Galaatiya'en 1 - Fulfulde Bible

Koofŋgol

¹ Min Pol, nelaaɗo Yeesu Almasiihu e Allah Baabiraawo, ummitinɗo Yeesu diga maayde, naa goɗɗo malla yimɓe neli yam, ammaa Allah bee hoore muuɗum.

² Min e deerɗiraaɓe wonduɓe bee am, min ɗon mbinndana on, onon jama'aaje nuɗɗinɓe nder lesdi Galaatiya:

³ Allah, Baabiraawo men e Jawmiraawo Yeesu Almasiihu ndokka on mo'ere e salaaman.

⁴ Almasiihu hokki hoore mum ngam daliila hakkeeji men, ngam hisnugo en diga zamanuuru jontaaru hallundu ndu'u fodde muuyo Allah, Baabiraawo men.

⁵ Tedduŋgal laatano Allah haa abada abadin. Aamiina!

Walaa Linjiila ngoɗka

⁶ On kayɗini yam ngam law on ngayliti, on acci Allah mo ewni on bee mo'ere Almasiihu haa on tokko Linjiila ngoɗka.

⁷ Fakat, Linjiila ngoɗka woodaa. Ammaa woodi umminanɓe fitina caka mooɗon, ɓe ngiɗi waylugo Linjiila Almasiihu.

⁸ Ammaa to goɗɗo, koo minin, koo malaa'ikaajo iwɗo haa asama waazi on Linjiila peerotirka bee ka min ngaazinno on, nden kam naaloore Allah ukkano mo!

⁹ Ko min meeɗi wi'go on ɗum, sey mi wi'a ɗum fahin: To goɗɗo caka mooɗon waazi Linjiila peerotirka bee ka njaɓɗon, nden kam naaloore Allah ukkano mo!

¹⁰ Kadi jonta kam yerduye yimɓe mi ɗaɓɓata naa malla nde Allah? Malla mi ɗon ɗaɓɓa fottango yimɓe naa? To mi yiɗno fottango yimɓe, nden kam mi wonataano maccuɗo Almasiihu.

Pol nelaaɗo seedi haala ewnaandu mum

¹¹ Deerɗam'en, mi ɗon anndina on ɗu'um: Linjiila ka ngaazinmi iwaay haa numooji yimɓe.

¹² Ngam naa haa neɗɗo njaɓmi ka, naa neɗɗo ekkitini yam ka boo, ammaa mi anndinaama bee wahayu Yeesu Almasiihu.

¹³ On meeɗi nanugo no mi tokkorino diina Yahuudu'en ɓooyma. Mi ɗonno toonyo jama'aare nuɗɗinɓe Allah bee caatal, mi ɗonno tefa wirgugo nde.

¹⁴ Mi ɗonno yaha yeeso yeeso nder diina Yahuudu'en ko ɓuri ngorgiraaɓe am Yahuudu'en ɗuuɗɓe, mi ɗonno bee tiinaare ɗuuɗnde heedi al'aadaaji kaakiraaɓe am.

¹⁵ Ammaa Allah mo suɓi yam diga mi siwaa danyeego, mo ewni yam daliila mo'ere mum, nde ɗum fottani mo

¹⁶ o waŋginani yam Ɓiɗɗo maako, haa mi waazina Linjiila maako nder ummaatooje. Nden nii mi sarwotiraay bee ɓii-Aadama,

¹⁷ mi yahaay Urusaliima boo haa nelaaɓe aartuɓe yam, mi dilli lesdi Arabiya, nden mi lori haa Damas.

¹⁸ Duuɓi tati ɓaawoɗon mi yehi Urusaliima haa min anndotira bee Kefas. Mi jooɗodi bee maako nyalɗe sappo e jowi.

¹⁹ Mi yi'aay nelaaɗo goɗɗo ton, sonaa Yaakuba, deerɗiraawo Jawmiraawo.

²⁰ Ko mbinndanmi on, haa yeeso Allah, ɗum gooŋga, mi fewataa.

²¹ Ɓaawoɗon mi yehi lesdi Siriya e Kilikiya.

²² Yaake man, jama'aaje nuɗɗinɓe nder Yahudiya anndaano yam.

²³ Ammaa ɓe nani ko woɗɓe mbi'i: “Toonyiiɗo en naane, jonta o ɗon waazina haala nuɗɗinki ki o yiɗno wirgugo.”

²⁴ Ɓe ɗonno teddina Allah ngam daliila am.