Galaatiya'en 4 - Fulfulde Bible

¹ Ndaa ko ngiɗmi wi'go: Yaake donoowo o ɓiŋngel tawon, walaa ko feerotirta mo bee maccuɗo, koo to o jawmu kuuje fuu.

² Ammaa o ɗon haa juuɗe kaliifa'en e haa sigooɓe kuuje maako haa to wakkati ki baaba darni yottake.

³ Bana non enen boo, yaake en ɓikkoy, en maccuɓe ruuhuuji laamaniiɗi duniyaaru.

⁴ Ammaa nde wakkati waɗi, Allah neli Ɓiɗɗo mum. Kaŋko o danyaama e debbo, o yeeɗi les tawreeta,

⁵ ngam haa o rimɗina wonɓe les tawreeta, o heɓna en baawɗe laataago ɓiɓɓe Allah.

⁶ Onon on laati ɓiɓɓe Allah. Ngam maajum o nelani on Ruuhu Ɓiɗɗo maako nder ɓerɗe mon, mo ɗon ewno: “Abba! Baaba!”

⁷ Nden kam naa on maccuɓe fahin, ammaa on ɓiɓɓe. Nde nii on ɓiɓɓe maako, on laati boo ronooɓe ko Allah sigani ɓiɓɓe mum.

Saklere Pol daliila Galaatiya'en

⁸ Ɓooyma on anndaano Allah, on maccuɓeno ɗowanteeɓe ɓe ngalaa baawɗe bana ɗe Allah.

⁹ Ammaa nde jonta on anndi Allah, ndikka mi wi'a: Allah anndi on, koni lorotooɗon haa ruuhuuji tampuɗi meereeji ɗi'i? Kadi on ngiɗi on laato maccuɓe maaji fahin na?

¹⁰ On ɗon camɗina nyalɗe goɗɗe e lebbi goɗɗi e wakkatiiji goɗɗi e duuɓi goɗɗi.

¹¹ Mi huli, taa torra ka torriimi ngam mooɗon laato meere.

¹² Deerɗam'en, mi ɗon toro on: Laate bana am nde nii min boo mi laatake bana mooɗon. On mbaɗaay yam aybe sam:

¹³ On ɗon ciftora no mi aartiri waazaago on Linjiila. Saa'i maajum mi nyawɗo.

¹⁴ Nyawu am ɓillanno on ammaa on njawaaki yam, on nefaay yam sam. On njaɓi yam bana malaa'ikaajo Allah, bana on njaɓranno Yeesu Almasiihu.

¹⁵ Naane on ɗonno nder hayru. Toy ɗum jonta? Gooŋga mi wi'ata on, to ɗum waɗotono, on ɗoofanno gite mon, on ndokkammi ɗe.

¹⁶ Kadi mi laati konneejo mon ngam mi ɗon wi'a on gooŋga na?

¹⁷ Yimɓe woɗɓe ɗon cuklano on masin, ammaa naa ngam hayru mon. Ɓe ɗon ɗaɓɓa senndugo on bee am, ngam haa on cuklano ɓe masin.

¹⁸ Booɗɗum to on ɗon cuklano ko wooɗi wakkatiiji fuu, naa sey to mi ɗon wondi bee mooɗon tan.

¹⁹ Onon ɓikkoy am, mi ɗon yara bone ngam daliila mooɗon fahin, bana luuwe ɓesnanɗo, haa to jaati Almasiihu waŋgi laaɓɗum nder mooɗon.

²⁰ Teema mi yelanno wondugo bee mooɗon jonta, haa mi wolwana on bee laawol goɗŋgol. Haala mooɗon sakli yam!

Misaalu Hajara e Saraatu

²¹ Mbi'eeɗam onon yiɗɓe leestango tawreeta, on nanaay ko ka wi'ata na?

²² Deftere wi'i: Ibrahiima woodi ɓiɓɓe ɗiɗo, oo ɓii Hajara, korɗo, oya boo ɓii Saraatu, debbo dimo.

²³ Ɓii korɗo danyaama fodde ɗabiya yimɓe, ammaa ɓii dimo danyaama fodde iinawol Allah.

²⁴ Ndaa ko saawi nder haala ka'a: Rewɓe ɗiɗo ɓe'e, ɓe alkawalji ɗiɗi: Alkawal gootal, waato Hajara, iwi haa hooseere Sina, ɗon danya maccuɓe.

²⁵ Hajara, ɗum hooseere Sina nder lesdi Arabiya. O foti bee Urusaliima, berniwol jontawol, jooɗiiŋgol bee ɓikkoy mum nder maccuŋgaaku.

²⁶ Ammaa Urusaliima ngol asama, ngol dimol. Kaŋgol woni daada meeɗen.

²⁷ Ngam Deftere wi'i: “Seya, an dimaro, mo maraay ɓikkoy. Hoolu bee seyo, an mo meeɗaay yarugo bone luuwe. Ngam ɓikkoy gudinaaɗo ɓuran koy marɗo gorko ɗuuɗugo.”

²⁸ Deerɗam'en, bana Isiyaaku, on laati ɓiɓɓe danyaaɓe fodde iinawol Allah.

²⁹ Ammaa bana ɓooyma danyaaɗo fodde ɗabiya yimɓe toonyi danyaaɗo fodde Ruuhu Allah, jonta boo bana non ɗum wa'i.

³⁰ Ammaa ɗume Deftere wi'ata? “Riiw korɗo bee ɓiyum fuu, ngam ɓii korɗo rondataa bee ɓii dimo.”

³¹ Deerɗam'en, enen en laataaki ɓiɓɓe korɗo, ammaa en ɓiɓɓe dimo.