Gurtaaki 2 - Fulfulde Bible

Danyeeki Muusa e nderkaaku mum

¹ Goɗɗo lenyol Lewi te'i ɓiɗɗo debbo mo lenyol muuɗum.

² Debbo reedi, danyi ɓiŋngel gorgel. O yi'i no ngel wooɗiri, o nyukkini ngel lebbi tati.

³ Ɓaawoɗon, nde nii o waawataa tokkaago nyukkingo ngel, o hoo'i silaawo wamaaŋgo bee kewe, o wuji ngo bee taari lesdi e takkirɗum, o wallini ɓiŋngel nge'el nder maago. Nden o jo'ini ngo caka kewe haa fomoonde maayo Niil.

⁴ Adda maagel dari daayiiɗum haa o laara ko heɓata ngel.

⁵ Ɓaawo man seɗɗa, ɓii Firawna debbo jippi nder maayo Niil haa o yiiwo. Wakkati horɓe maako ɗon ngaanca baŋnge maayo Niil, o yi'i silaawo go caka kewe, o neli gooto caka horɓe maako waddi ngo.

⁶ Nden o maɓɓiti ngo, o yi'i ɓiŋngel gorgel, ngel ɗon woya. O yurmini ngel, o wi'i: “Ɗum ɓiŋngel Ibraniŋkeeyel.”

⁷ Adda maagel ƴami ɓii Firawna go: “Mi yaha mi ewnane musininoowo haa rewɓe Ibraniŋke'en ngam o musinina ngel ngam maaɗa na?”

⁸ Ɓii Firawna wi'i mo: “Yah!” Paanyo debbo oo yehi, ewni daada ɓiŋngel.

⁹ Ɓii Firawna wi'i debbo: “Hoo'u ɓiŋngel nge'el, musinin ngel ngam am, mi yoɓete.” Debbo hoo'i ɓiŋngel, musinini ngel.

¹⁰ Nde ɓiŋngel mawni deydey, daada maagel waddi ngel haa ɓii Firawna go, ngel laati ɓiɗɗo maako. O inndi ngel Muusa, ngam o wi'i: “Mi wurtini mo diga nder ndiyam”.

Muusa doggi haa Mediyan

¹¹ Nde Muusa mawni, o wurti haa o laara deerɗiraaɓe maako. O yi'i no kuugal maɓɓe saatiri. O yi'i Misraajo ɗon fiya Ibraniŋkeejo, goɗɗo lenyol maako.

¹² Muusa laari gal toy fuu. Nde o yi'aay goɗɗo, o mbari Misraajo, o iri mo nder njaareendi.

¹³ O lorti jaŋngo maajum. O yi'i Ibraniŋke'en ɗiɗo ɗon kaɓa. O ƴami aybuɗo: “Ngam ɗume piyata ngorgi ma?”

¹⁴ Goɗɗo oo jaabi: “Moy waɗi ma hooreejo ngam hiitugo min? A yiɗi mbarugo yam bana mbarduɗa Misraajo na?” Muusa hultori, numi: “Fakat, haala man waŋgi!”

¹⁵ Firawna boo nani haala man, o tefi mbarugo Muusa. Nden Muusa doggi, yehi jooɗi haa lesdi Mediyan. Nde o yotti ton, o jooɗi kommbi ɓulndu.

¹⁶ Yetiro, limanjo haa Mediyan woodi ɓiɓɓe rewɓe njoweeɗiɗo. Ɓe ngari haa ɓulndu, ɓe cafi, ɓe kebbini keeleeje ngam yarnugo dammooji baaba maɓɓe.

¹⁷ Ammaa waynaaɓe woɗɓe ngari, ndiiwi faanyɓe rewɓe ɓe'e. Nden Muusa ummi, jiŋngi ɓe, yarni dammooji maɓɓe.

¹⁸ Ɓe lorti haa baaba maɓɓe Re'uwel. O ƴami ɓe: “Ngam ɗume ngartuɗon law hannde?”

¹⁹ Ɓe njaabi: “Misraajo hisni min juuɗe waynaaɓe, o safani min ma, o yarni boo dammooji amin.”

²⁰ Re'uwel ƴami ɓe: “Toy mo? Koni accuɗon mo ɓaawo? Ewne mo haa o nyaamda bee meeɗen!”

²¹ Muusa yerdi jooɗaago haa gorko oo. O te'ani mo Cifuura, ɓiyiiko debbo.

²² Cifuura danyi ɓiɗɗo gorko. Muusa wi'i: “Mi koɗo nder lesdi njananndi.” O inndi mo Gersom.

²³ Ɓaawo duuɓi ɗuuɗɗi laamiiɗo Misra maayi. Isra'iila'en uumi ngam kuugal maɓɓe caatuŋgal, ɓe ngooki ngam ballal. Gookaali maɓɓe eeŋgi dow, yotti haa Allah.

²⁴ Allah nani uumaali maɓɓe. O siftori alkawal maako bee Ibrahiima e Isiyaaku e Yaakubu.

²⁵ O laari Isra'iila'en, o faami joonde maɓɓe.