Gurtaaki 28 - Fulfulde Bible

Limce liman'en

¹ “Muusa, hoo'u deerɗiraawo ma Haruna e ɓikkoy muuɗum: Nadab e Abihu e Eli'azaaru e Itamar ngara haa kommbi ma. A sennda ɓe bee Isra'iila'en woɗɓe, ngam ɓe kuuwanammi kuugal limanku.

² Waɗan deerɗiraawo ma Haruna limce ceniiɗe kollanɗe tedduŋgal e daraja muuɗum.

³ Wolwan huuwooɓe waawɓe ɓe kebbinmi bee anndal fuu, haa ɓe mbaɗa limce Haruna ngam cenki maako, o huuwanammi kuugal limanku.

⁴ Ndaa limce ɗe ɓe mbaɗata: Jiiba wiɓɓere e ɗancikiire e alkibbaare e toggoore tuppitaande e meetaleewol e taadorgol. Ɓe mbaɗa limce ceniiɗe ngam deerɗiraawo ma Haruna e ɓikkoy muuɗum, ngam ɓe kuuwanammi kuugal limanku.

⁵ Ɓe mbaɗa ɗum bee kaŋŋeeri e gaaraaji leŋ ɗigguɗi e carwinaaɗi e boɗeeji seɗɗa e boɗeeji coy.

⁶ Ɓe mbaɗa ɗancikiire bee kaŋŋeeri e gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy ɗe tuppitoowo baawɗo waɗata.

⁷ Balbe ɗiɗi laatano ɗancikiire man ngam jokkindirgo nde haa seɓattooji maare ɗiɗi.

⁸ Taadorgol gonŋgol dow ɗancikiire ngam haɓɓugo nde, ɓe mbaɗa ngol bana ɗancikiire bee kaŋŋeeri e limce gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy, ɗum laato kuuwaaɗum gootum bee ɗancikiire.

⁹ Nden ɓe koo'a kaa'e onikis ɗiɗi, ɓe mbinnda inɗe ɓiɓɓe Isra'iila dow maaje.

¹⁰ Inɗe joweego dow hayre nde'e e joweego luttuɗe boo dow hayre ɗiɗawre, fodde tokkindirki danyeeki maɓɓe.

¹¹ Sey a winnda inɗe ɓiɓɓe Isra'iila dow kaa'e ɗiɗi fuu, bee binndi ta'aaɗi diga cehoowo kaa'e bana haatummeere. A nastina ɗe nder jogorɗe ɗe kaŋŋeeri.

¹² Feɗu kaa'e ɗiɗi ɗe'e dow balbe ɗancikiire, ɗe laato kaa'e ngam siftorgo ɓiɓɓe Isra'iila. Haruna roondo inɗe maɓɓe dow balbe mum ngam ciftorki yeeso Jawmiraawo.

¹³ A waɗa jogorɗe ɗiɗi ɗe kaŋŋeeri

¹⁴ e a waɗa callalluhoy kaŋŋeeri laaɓndi ɗiɗoy, bana ɓoggi bamaaɗi. Jokku callalluhoy mbamaakoy koy haa jogorɗe.

¹⁵ Waɗ jiiba wiɓɓere ngam hiitaago, kuugal man laato bana ngal tuppitoowo ɗancikiire, bee kaŋŋeeri e gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy.

¹⁶ Ka mara buttuli nayi potanɗi, ɓe cowa ka, njuutirka maaka hapakaare e njaajirka maaka hapakaare.

¹⁷ Takku dow maaka kaa'e marɗe saman jabbi nayi. Jabbol aranol: Sardiyus, tupas, imiradi.

¹⁸ Jabbol ɗiɗaɓol: Lipinlaare, safira, yaspa.

¹⁹ Jabbol tataɓol: Yakintus, agate, ametistu.

²⁰ Jabbol nayaɓol: Kirisoliti, haako-haakoore, onikis. A nastina hayre fuu nder jogorɗum ɗum kaŋŋeeri.

²¹ Limgal kaa'e laato fodde limgal ɓiɓɓe Isra'iila sappo e ɗiɗo, bee binndi ta'aaɗi diga cehoowo kaa'e bana haatummeere. Hayre koo ndeyeere fuu bee innde lenyol gootol.

²² Waɗ callalluhoy kaŋŋeeri laaɓndi ɗiɗoy mbamaakoy bana ɓoggi haa jiiba wiɓɓere.

²³ Waɗ kalagaaje kaŋŋeeri ɗiɗi dow jiiba wiɓɓere. Feɗu kalagaaje man haa seɓattooji jiiba wiɓɓere ɗiɗi fuu.

