Gaazoowo 6 - Fulfulde Bible

¹ Woodi sarru feere ngu ngi'mi haa duniyaaru, ngu ɗon teddana neɗɗo masin:

² Goɗɗo mo Allah hokki ɗum risku e jawdi e tedduŋgal, mo sooyataa koo ɗume ko ɓernde mum yiɗi fuu, ammaa Allah accaay mo o naftoro ɗum, jananno ɗon naftoro ɗum. Kanjum ɗum meere e boneeji naawɗi.

³ Malla goɗɗo danyi ɓiɓɓe teemerre, yeeɗi duuɓi ɗuuɗɗi, koo to o heɓi juutal balɗe, ammaa o heƴnitoraaki hayru maako, o heɓaay uweeki booɗki boo. Nden kam mi ɗon wi'a: Ɓiŋngel dufaaŋgel ɓuran mo hayru,

⁴ ngam ɓiŋngel ngel wari ngel danya haa meere, ngel dillan haa nyiɓre, nyiɓre boo suddan innde maagel.

⁵ Ngel meeɗaay yi'ugo naaŋge, ngel anndaa nge. Ngel ɓuran oya siwtaago,

⁶ koo to o yeeɗi duuɓi ujine ɗiɗi, ammaa o heɓaay hayru. Naa ɓe ɗiɗo fuu ɓe ɗon njaha nokkuure woore na?

⁷ Neɗɗo ɗon torro ngam reedu muuɗum, ammaa tum ɗum he'ataa mo.

⁸ Bee nafuuda kaye hikmaajo ɓurdata paataaɗo? Nafuuda kaye talakaajo annduɗo jooɗodaago bee yimɓe heɓata?

⁹ Ko gite ndaarata ɓuran ko ɓernde aaƴata. Kanjum boo, ɗum meere, ɗum naŋngugo henndu.

¹⁰ Ko laati fuu, heɓi innde muuɗum diga ɓooyma. En anndi boo moy woni neɗɗo, o waawataa waabotirgo bee ɓurɗo mo semmbe.

¹¹ To bolle ɗuuɗi, haalaaji meereeji boo ɗuuɗan. Kadi, ko ɗum nafi?

¹² Moy anndi ko nafata neɗɗo nder ngeendam mum ndammuɗam e meereejam? Ɗam saaloto bana ɗowdi. Malla moy waawata yeccugo neɗɗo ko laatoto haa duniyaaru ɓaawo maayde muuɗum?