa juuɗe dow hoore maari.

²⁰ Hirsu ndi, hoo'u ƴiiƴam maari, waɗ ɗam haa deblekeere nofru nyaamru Haruna e ɓiɓɓe mum fuu. Non boo haa hoondu wordu juŋngo maɓɓe nyaamo e ndu kosŋgal maɓɓe nyaamal. Wiccu ƴiiƴam luttuɗam haa buttuli hirsirde fuu.

²¹ Hoo'u ƴiiƴam ngonɗam dow hirsirde e nebbam cenirɗam, wiccu ɗam dow Haruna e limce muuɗum, wiccu ɗam boo dow ɓiɓɓe maako e limce maɓɓe. Bana non o senorto, kaŋko e limce maako, non boo ɓiɓɓe maako e limce maɓɓe.

²² Hoo'u ɓellere njawdiri e wicco e ɓellere suddunde teteki e ɓellere dow heŋre e ɓooƴe ɗiɗi fuu bee ɓellere wonnde dow maaje e daŋngo nyaamo ngam ɗum njawdiri ngam kalfitinki kuugal.

²³ Hoo'u boo tamseere woore e tamseere jiiɓaande bee nebbam woore e tamseere wettere woore haa silaawo tamseeje ɗe ufnaaka, jo'inaaŋgo yeeso Jawmiraawo.

²⁴ Wallin ɗum fuu dow juuɗe Haruna e juuɗe ɓiɓɓe mum, ɓe ɓaŋgta ɗum, ɓe lii'o ɗum yeeso Jawmiraawo.

²⁵ Nden hoo'u ɗum fahin haa juuɗe maɓɓe, a wula ɗum dow hirsirde, haa dow nguleteeŋga. Kanjum woni nguleteeŋga nga yiite nyaamata ɗum ngam Jawmiraawo, uureeŋgol belŋgol maaga fottanan Jawmiraawo.

²⁶ Hoo'u biiwol njawdiri ndi kirsuɗa ngam halfingo Haruna kuugal mum. Ɓaŋgtu ngol, lii'a ngol yeeso Jawmiraawo. Ngol laato geɗal ma.

²⁷ Diga njawdiri ngam kalfitinki kuugal haa Haruna e ɓiɓɓe muuɗum, sen biiwol lii'aaŋgo e daŋngo ittaaŋgo ngam Jawmiraawo go.

²⁸ Ɗum laato geɗal Haruna e ɓikkoy mum bee farilla nduumiika haa Isra'iila'en, ngam ɗum dokkal ittaaŋgal. Dokkal man, Isra'iila'en itta ngal e kirseteeɗi muuɗum'en ngam kawtal bee Allah. Ɗum dokkal maɓɓe ittaaŋgal ngam Jawmiraawo.

²⁹ Limce Haruna ceniiɗe laatano ɓikkoy mum ɓaawo maako, wakkati senugo e halfitinango ɓe kuugal maɓɓe.

³⁰ Ɓiɗɗo Haruna laatotooɗo limanjo ɓaawo baaba mum, ɓorno ɗe nyalɗe joweeɗiɗi, nden o nasta laymaaru fottirde ngam kuugal maako.

³¹ Hoo'u njawdiri ngam kalfitinki kuugal, a defa kusel maari haa nokkuure seniinde.

³² Haruna e ɓikkoy mum nyaama kusel man e tamseeje gonɗe nder silaawo, ɓe nyaama ɗum haa dammugal laymaaru fottirde.

³³ Ɓe nyaama ko hirse ngam yaafuye hakkeeji maɓɓe wakkati halfitinango ɓe kuugal e senugo ɓe. Jananno nyaamataa ɗum, ngam ɗum cenaaɗum.

³⁴ To woodi ko lutti e kusel ngam kalfitinki kuugal e tamseeje man haa fajiri, sey a wula ɗum bee yiite. Ɗum nyaamataake, ngam ɗum cenaaɗum.

³⁵ A waɗana Haruna e ɓikkoy mum fodde ko mi umri ma fuu. Waɗ juulde kalfitinki kuugal maɓɓe nyalɗe joweeɗiɗi.

³⁶ Nyalaade fuu lii'anam ngaari kalhaldi kirseteendi ngam ittugo hakke. Laɓɓin hirsirde bee lii'aago kirseteeŋga man ngam maare. Wuju nde bee nebbam ngam a sena nde.

³⁷ Nyalɗe joweeɗiɗi lii'anam kirseteeŋga yaafuye ngam hirsirde, a sena nde. Bana non hirsirde laatorto ɓurnde senaago. Ko meemata hirsirde fuu, senoto.”

Kirseteeɗi nyalaade nyalaade

³⁸ “Ndaa ko a lii'anto yam dow hirsirde: Nyalaade fuu njawkoy ɗiɗoy koy nduuɓu.

³⁹ Lii'anam jawgel gootel fajiri, jawgel ɗiɗaɓel boo maŋngariba.

⁴⁰ Ɓesdu kuroori ɗiggundi agoda tati, njiiɓaandi bee nebbam jaytunje arɓaaɗe liitir gootel e inaboojam liitir gootel ngam dokkal dufeteeŋgal. Ɗum yahdan bee jawgel aranel.

⁴¹ Lii'anam jawgel ɗiɗaɓel maŋngariba. Ɓesdu dow maagel dokkal nyaamdu e dokkal dufeteeŋgal bana fajiri. Kanjum woni kirseteeŋga nga yiite nyaamata ɗum ngam Jawmiraawo, uureeŋgol belŋgol maaga fottanan Jawmiraawo.

⁴² Nguleteeŋga man tabita foroy nder gide mooɗon fuu, haa dammugal laymaaru fottirde yeeso Jawmiraawo, nokkuure nde mi fottata bee mooɗon, nde mi wolwante e muuɗum boo.

⁴³ Ton pottanmi bee Isra'iila'en, tedduŋgal am senan nokkuure man.

⁴⁴ Mi senan laymaaru fottirde e hirsirde, mi senan boo Haruna e ɓiɓɓe mum, ngam ɓe kuuwanammi kuugal limanku.

⁴⁵ Mi jooɗoto caka Isra'iila'en, mi laatoto Allah maɓɓe.

⁴⁶ Ɓe anndan min woni Jawmiraawo Allah maɓɓe, gurtinɗo ɓe lesdi Misra, haa mi jooɗo caka maɓɓe. Min woni Jawmiraawo Allah maɓɓe.”