Gurtaaki 18 - Fulfulde Bible

Yetiro yilli Muusa

¹ Yetiro, limanjo haa Mediyan, esiraawo Muusa, nani ko Allah waɗani Muusa e ummaatoore muuɗum Isra'iila fuu, waato no Jawmiraawo wurtiniri Isra'iila'en diga Misra.

² O hoo'i Cifuura, debbo Muusa, mo Muusa neldino ɗum haa baaba mum.

³ O hoo'i boo ɓiɓɓe Cifuura ɗiɗo. Muusa wi'no: “Mi koɗo nder lesdi njananndi.” O inndi afo maako Gersom.

⁴ O wi'no boo: “Allah mo baaba am jaggani, walli yam, hisni yam kaafahi Firawna.” Ngam maajum o inndi ɗiɗaɓo boo Eli'ezer.

⁵ Yetiro wardi bee ɓikkoy e debbo Muusa, ɓe tawi Muusa haa ladde, haa nokkuure nde o saŋngini haa hooseere Allah.

⁶ Yetiro neli goɗɗo wi'a Muusa: “Min esiraawo ma Yetiro, mi wari haa maaɗa, min bee debbo ma e ɓikkoy mum ɗiɗoy.”

⁷ Muusa wari, fotti bee esum. O turi yeeso maako, o hebbi mo. Ɓe ƴamƴamtiri haala njamu maɓɓe, nden ɓe nasti laymaaru Muusa.

⁸ Muusa limtani esum ko Jawmiraawo waɗi Firawna e Misra'en ngam daliila Isra'iila'en, non boo haala torraaji keɓɗi ɓe dow laawol e no Jawmiraawo hisniri ɓe boo.

⁹ Yetiro seyori hayru ngu Jawmiraawo waɗani Isra'iila'en bee rimɗingo ɓe diga juuɗe Misra'en.

¹⁰ Yetiro wi'i: “Yettoore laatano Jawmiraawo mo hisni on juuɗe Misra'en e juŋngo Firawna.

¹¹ Jonta anndumi Jawmiraawo woni mawɗo dow ɗowanteeɓe fuu. O waŋgini ɗum yaake Misra'en mbaɗi Isra'iila'en ƴaggaare.”

¹² Nden Yetiro lii'ani Allah nguleteeŋga e kirseteeɗi. Haruna e ndotti'en Isra'iila fuu ngari nyaamdugo bee esiraawo Muusa yeeso Allah.

Darneeki hoore'en

¹³ Jaŋngo man Muusa jooɗi haa o waɗana ummaatoore kiita. Ummaatoore dari yeeso Muusa diga fajiri haa kiikiiɗe.

¹⁴ Esiraawo Muusa yi'i ko o waɗani ummaatoore fuu, o ƴami mo: “Ngam ɗume mbaɗata bana nii? Ngam ɗume njooɗiiɗa feere ma, ummaatoore fuu ɗon dari yeeso maaɗa diga fajiri haa kiikiiɗe?”

¹⁵ Muusa jaabi esum: “Yimɓe ɗon ngara haa am ngam anndugo muuyo Allah.

¹⁶ To haala ɗon hakkunde goɗɗo e keeddiɗɗum, ɓe ngaran haa am, mi ta'a haala man. Mi anndinan ɓe farillaaji e umrooje Allah boo.”

¹⁷ Esiiko wi'i mo: “Ko mbaɗata ɗo, wooɗaay!

¹⁸ A tampan masin, an e ummaatoore wondunde bee maaɗa fuu! Kuugal nga'al teddani ma, a waawataa huuwugo ngal feere maaɗa.

¹⁹ Heɗita sawari am, Allah boo wonda bee ma! Kuugal ma, ɗum daraago yeeso Allah mbattudi ummaatoore e waddango mo haalaaji maare.

²⁰ Sey a faamtina yimɓe ummaatoore boo farillaaji Allah e umrooje muuɗum. Anndin ɓe no ɓe tokkorto laawol maako e no ɓe kuuwranta mo boo.

²¹ Suɓtu nder ummaatoore fuu worɓe marɓe daraja, hulɓe Allah, hoolaaɓe, wanyɓe riba kalluka. Darnu ɓe hoore'en dow yimɓe ujineere e hoore'en dow yimɓe teemerre e hoore'en dow yimɓe cappanɗe njowo e hoore'en dow yimɓe sappo.

²² Kamɓe ɓe kiito yimɓe wakkati fuu. Ɓe ngadda kiita makka fuu yeeso maaɗa, ammaa kiita pamara, ɓe kiito bee ko'e maɓɓe. Hoynan hoore ma, accu ɓe ndoondo kamɓe boo kaliifaaku ngu'u bee maaɗa!

²³ To a waɗi bana non, to Allah boo umri ma, a heɓan semmbe. Yimɓe ummaatoore nde'e boo loroto haa nokkuure maɓɓe bee salaaman.”

²⁴ Muusa jaɓi sawari esum, o waɗi ko Yetiro wi'i mo.

²⁵ O suɓi worɓe marɓe daraja nder Isra'iila fuu, o darni ɓe ardiiɓe ummaatoore: Hoore'en dow ujineere, hoore'en dow yimɓe teemerre, hoore'en dow yimɓe cappanɗe njowo e hoore'en dow yimɓe sappo.

²⁶ Kamɓe ɓe ɗon kiito yimɓe wakkati fuu. Kiita caɗka ɓe ngadda ka yeeso Muusa, kiita pamara boo ɓe kiito bee ko'e maɓɓe.

²⁷ Muusa jaɓɓiti esum, o hooti lesdi maako.