²⁴ Haɓɓu ɓoggi kaŋŋeeri bamaaɗi go haa kalagaaje ɗiɗi gonɗe haa seɓattooji jiiba wiɓɓere.

²⁵ Seɓattooji ɓoggi goɗɗi, haɓɓu ɗi haa jogorɗe kaa'e gonɗe dow balbe ɗancikiire, wakeere yeeso.

²⁶ Waɗ kalagaaje kaŋŋeeri goɗɗe ɗiɗi, feɗu ɗe haa seɓattooji jiiba wiɓɓere, haa gawargal maaka keeduŋgal ɗancikiire, nder muuɗum.

²⁷ Kadiboo waɗ kalagaaje kaŋŋeeri ɗiɗi, jokku ɗe haa balbe ɗancikiire, wakeere yeeso haa les, haa jokkindirki maare dow taadorgol ɗancikiire.

²⁸ Ɓe njokka jiiba wiɓɓere bee kalagaaje maaka haa kalagaaje ɗancikiire. Ɓe njokka ka bee ɓoggol carwinaaŋgol, ngam jiiba laato haa dow taadorgol ɗancikiire, taa ka seeda bee maare.

²⁹ Nde Haruna nastata suudu seniindu fuu, o nastida bee inɗe ɓiɓɓe Isra'iila gonɗe dow jiiba kiitorka ngonka haa ɓernde maako. Ɗum laato ciftorki yeeso Jawmiraawo foroy.

³⁰ Wallin kaa'e kur'u bi'eteeɗe uriima e tumiima nder jiiba kiitorka. Ɗum laato dow ɓernde Haruna to o waŋgi yeeso Jawmiraawo. Haruna hiitano yimɓe Isra'iila bee maaje yeeso Jawmiraawo foroy.

³¹ Waɗ alkibbaare les ɗancikiire bee gaaraaji carwinaaɗi,

³² daande wona haa caka maare. Cannyoowo waɗa daɗɗaare haa sera maare. Ɗum wona bana daande sulkewol, ngam taa nde seeka.

³³ Haa gawargal alkibbaare waɗ ɓiɓɓe rummaanooje ɗe gaaraaji carwinaaɗi e boɗeeji seɗɗa e boɗeeji coy, haa gawargal taarotooŋgal fuu. Non boo leŋngi kaŋŋeeri hakkunde maaje:

³⁴ Leŋnguru kaŋŋeeri e rummaanoore, leŋnguru kaŋŋeeri e rummaanoore, bana non haa gawargal alkibbaare taarotooŋgal fuu.

³⁵ Haruna ɓorno nde ngam huuwugo kuugal limanku. Ɓe nanan sonyo maajum nde o nastata suudu seniindu yeeso Jawmiraawo e nde o wurtoto fuu, ɗum anndinan ɓe o geeto.

³⁶ Waɗ jaagnorde bee kaŋŋeeri laaɓndi, winndu dow maare bee binndol ta'aaŋgol bana haatummeere: Senaama ngam Jawmiraawo.

³⁷ Haɓɓu nde bee ɓoggol carwinaaŋgol, nde wona haa yeeso meetaleewol.

³⁸ Nde wona dow tiinde Haruna ngam faddaago Isra'iila'en to ɓe mbaɗi aybeeji wakkati ɓe cenata dokke e kirseteeɗi ngam Jawmiraawo fuu. Nde wona foroy haa tiinde maako ngam yerduye maɓɓe yeeso Jawmiraawo.

³⁹ Waɗ toggoore cannyiraande jaage bee gaaraaji leŋ ɗigguɗi. Waɗ boo meetaleewol bee gaaraaji leŋ ɗigguɗi. Kadiboo waɗ taadorgol tuppitaaŋgol.

⁴⁰ Waɗan ɓiɓɓe Haruna toggooje e taadorli e kufneeje ngam hollugo tedduŋgal e daraja maɓɓe.

⁴¹ Ɓornan ɗe deerɗa Haruna e ɓiɓɓe muuɗum. Waɗ nebbam cenirɗam dow ko'e maɓɓe, halfin ɓe kuugal, sen ɓe ngam ɓe kuuwanammi kuugal limanku.

⁴² Waɗan ɓe gajeeje leŋ ngam suuraago diga kaddorɗe haa dawɗe.

⁴³ Haruna e ɓikkoy muuɗum ɓorno koy to ɓe nasti laymaaru fottirde malla to ɓe ɓaditake hirsirde, haa ɓe kuuwa kuugal suudu seniindu, ngam taa aybe wara dow maɓɓe, taa ɓe maaya. Ɗum woni umroore duumaniinde mo kaŋko e danygol maako ɓaawo maako.”