Gurtaaki 15 - Fulfulde Bible

Muusa e Isra'iila'en ngimani Jawmiraawo

¹ Muusa e Isra'iila'en ngimani Jawmiraawo yimre nde'e: Mi yimanan Jawmiraawo, ngam o ɓaŋiiɗo masin. O rufi pucci e wa'iiɓe ɗi nder maayo.

² Jawmiraawo woni semmbe am e daliila yimre am! O hisni yam, kaŋko woni Allah am, mi teddinan mo! O Allah baaba am, mi maŋgtan mo!

³ Jawmiraawo woni konoowo, innde maako Jawmiraawo!

⁴ O rufi mootaaji pucci Firawna e jama'aare konu maako nder maayo, umrooɓe maako suɓaaɓe njolli nder Maaliya!

⁵ Ndiyamji lugguɗi moɗi ɓe, ɓe njippi nder luggeeŋga bana kaa'e!

⁶ Nyaamo ma, yaa Jawmiraawo, mari tedduŋgal e baawɗe! Nyaamo ma, yaa Jawmiraawo, sampiti konne'en ma!

⁷ Bee ɗuuɗki maŋngu ma a ɗon do'a konne'en ma. To tikkere ma saati, nde halkan ɓe bana geene!

⁸ Ndiyamji njowndindiri ngam daliila poofɗe kine ma, ilamji ndari bana mahol, ndiyamji lugguɗi ƴuuge caati nder reedu maayo!

⁹ Konne'en meeɗen mbi'no: Min taasnan ɓe, min naŋngan ɓe, min cenndan keɓal jaalorgal amin, haa ɓura ko min ngiɗi haa maɓɓe, min losan kaafahi amin, juŋngo amin nattinan ɓe!

¹⁰ Ammaa an, Jawmiraawo, a foofi bee poofɗe ma, maayo moɗi ɓe, ɓe muti nder ndiyamji mawɗi bana njamndi!

¹¹ Yaa Jawmiraawo, moy nanndi bee ma caka ɗowanteeɓe? Moy nanndi bee ma? Senaare ma nde hayɗiniinde! A kulniiɗo, ke'iiɗo teddineego, baawɗo waɗugo kaayeefiiji!

¹² A forti nyaamo ma, lesdi moɗi taasnuɓe min.

¹³ A rimɗini ummaatoore ma! Bee mbooɗeeŋga ma a ɗowi nde. A ɗowi nde bee baawɗe ma haa jooɗorde ma seniinde.

¹⁴ Yimɓe ummaatooje goɗɗe ndiwni nde ɓe nani habaru ndu'u. Kulol naŋngi jooɗiiɓe haa Filisti.

¹⁵ Ardiiɓe Edoom kultori, diwŋgol naŋngi semmbiɗɓe Mo'ab, ɓerɗe jooɗiiɓe Kanaana fuu ta'i!

¹⁶ Kulol maŋngol ukki dow maɓɓe. Ngam maŋngu baawɗe ma ɓe ndari siriw bana kaa'e, saa'i ummaatoore ma eeri, yaa Jawmiraawo, haa ummaatoore laatiinde maral ma eeri.

¹⁷ A ɗon yahra ɓe dow hooseere laatotoonde maral ma ngam jo'ingo ɓe ton, yaa Jawmiraawo. Ɗum nokkuure nde mbaɗɗa joonde ma, yaa Allah Jawmiraawo, ɗum suudu ma seniindu ndu a taaskitini.

¹⁸ Jawmiraawo, an woni laamiiɗo haa abada abadin!

¹⁹ Nde pucci e mootaaji pucci e wa'iiɓe pucci Firawna nasti maayo, Jawmiraawo wartiri ndiyamji maago dow maɓɓe. Ammaa Isra'iila'en eeri caka maayo dow joorɗum.

²⁰ Mariyama, annabiijo debbo, deerɗiraawo Haruna, hoo'i mbaggu, ɗon fiya. Rewɓe Isra'iila'en fuu tokki mo bee baawɗi e gamarle.

²¹ Mariyama ardi ɓe, ɓaŋgti yimre nde'e: “Ngimane Jawmiraawo, ngam o ɓaŋiiɗo masin! O rufi pucci e wa'iiɓe ɗi nder maayo!”

Ndiyam kaaɗɗam haa Maara

²² Muusa ummini Isra'iila'en haa maayo Maaliya, ɓe ndilli ladde Sura. Nyalɗe tati ɓe njehi nder ladde, ɓe tawaay ndiyam.

²³ Nde ɓe njotti Maara, ɓe mbaawaay yarugo ndiyam ton, ngam ɗam kaaɗɗam. Ngam maajum ɓe ewni nokkuure man Maara.

²⁴ Yimɓe ummaatoore ngurŋgurti dow Muusa, mbi'i mo: “Ɗume njareten?”

²⁵ Muusa wookani Jawmiraawo. Jawmiraawo holli mo leggal. Muusa sakkini ngal nder ndiyam, ɗam laati mbelɗam. Ton Jawmiraawo hokki Isra'iila'en farillaaji e ɗabiyaaji, ton boo o foondi ɓe.

²⁶ O wi'i ɓe: “Min woni Jawmiraawo, Allah mooɗon. Fakat to on ɗowtanake yam bee waɗugo ko fottani yam, to on nani umrooje am e on ɗowtanake farillaaji am fuu, nden kam mi ukkantaa on nyawuji ɗi mi ukkani Misra'en. Ngam min woni Jawmiraawo, kurgoowo on.”

²⁷ Ɓaawoɗon Isra'iila'en njotti Elim. Ton, ɓe tawi ceeɓooje sappo e ɗiɗi e dibinooje cappanɗe joweeɗiɗi. Ɓe caŋngini ton baŋnge ndiyam.