Gimi Boyki 4 - Fulfulde Bible

Ɓaawo do'ere Urusaliima

¹ Kayto! Kaŋŋeeri men laaɓndi ɗelkundi furɗiti, kaa'e haykaliiru caŋkiti haa kawtirɗe laabi fuu.

² Ɓiɓɓe Siyona marno saman bana kaŋŋeeri laaɓndi, ammaa jonta ɓe nanndi bee payanɗe loope!

³ Koo saafaandu rewru boo musininan ɓiyum'en, ammaa rewɓe lenyol am laati saatuɓe bana dabbi ladde.

⁴ Ɗemɗe musinankoy ɗon takko nder kunnduɗe ngam ɗomka, ɓikkoy ngiɗi nyaamdu, ammaa walaa dokkanɗo koy.

⁵ Nyaamɓe kuuje belɗe naane ɗon maaya haa laabi. Mawninaaɓe nder jeynitaare ɗon laanya jiddere.

⁶ Aybe Urusaliima ɓuri hakke Sodoma mawnugo. Berniwol ngo'ol halki bee juhuki, koo nde walaa kippuɗo ngol.

⁷ Senaaɓe men coɓaayno, ɓe laaɓɓe tal bana mallimallooje, ɓe ɓuri kosam ranwugo, ɓe semmbiɗɓe, ɓe yamɓe, ɓe wooɗɓe bana kaa'e safira.

⁸ Jonta geese maɓɓe ɓalwi kurum, walaa annditanɗo ɓe haa laabi, laral maɓɓe ɗon takki i'e maɓɓe, ngal yoori bana leggal.

⁹ Maayrugo bee kaafahi ɓuri maayrugo bee weelo malla ɗaylugo ngam ƴaamnde gese woodaa.

¹⁰ Daadiraaɓe ɗelma-ɓerɗe'en ndefi ɓikkoy muuɗum'en, koy laati nyaamdu maɓɓe nde masiibo ukkani ummaatoore am.

¹¹ Jawmiraawo timmini tikkere mum, waanji ɓernuki mum caatuki dow Siyona. O huɓɓi yiite nder Siyona, nge nyaami koo caɓɓaaje boo.

¹² Walaa koo gooto nder laamiiɓe e yimɓe duniyaaru fuu tammi konne'en keɓan nastugo dammuɗe Urusaliima.

¹³ Ammaa ɗum laati non! Ngam liman'en e annabi'en mbaɗno hakke. Ƴiiƴam yimɓe ɓe ngalaa aybe, ɓe ndufi ɗam nder berniwol.

¹⁴ Ɓe ngiili nder laabi bana wumɓe, limce maɓɓe tunwiri ƴiiƴam, haa tagu yiɗaa meemugo ɗe.

¹⁵ Yimɓe kooldi: “Cotte! On soɓɓe! Taa meeme koo ɗume!” Kamɓe ɓe ngiili caka ummaatooje, walaa mo weerni ɓe.

¹⁶ Jawmiraawo saŋkiti ɓe, sali yi'ugo ɓe. Walaa mo teddini liman'en, walaa mo yurmini ndotti'en.

¹⁷ Gite men comi ɗaɓɓititgo ballal, ammaa ngal waraay, en ndeeni ummaatoore ngam hisnugo en, ammaa nde waraay.

¹⁸ Konne'en kakkilani palanɗe men, en mbaawaay wurtaago yaasi. Balɗe men timmidi, timmoode yottake!

¹⁹ Taasnuɓe en ɓuri dute yaawugo. Ɓe taasni en dow kooseeje, ɓe mbaaltani en nder ladde.

²⁰ Ɓe naŋngi aynoowo yoŋkiiji men, laamiiɗo mo Jawmiraawo suɓi ɗum, mo tammiiɗen: Kaŋko o aynan en caka ummaatooje.

²¹ Ceye, onon yimɓe Edoom, jooɗiiɓe lesdi Uus, mbelmbelte. Onon boo on njaran jardugel tikkere Allah, on nguykan, on laatoto temmbuɓe.

²² Onon yimɓe Siyona, kiita mon timmi, Jawmiraawo meetataa dahugo on. Ammaa onon Edoomi'en, o ɗaɓɓitan aybeeji mon, o waŋginan ɗi.