Gaazoowo 7 - Fulfulde Bible

Mbooɗirka hikma

¹ Innde woonde ɓuri ngujam caɗɗam, nyannde maayki boo ɓuri nyannde danyeeki.

² Ndikka yahugo mayiti dow yahugo juulde ngam ɗum timmoode haa yimɓe fuu, sey yeeɗɓe numta ɗum.

³ Ndikka metteeŋga dow jaleeɗe, ngam nga wonnan yeeso, ammaa nga mo'inan ɓernde.

⁴ Ɓerɗe hikma'en ɗon numa dow maayde, ammaa ɓerɗe faataaɓe ɗon numa dow seyo.

⁵ Ndikka nanugo feloore hikmaajo dow nanugo maŋgtoore faataaɓe.

⁶ Bana sonyo yiite gi'e kuɓɓaaɗe les fayannde, non jaleeɗe faataaɓe mba'i, kanjum boo, ɗum huunde meere.

⁷ Toonyaare wartiran hikmaajo paataaɗo, rusiya boo wonnan hakkiilo wooɗŋgo.

⁸ Ndikka timmoode huunde dow fuɗɗoode maare. Munyal ɓuran mawnitaare.

⁹ Taa yaawan tikkugo, ngam tikkere ɗon jooɗi haa ɓernde faataaɓe.

¹⁰ Taa ƴam: Ko waɗi nyalɗe caaliiɗe mbooɗi, ɓuri ɗe hannde? Ƴamol bana ngo'ol iwaay haa hikma.

¹¹ Hikma wooɗi bana ndonŋgu, ka nafan yeeɗɓe fuu.

¹² Ngam hikma ɗon faddo bana ceede. Hikma ɗon yeeɗina marɗo ka, kanjum woni nafuuda anndal.

¹³ Laar kuuɗe Allah. Moy waawata leltugo ko o leli?

¹⁴ To a heɓi hayru, seya. Ammaa to sarru heɓi ma, siftor Allah waɗi ɗum ɗiɗi fuu ngam taa neɗɗo annda ko tammi warango ɗum yeeso.

¹⁵ Mi yi'i kuuje ɗe'e fuu saa'i ngeendam am meereejam: Adiliijo kalkanɗo daliila adilaaku mum, kalluɗo juttinɗo balɗe mum bee halleende muuɗum.

¹⁶ Taa laata adiliijo masin, taa laata boo hikmaajo masin: Koni ngiɗɗa halkugo hoore ma?

¹⁷ Taa laata kalluɗo masin, taa laata paataaɗo boo: Koni ngiɗɗa maayugo hiddeko saa'i ma waɗa?

¹⁸ Booɗɗum a jogo wolde nde, bilaa yejjititgo boo ndeya ngam kulɗo Allah tokkoto bolle ɗiɗi ɗe'e fuu.

¹⁹ Hikma semmbiɗinan hikmaajo ko ɓuri ngomna'en sappo nder berniwol.

²⁰ Ngam haa duniyaaru, walaa adiliijo, kuuwanɗo ko fotti, mo waɗataa hakke.

²¹ Taa hakkilan bolle ɗe yimɓe ɗon mbolwa fuu, ngam taa a nana maccuɗo ma ɗon naale.

²² Ngam an boo, a anndi a naali woɗɓe nde ɗuuɗɗum.

Ɗaɓɓititki hikma

²³ Ɗum fuu, mi linyi ɗum bee hikma. Nden mi wi'i: Sey mi laato hikmaajo, ammaa ɗum salori yam.

²⁴ Ko laati fuu, salori faamu am, ɗum luggi masin! Moy heɓtata ɗum?

²⁵ Mi huucitini ɓernde am haa mi annda, mi linya, mi tefa hikma e faamu haa mi anndita halleende ɗum faataare e nginnaaku.

²⁶ Mi tawi ko ɓuri maayde haaɗugo: Ɗum debbo laatiiɗo bana ngamngam, ɓernde maako ɗum tuuforgol, juuɗe maako boo callallu. Mo Allah yerdi daɗan mo, ammaa hakkeejo daɗataa mo.

²⁷ Gaazoowo wi'i: Kanjum tawmi, mi hawti ɗum gootel gootel yaake mi ɗon haɓda faamugo.

²⁸ Mi tokkiti ɗaɓɓititgo, ammaa mi tawaay. Mi tawi gorko gooto nder ujineere, ammaa mi tawaay koo debbo gooto caka rewɓe fuu.

²⁹ Ndaa, kanjum tan tawmi: Allah tagi neɗɗo o darnuɗo, ammaa yimɓe ɗon ɗaɓɓa dabareeji leliiɗi.