Gurtaaki 26 - Fulfulde Bible

Jooɗorde Allah senaande

¹ “A waɗa jooɗorde senaande bee godooje sappo ɗe gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy. A waɗa ɗe bee suuraaji keruba'en ɗi tuppitoowo baawɗo waɗata.

² Njuutirka godoore fuu, meetir sappo e nayi dow meetir ɗiɗi. Ɗe pota kal-kal.

³ A jokkindira godooje jowi, laato woore, non boo godooje jowi goɗɗe laato woore.

⁴ A waɗa peɗinirɗe ɓoggi carwinaaɗi haa sera godoore ragareere haa jokkindiraaɗum gootum. Non a waarata haa sera godoore aranndeere haa jokkindiraaɗum feere boo.

⁵ A waɗa peɗinirɗe cappanɗe jowi haa godoore woore, non boo peɗinirɗe cappanɗe jowi haa sera godoore wonnde haa jokkindiraaɗum ɗiɗaɓum. Peɗinirɗe maajum tiitotira.

⁶ A waɗa jokkinirɗe ɗe kaŋŋeeri cappanɗe jowi. A hawta jokkindiraaɗe bee maaje, ngam haa jooɗorde senaande fuu laato woore.

⁷ A waɗa godooje sappo e go'o cannyiraaɗe gaasa be'i ngam laymaaru dow jooɗorde senaande.

⁸ Njuutirka godoore fuu, meetir sappo e jowi dow meetir ɗiɗi. Godooje man fuu pota kal-kal.

⁹ Jokkindir godooje jowi bee nyootugo, non boo godooje joweego. Sey a sowa godoore joweego'oore haa wuttudu yeeso laymaaru.

¹⁰ A waɗa peɗinirɗe cappanɗe jowi haa sera godoore ragareere haa jokkindiraaɗum gootum. Non boo peɗinirɗe cappanɗe jowi haa sera jokkindiraaɗum ɗiɗaɓum.

¹¹ A waɗa jokkinirɗe ɗe njamndi mboɗeeri cappanɗe jowi. A nastina jokkinirɗe man nder peɗinirɗe, a hawta laymaaru haa ndu laato wooru.

¹² A jilwa ɗum haa laymaaru, waato reeta godoore luttunde, jilwu nde haa wuttudu ɓaawo jooɗorde senaande go.

¹³ Reeta meetir haa ɗo e reeta meetir haa to diga luttuɗum njuuteeŋga godooje laymaaru, ɗe njilwa haa buttuli jooɗorde senaande ɗiɗi, ɗo bee to ngam suddugo ndu.

¹⁴ A waɗana laymaaru suddaare bee lare jawɗi baali boɗeeje. Dow maare boo suddaare feere bee lare liɗɗi mawɗi.

¹⁵ A waɗa kaataakooje darotooɗe ngam jooɗorde senaande, ɗe leɗɗe gabde.

¹⁶ Njuutirka kaataakowal fuu, meetir jowi e njaajirka boo meetir gootel reetita walaa.

¹⁷ Jogorɗe ɗiɗi potanɗe laato haa kaataakowal fuu, bana non a waarata haa kaataakooje jooɗorde senaande fuu.

¹⁸ A waɗa kaataakooje noogas ngam jooɗorde senaande wuttudu fombina.

¹⁹ A waɗa kosɗe cappanɗe nayi ɗe cardi les kaataakooje noogas, kosɗe ɗiɗi les kaataakowal gootal haa jogorɗe maagal.

²⁰ Bana non boo kaataakooje noogas haa jooɗorde senaande wuttudu woyla,

²¹ bee kosɗe maaje cappanɗe nayi ɗe cardi, kosɗe ɗiɗi les kaataakowal gootal.

²² A waɗa kaataakooje joweego ngam jooɗorde senaande, wuttudu ɓaawo, gal hiirnaaŋge.

²³ A waɗa kaataakooje ɗiɗi ngam coɓɓuli jooɗorde senaande, wuttudu ɓaawo.

²⁴ Jogorɗe ɗiɗi ɗe'e laato haa les, non boo jogorɗe ɗiɗi ɗe laato haa dow baŋnge halagaare. Kaataakooje coɓɓuli ɗiɗi fuu laato kal-kal.

²⁵ Bana non woodi kaataakooje joweetati bee kosɗe maaje ɗe cardi, kosɗe sappo e joweego, kosɗe ɗiɗi les kaataakowal fuu.

²⁶ A waɗa leɗɗe gaafotooɗe bee leɗɗe gaware, jowi ngam kaataakooje wuttudu jooɗorde senaande wooru

²⁷ e gaafotooɗe jowi ngam kaataakooje wuttudu jooɗorde senaande nduya, fahin gaafotooɗe jowi ngam wuttudu ɓaawo jooɗorde senaande, waato wuttudu hiirnaaŋge.

²⁸ Gaafotooŋgal cakaawal nasta caka kaataakooje diga soɓɓundu ndu'u haa soɓɓundu nduya.

²⁹ A sudda kaataakooje bee kaŋŋeeri. A waɗa kalagaaje kaŋŋeeri ngam jogaago gaafotooɗe, a sudda ɗe bee kaŋŋeeri.

³⁰ Ɓaawo man, sey a darna jooɗorde senaande nde'e fodde misaalu mo mi holli ma dow hooseere.

³¹ A waɗa wiirndallo bee gaaraaji leŋ ɗigguɗi baalaaɗi e carwinaaɗi, boɗeeji seɗɗa e boɗeeji coy. A waɗa ngo bee suuraaji keruba'en ɗi tuppitoowo baawɗo waɗata.

³² A ɓila ngo haa daŋraŋge nayi ɗe leɗɗe gabde bee ɓilduɗe, a sudda ɗe bee kaŋŋeeri, bee ɓilduɗe ɗe kaŋŋeeri e kosɗe ɗe cardi.

³³ A ɓila wiirndallo les ɓilduɗe. A nastina sundukru seedamku ton ɓaawo wiirndallo. Wiirndallo laatanto on senndorde hakkunde nokkuure seniinde e nokkuure ɓurnde senaago.

³⁴ A wallina jooɗorde ngam kefergal dow sundukru seedamku nder nokkuure ɓurnde senaago.

³⁵ A jo'ina taabal yeeso wiirndallo, non boo jo'inirɗum pittirlaaji haa tiitotira bee taabal, haa wuttudu jooɗorde senaande fombina. Taabal boo, a jo'ina ɗum haa wuttudu woyla.

³⁶ A waɗa wiirndallo ngam dammugal laymaaru, ngo gaaraaji leŋ ɗigguɗi baalaaɗi e carwinaaɗi e boɗeeji seɗɗa e boɗeeji coy, ɗum laato tuppitaaɗum.

³⁷ A waɗana wiirndallo daŋraŋge jowi ɗe leɗɗe gabde, a sudda ɗe bee kaŋŋeeri, ɓilduɗe maaje boo ɗe kaŋŋeeri. A ɓolina ngam maaje kosɗe jowi ɗe njamndi mboɗeeri.”