Gurtaaki 19 - Fulfulde Bible

Alkawal Allah bee Isra'iila'en haa hooseere Sina

¹ Nyannde go'oore nder lewru tataɓru ɓaawo gurtaaki Isra'iila'en lesdi Misra, nyalaade man ɓe njotti ladde Sina.

² Ɓe ummino diga Refidim, ɓe njotti ladde Sina, ɓe caŋngini ton kommbi hooseere.

³ Muusa wa'i hooseere ngam fottugo bee Allah. Haa yeereere hooseere ton, Jawmiraawo ewni Muusa, o wi'i mo: “Ndaa nii mbi'ata Isra'iila'en, danygol Yaakubu:

⁴ On ngi'i ko mbaɗmi Misra'en, no mi roondiri on bana dutal roondorto ɓiyum'en dow bileeji mum, mi waddi on haa ɗo haa kommbi am.

⁵ Jonta, to on nanani yam fakat, to on ɗowtanake alkawal am, nden kam on laatoto ummaatoore am yiɗaande caka ummaatooje fuu, koo nde duniyaaru fuu, min jeyi.

⁶ Onon boo, on laatanto yam laamu liman'en e ummaatoore senaande. Kanjum mbi'ata Isra'iila'en.”

⁷ Muusa warti haa saŋngeere, ewni ndotti'en Isra'iila, yecci ɓe ko Jawmiraawo umri mo fuu.

⁸ Yimɓe ummaatoore fuu njaabi: “Ko Jawmiraawo wi'i fuu, min mbaɗan ɗum!” Muusa lornani Jawmiraawo jaawaabu maɓɓe.

⁹ Nden Jawmiraawo wi'i Muusa: “Mi waran haa ma nder duule tekkuɗe, ngam haa Isra'iila'en nana to mi ɗon wolida bee ma, ɓe koolo ma haa foroy.” Muusa lornani Jawmiraawo ko ummaatoore wi'no.

¹⁰ Fahin Jawmiraawo wi'i Muusa: “Lora haa yimɓe ummaatoore, umru ɓe ɓe cena ko'e maɓɓe hannde e jaŋngo, ɓe loota limce maɓɓe boo.

¹¹ Ɓe taaskano faɓɓijaŋngo, ngam faɓɓijaŋngo min Jawmiraawo mi jippoto gite ummaatoore fuu dow hooseere Sina.

¹² Waɗ keerol taarotooŋgol yimɓe ummaatoore fuu, wi'ɓe: Kakkile, taa on mba'o dow hooseere, taa on meema les maare boo! Koo moy meemi hooseere fuu, o mbareteeɗo!

¹³ Koo ɗum goɗɗo malla ndabbaawa, ɓe accataa yeeɗa. Ammaa taa goɗɗo meema ɗum: Ɓe piɗan ɗum bee kaa'e malla bee kuri. Sey to yimɓe nani sawtu luwal, ɓe mba'o dow hooseere.”

¹⁴ Muusa jippi wari haa ummaatoore. O umri yimɓe cena ko'e maɓɓe, ɓe loota limce maɓɓe boo.

¹⁵ Nden o wi'i ɓe: “Taaskane faɓɓijaŋngo! Taa ɓadite rewɓe mooɗon!”

¹⁶ Nyannde tataɓre nde weeti, pelmaali e ma'e e ruulde tekkunde ngaɗi dow hooseere e hoolo luwal semmbiɗŋgo masin. Yimɓe ummaatoore woɗɓe nder saŋngeere fuu ndiwni.

¹⁷ Muusa wurtini ɓe saŋngeere ngam ɓe ɓadito Allah. Ɓe ndari les hooseere.

¹⁸ Hooseere Sina fuu suuri cuurɗe, ngam Jawmiraawo jippi dow maare nder yiite. Cuurɗe man eeŋgi dow bana cuurɗe ɓolinirde. Hooseere fuu dimmbi masin.

¹⁹ Hoolo luwal ɗon ɓesda saatugo. To Muusa wolwi, Jawmiraawo ɗon jaabo mo nder felmaaŋgo.

²⁰ Jawmiraawo jippi haa yeereere hooseere Sina, ton o ewni Muusa, Muusa wa'iti haa yeereere hooseere.

²¹ Jawmiraawo wi'i mo: “Jippa, reentin yimɓe taa ɓe caalo keerol ngam laarugo yam, ngam taa ɗuuɗɓe maɓɓe maaya!

²² Koo liman'en ɓaditotooɓe yam boo, sey ɓe ceno ngam taa tikkere am ukkano ɓe.”

²³ Muusa wi'i Jawmiraawo: “Fakat, yimɓe mba'ataako hooseere Sina, ngam a reentini min, a wi'i: Waɗ keerol kommbi hooseere, sen nde.”

²⁴ Jawmiraawo wi'i mo: “Lorta haa saŋngeere, nden a wa'ita, an bee Haruna. Ammaa liman'en e yimɓe, taa ɓe caalo keerol ngam wargo haa am, ngam taa tikkere am ukkano ɓe.”

²⁵ Muusa jippi, wari haa ummaatoore, yecci nde ɗum.