Gaazoowo 9 - Fulfulde Bible

¹ Mi numti e mi linyi ɗum fuu, tawmi adili'en e hikma'en e kuuɗe muuɗum'en fuu ɗon haa juŋngo Allah. Koo yiide koo nganyŋgu, neɗɗo anndaa ko woni yeeso muuɗum.

² Ko heɓata yimɓe fuu foti kal. Hoddiroore woore ɗon ukkana adiliijo e kalluɗo, booɗɗo, laaɓɗo e coɓɗo, lii'otooɗo kirseteeɗi e mo lii'ataako. Nde ɗon ukkano boo booɗɗo e hakkeejo, mo huni non boo mo hulan hunayeere.

³ Ndaa ko halli nder ko huuwa haa duniyaaru fuu: Hoddiroore woore ɗon ukkano yimɓe fuu. Ɓerɗe ɓiɓɓe Aadama keewi halleende, nginnaaku ɗon nder ɓerɗe maɓɓe saa'i ɓe ɗon ngeeɗa, ɓaawoɗon ɓe maaya.

⁴ Ammaa koo moy gonduɗo bee yeeɗɓe, woodi tammunde. Ngam rawaandu yeeru ɓuri mbarooga mbaatŋga.

⁵ Ngam yeeɗɓe anndi ɓe maayan, ammaa maayɓe anndaa koo ɗume. Mbarjaari maɓɓe timmi, yimɓe fuu ngejjiti ɓe.

⁶ Yiide maɓɓe e nganyŋgu maɓɓe e kaajal maɓɓe fuu halkidi bee maɓɓe. Haa foroy ɓe ngalaa geɗal haa ko huuwete haa duniyaaru.

⁷ Yah, nyaam nyaamdu ma bee seyo, yar inaboojam ma bee welwelo, ngam Allah yerdake kuuɗe ma timmi.

⁸ Tum ɓorna limce ɗelkanɗe, wuju yeeso ma boo bee nebbam.

⁹ Seyora gondal bee debbo ma giɗaaɗo ma nder balɗe ma meereeje fuu ɗe Allah hokki ma haa duniyaaru. Kanjum woni geɗal ma caka torraaji ngeendam ma haa duniyaaru.

¹⁰ Huuw bee semmbe ko juŋngo ma heɓi huuwugo fuu. Ngam walaa kuugal, koo numo, koo anndal, koo hikma haa joonde maayɓe haa njahata.

¹¹ Mi yi'i huunde feere fahin haa duniyaaru: Naa yaawɗotooɓe aartata foroy, naa honooɓe semmbiɗɓe njaalata foroy, naa hikma'en keɓata nguure foroy, naa marɓe faamu ndiskata foroy, naa goni'en keɓata daraja foroy, ngam naa neɗɗo suɓanta hoore mum wakkatiire woonde malla hallunde.

¹² Neɗɗo anndaa saa'i muuɗum. Bana liɗɗi naŋngaaɗi nder zubaawol gaawoowo, bana colli tuufnaaɗi bee tuuforgol, non ɓiɓɓe Aadama to wakkati sarru ukkanake ɓe bee juhuki.

Hikma ɓuri baawɗe

¹³ Mi yi'i huunde feere boo, ɗum misaalu hikma haa duniyaaru, o mari saman masin yeeso am:

¹⁴ Woodi berniwol pamarol, yimɓe nder maagol ɗuuɗaay. Laamiiɗo mawɗo hippi ngol, taari ngol, darni kuuje kipporɗe mawɗe dow maagol.

¹⁵ Ammaa woodi nder maagol gorko talakaajo, hikmaajo. Kaŋko o hisni berniwol bee hikma maako. Ammaa walaa mo siftori talakaajo oo.

¹⁶ Nden mbi'mi: Fakat, hikma ɓuri baawɗe ammaa yimɓe njawoto hikma talakaajo, ɓe nanataa bolle maako.

¹⁷ Bolle hikmaajo de'itɗe ɓuran hoolo ardiiɗo caka faataaɓe.

¹⁸ Hikma ɓuran balmi konu, ammaa hakkeejo gooto wonnan hayru ɗuuɗŋgu.