Gimi Boyki 3 - Fulfulde Bible

Torra e tuubu e tammunde

¹ Min woni goɗɗo mo maati torra piyɗe Jawmiraawo naawɗe.

² O ɗowi yam, o yahri yam nder nyiɓre nyiɓɓunde, ammaa naa nder jayŋgol.

³ Nde weeti fuu o fiyatam.

⁴ Kusel am e laral am ɗayli daliila maako, o yewi i'e am.

⁵ O taarni yam bee metteeŋga e torra bana mahol.

⁶ O jo'ini yam nder nyiɓre bana maayɓe diga ɓooyma.

⁷ O taarni yam bee mahol, o haɗi yam wurtaago, o haɓɓi yam bee callalluuji.

⁸ Mi wooki, mi tori ballal, ammaa o nanaay yam.

⁹ O sukki laabi am bee kaa'e mawɗe, o selni ɗi.

¹⁰ O waaltani yam bana ɓoodu, bana mbarooga haa nyukkorde mum.

¹¹ O selni yam laawol, o seeki yam, nden o acci yam.

¹² O tiri lagaawal, o fiɗi kuri maako fuu dow am.

¹³ Kuri ɓaaru maako fuu, o ɗisi ɗi nder ɓooƴe am.

¹⁴ Yimɓe am fuu ɗon njalammi, nde weeti fuu ɓe ɗon njancammi nder gimi.

¹⁵ O haarni yam bee kuuje kaaɗɗe, o yarni yam kaaɗɗam.

¹⁶ O dooli yam ƴakkugo kaa'e, o i'i yam nder ndoondi.

¹⁷ Mi walaa jam, mi yejjiti ko woni hayru.

¹⁸ Nden mbi'mi: Tedduŋgal am ittake, tammunde am dow Jawmiraawo jinni!

¹⁹ Mi ɗon nder torra, mi toskaaɗo, to mi numti ɗum, ɗum ɗon haaɗani yam rok.

²⁰ Ammaa ɓernde am ɗon numa ɗum foroy, ɗum tampini yam.

²¹ Ndaa ko njaɓanmi haa ɓernde, haa mi heɓta tammunde:

²² Mo'e Jawmiraawo timmaay, mbooɗeeŋga maako boo walaa keerol,

²³ nde weeti fuu hinnuye maako hesɗitan, gooŋgaaku maako ɗon tabiti.

²⁴ Jawmiraawo woni geɗal am, ngam maajum mi ɗon tammori mo.

²⁵ Jawmiraawo woonanan koo moy koolotooɗo mo, ɗakkotirɗo bee maako.

²⁶ Booɗɗum to goɗɗo sirwake, reeni kisndam Jawmiraawo.

²⁷ Booɗɗum to goɗɗo jaɓi elto saa'i o derkeejo tawon.

²⁸ To Jawmiraawo yowani mo bone, sey o jooɗo feere maako, o sirwo.

²⁹ O turo, hunnduko maako meema mbulwuldi, ngam teema tammunde ɗon tawon.

³⁰ O waylitana maaranɓe mo galaŋgal maako, o jaɓa toskaare fuu.

³¹ Jawmiraawo wudintaa en haa foroy.

³² Ɓaawo o sunni en, o hinnoto en boo fodde mo'e maako ɗuuɗɗe.

³³ O seyortaako torrugo ɓiɓɓe Aadama.

³⁴ To halluɓe njaaɓi haɓɓaaɓe lesdi, nami ɓe les kosɗe muuɗum'en,

³⁵ to ɓe cottini gooŋga goɗɗo yeeso Allah Ɓaŋiiɗo,

³⁶ to ɓe ɓilli goɗɗo yeeso kiita, kadi Jawmiraawo anndaa ɗum na?

³⁷ Moy umrata huunde laato, sonaa to Jawmiraawo taynori ɗum?

³⁸ Naa dow umroore Ɓaŋiiɗo hayru e sarru laatoto?

³⁹ Koni neɗɗo siŋkata? Sey koo moy siŋka ngam hakkeeji muuɗum.

⁴⁰ Sey ndaarten laabi men, linyen ɗi, nden en lorto haa Jawmiraawo.

⁴¹ En ɓaŋgtu juuɗe men bee ɓerɗe men fuu heedi Allah mo asama:

⁴² “Min mbaɗi hakke, min tuurti, an boo a yaafanaaki min.

⁴³ A moji tikkere, a tokki min, a mbari min bilaa enɗam.

⁴⁴ A suuɗi nder duule, haa torɗe amin njottaaki ma.

⁴⁵ A laatini min jiddere e kuuje nyidduɗe caka ummaatooje.

⁴⁶ Konne'en amin fuu ɗon njala min, ɗon kuɗa min.

⁴⁷ Kulol e kultoreeŋgol e yibbere e halkere ukkani min.

⁴⁸ Gite am ɗon keewi gonɗi, ngam daliila halkere ummaatoore am.

⁴⁹ Gite am ɗon ilna gonɗi, ɗi timmataa,

⁵⁰ haa to Jawmiraawo mo asama hakkilani en, laari en.

⁵¹ Gite am ɗon naawa ngam bojji dow faanyɓe rewɓe berniwol am.

⁵² Wanyɓe yam meere tokki loohaago yam bana sonndu.

⁵³ Ɓe nastini yam ngaska mi geeto, ɓe cakkini kaa'e dow am.

⁵⁴ Ndiyam towti dow hoore am, mi tammino mi maayan.

⁵⁵ Saa'i mi ɗonno haa ngaska lugguka, mi ewni ma, yaa Jawmiraawo.

⁵⁶ Nde mi tori ma ballal, a nani yam, a jaɓi tornde am!

⁵⁷ Nyalaade man a jaabi yam, a wi'i yam: Taa hul.

⁵⁸ An a jiŋngi yam, yaa Jawmiraawo, a hisni yoŋki am.

⁵⁹ A yi'i kalluɗum ko ɓe mbaɗi yam. Waɗanam kiita!

⁶⁰ A ɗon yi'a nganyaandi maɓɓe e dabareeji maɓɓe fuu.

⁶¹ A nani no ɓe kuɗiri yam, yaa Jawmiraawo, a anndi dabareeji maɓɓe fuu.

⁶² Foroy ɓe ɗon mbolwa dow am, ɓe ɗon ngurŋgurta dow am.

⁶³ Laar ko ɓe mbaɗata fuu. Foroy ɓe ɗon njancammi.

⁶⁴ Yaa Jawmiraawo, warja ɓe fodde kuuɗe maɓɓe.

⁶⁵ Saatin ɓerɗe maɓɓe, ukkan ɓe naaloore ma.

⁶⁶ Taasnu ɓe bee tikkere, nattin ɓe les asama maaɗa, yaa Jawmiraawo!”