Gurtaaki 21 - Fulfulde Bible

Umrooje dow joonde jeyaaɓe

¹ Jawmiraawo ɓesdi wi'ugo: “Ndaa kiitaaji goɗɗi ɗi a anndinta Isra'iila'en:

² To on coodi maccuɗo Ibraniŋkeejo, o laatoto maccuɗo duuɓi joweego. Nder nduuɓu njoweeɗiɗaɓru o wurto o dimo, walaa ko o yoɓata.

³ To o wari feere maako, o wurto boo feere maako. To o wardi bee debbo, debbo maako wurtido bee maako.

⁴ To jawmiiko hokki mo debbo, debbo boo danyani mo ɓiɓɓe worɓe malla rewɓe, nden kam debbo e ɓikkoy mum laatano jawmum, goɗɗo oo wurto feere mum.

⁵ Ammaa to maccuɗo oo wi'i: Mi yiɗi jawmam e debbo am e ɓikkoy am, mi yiɗaa rimɗugo,

⁶ nden kam jawmiiko yahra mo yeeso Allah, o darna mo haa kosɗe parewal dammugal malla haa darnuŋgal dammugal saare. Jawmiiko tufa mo nofru bee tufirɗum, o laato maccuɗo maako haa foroy.

⁷ To goɗɗo soorri ɓiyum debbo o laato korɗo, taa o wurto bana maccuɓe ngurtorto.

⁸ To jawmiiko soodi mo ngam o te'a mo, nden o yiɗaa mo, sey o acca goɗɗo sootta mo. O walaa duŋayeere soorrugo mo haa jananɓe, ngam o yewi alkawal ngal ɓe kaɓɓotirino.

⁹ To o soodi mo ngam ɓiyiiko gorko, sey o waɗana mo fodde ko woonani ɓiɓɓe rewɓe.

¹⁰ To o te'i debbo feere, taa o ustana oya nyaamdu e kolte e gondal bee maako.

¹¹ To o waɗanaay mo kuuje tati ɗe'e, sey debbo wurto o dimo, walaa ko o yoɓata.”

Aybeeji jahranɗi goɗɗo haa maayde

¹² “Koo moy fiyi goɗɗo haa o maayi, o mbareteeɗo.

¹³ Ammaa to o waɗaay anniya mbarugo mo, to Allah fottini ɗum bee juŋngo maako, nden kam mi ta'anan on nokkuure nde o doggata o hisa ton.

¹⁴ Ammaa to goɗɗo haɓɓi dabare dow keeddiɗɗum, o mbari mo bee anniya, nden kam naŋnge mo, mbare mo koo to o doggi hisnugo hoore maako haa hirsirde am.

¹⁵ Koo moy fiyi baaba mum malla daada mum, o mbareteeɗo.

¹⁶ Koo moy wujji goɗɗo, koo ngam soorrugo mo, koo ngam jogaago mo, o mbareteeɗo.

¹⁷ Koo moy naali baaba mum malla daada mum, o mbareteeɗo.

¹⁸ To yimɓe ɗon njokkira, oo lukki oya malla o fiɗi mo bee hayre, ammaa naawnaaɗo oo maayaay, sey o waali haa be'itte,

¹⁹ to o waawan ummaago, o waanca haa yaasi bee tuggaaru, piyɗo mo hiitataake. Ammaa sey o suklo bee maako haa to o yamɗitake, o yoɓa mo boo wakkatiiji ɗi o waawaay huuwugo.

²⁰ To goɗɗo fiyi maccuɗo mum malla korɗo mum bee sawru haa o maayi nder juŋngo mum, ɗum waate haa maako.

²¹ Ammaa to maccuɗo malla korɗo oo yeeɗi fahin nyalaade woore malla nyalɗe ɗiɗi, taa ɗum waate haa maako, ngam o jawdi maako.

²² To worɓe ɗon njokkira, ndofli debbo reeduujo haa o rufi reedu, ammaa sarru ngoɗŋgu walaa, sey dofluɗo debbo oo yoɓa ceede ɗe goriiko yowani mo. O yoɓa ɗum fodde ko hiitooɓe ta'i.

²³ Ammaa to woodi ko heɓi debbo oo daliila sarru ngu'u, sey ɓe kiito naawnuɗo mo yoŋki bee yoŋki,

²⁴ yiitere bee yiitere, nyiindere bee nyiindere, juŋngo bee juŋngo, kosŋgal bee kosŋgal,

²⁵ wulannde bee wulannde, huuduure bee huuduure, ɗaalnere bee ɗaalnere.

²⁶ To goɗɗo fiyi maccuɗo malla korɗo mum, fusi mo yiitere, sey o yoofta mo o dimo mbattudi yiitere maako.

²⁷ To o yewi mo nyiindere, sey o yoofta mo o dimo mbattudi nyiindere maako.”

Umrooje dow sarru feere feere

²⁸ “To ngaari hawi gorko malla debbo haa o maayi, ngaari man fiɗe bee kaa'e, ammaa kusel maari nyaamataake. Jawmu ngaari walaa aybe.

²⁹ Ammaa to ndi kawoori diga naane, ɓe anndinɓe boo jawmiiri, ammaa o aynaay ndi, ndi hawi gorko malla debbo, nden ndi fiɗe bee kaa'e, jawmiiri boo o mbareteeɗo.

³⁰ To ɓe njowani mo coottaari, sey o sootta yoŋki maako fodde ko ɓe njowani mo fuu.

³¹ To ngaari hawi ɓiɗɗo gorko malla ɓiɗɗo debbo, ɓe mbaɗa ndi fodde kiita ka'a.

³² To ngaari hawi maccuɗo malla korɗo, sey jawmiiri hokka jawmu maccuɗo malla korɗo ceede cardi cappanɗe tati, ngaari boo fiɗe bee kaa'e.

³³ To goɗɗo maɓɓiti ɓulndu malla wasi ngaska, o maɓɓaay, to ngaari malla wamnde do'ake ton,

³⁴ sey jawmu ɓulndu yoɓa jawmu ndabbaawa ceede. Ammaa kaŋko mari baatɗum.

³⁵ To ngaari goɗɗo hawi ngaari keeddiɗɗiraawo mum haa ndi waati, sey ɓe coorra ngaari ngeeri, ɓe cennda ceede man e ɓe cennda mbaatndi boo.

³⁶ Ammaa to ɗum anndaama ndi kawoori diga naane, jawmiiri boo aynaay ndi, sey o hokka ngaari mbattudi hawaandi, ammaa mbaatndi, kaŋko mari.

³⁷ To goɗɗo wujji ngaari malla ndammoowa, hirsi ɗum malla soorri ɗum, sey o hokka ga'i jowi mbattudi ngaari ngoori e dammooji nayi mbattudi ndammoowa ngoota.