Gimi Boyki 2 - Fulfulde Bible

Kiita Jawmiraawo dow Urusaliima

¹ Kayto! Jawmiraawo tikki, suddi Siyona bee nyiɓre, sakkini daraja Isra'iila diga asama haa lesdi. Nyalaade tikkere maako o siftoraay koo haykaliiru maako boo.

² Jawmiraawo halki gese Yaakubu fuu bilaa enɗam. O yibbini berniiji Yahuuda bee tikkere. O lasbini laamu, o do'i ardiiɓe maagu.

³ Bee caatal tikkere maako o nattini semmbe Isra'iila fuu. O sali wallugo en, nde konne'en ngari. O huɓɓi yiite nder lesdi Yaakubu, nge ɗon nyaama ko taari ɗum fuu.

⁴ O tiri lagaawal maako bana konneejo, nyaamo maako dimmbaaki. Bana ganyɗo o mbari koo ɗume ko fottani gite men. O rufi tikkere maako bana yiite nder cuuɗi men.

⁵ Jawmiraawo laatani en bana konneejo, nattini Isra'iila, laatini berniiji cemmbiɗɗi e cuuɗi mawɗi fuu bille, ɗuɗɗinani yimɓe Yahuuda uumaali e bojji.

⁶ O wonni suudu maako, haa cujidanten mo, o yibbini nokkuure fottirde maako. O yejjitini juulɗe e nyalɗe ciwtorɗe nder Siyona. O wudini laamiiɗo e limanjo ngam tikkere maako saatunde.

⁷ Jawmiraawo wudini hirsirde mum, yawi nokkuure mum seniinde. O acci konne'en ngibbina mahi maare. Ɓe kooli nder suudu maako bana to juulde waɗi.

⁸ Jawmiraawo annini halkugo mahol taariiŋgol Siyona. O foondi ngol bee ɓoggol, o ittaay juŋngo maako haa ngol halki. Mahol nderwol e yaasiwol ɗiɗi fuu ngibbi.

⁹ Dammuɗe berniwol ngibbi, o sampiti jamɗe palduɗe maaje. Laamiiɗo e saraaki'en ɗon caka saadooni'en, dooka walaa, annabi'en boo keɓataa wahayuuji diga Jawmiraawo fahin.

¹⁰ Ndotti'en Urusaliima ɗon njooɗi dow lesdi, ɗon njeeɗi, ɓe ndufi mbulwuldi dow ko'e maɓɓe, ɓe kaddi limce buhuuje. Faanyɓe rewɓe nder berniwol kippi geese muuɗum'en.

¹¹ Gite am ɗon purɗa daliila gonɗi, teteki am ɗon ngula. Ɓernde am ta'i ngam halkere yimɓe ummaatoore am. Ɓikkoy e musinankoy ɗon maaya haa laabi.

¹² Koy ɗon mbi'a daadiraaɓe maakoy: “Toy nyaamdu e njaram?” Koy ɗon njana haa laabi bana yuwaaɓe, nden koy maaya dow koppi daada maakoy.

¹³ Urusaliima, berniwol am, ko mbi'anmaami? A walaa nanndu. Balndi ɗiye mbaɗanmi, haa mi de'itine? Sarru ma walaa keerol bana mbeela. Moy hurgete?

¹⁴ Walaa ko annabi'en ngi'ani ma, sey pewe meere tan. Ɓe mbaŋginaay hakkeeji ma ngam a tuuba, ɓe ngaazi ma bolle rikiciije, estooje tan.

¹⁵ Saalotooɓe kommbi ma ɗon kella juuɗe, ɗon luu'a ɗon ndimmba ko'e muuɗum'en dow Urusaliima, ɗon mbi'a: “Naa kaŋgol wonno berniwol booɗŋgol timmuŋgol ngol welwelo duniyaaru fuu!”

¹⁶ Konne'en ma fuu maɓɓiti kunnduɗe muuɗum'en jaasɗum, ɗon kirƴindira nyii'e, ɗon luu'a, ɗon mbi'a: “En moɗi ngol! Nyalaade nde ndeenɗen waɗi, en ɗon ngi'a.”

¹⁷ Jawmiraawo waɗi ko annini, hebbini wolde mum nde o wi'i diga ɓooyma. O yibbini ma, walaa ko lutti. O hokki konne'en ma jaalorgal, o semmbiɗini wanywanyɓe ma.

¹⁸ An Urusaliima, accu mahi ma ngookana Jawmiraawo. Gite ma ilna gonɗi bana maayel, jemma bee naaŋge fuu. Taa siwta, taa accu woyugo.

¹⁹ Umma, ummita jemmaare fuu, a woyana Jawmiraawo. Sey a waŋgina ko woni haa ɓernde ma fuu yeeso maako. Weeɗ juuɗe ma heedi maako, tora mo o yurmina ɓikkoy ma, koy ɗon maaya bee weelo haa hawtirde laabi fuu.

²⁰ Laar, yaa Jawmiraawo, laar mo torruɗa bana non! To rewɓe nyaami ɓikkoy muuɗum'en ngiɗaakoy, ɗum fotti na? To liman'en e annabi'en mbaraama nder haykaliiru, ɗum fotti na?

²¹ Derke'en e nayeeɓe ɗon mbaali haa laabi. Faanyɓe rewɓe e suka'en maayri bee kaafahi. A hirsi ɓe nder nyalaade tikkere ma, a enɗaay ɓe sam.

²² A ewni konne'en taariiɓe yam bana to ɗum juulde. Nyalaade tikkere ma walaa mo daɗi, walaa mo lutti. Ɓikkoy am koy kuufmi, koy mawninmi, konneejo am nattini koy.