Gaazoowo 4 - Fulfulde Bible

Maayde ɓuri ngeendam

¹ Fahin ndaarmi toonyaaŋgeeji caalotooɗi haa duniyaaru fuu. Toonyaaɓe ɗon mboya, ammaa walaa goɗɗo ngam de'itingo ɓe. Toonyooɓe ɓen mari baawɗe, ngam man walaa goɗɗo ngam de'itingo ɓeya.

² Mi wi'i: Barka laatani maayɓe diga naane ko ɓuri yeeɗɓe jonta.

³ Ammaa mo siwaa yeeɗugo sam, ɓuri ɓe ɗiɗo fuu. Kaŋko o meeɗaay yi'ugo kuugal kalluŋgal caalotooŋgal haa duniyaaru.

⁴ Nden mi yi'i daliila torra e goniiku neɗɗo nder kuugal mum fuu, ɗum kaajindirki. Kanjum boo ɗum meere, ɗum naŋngugo henndu.

⁵ Paataaɗo ɗon falindira juuɗe mum, o ɗon mbara hoore maako bee weelo.

⁶ Ndikka juŋngo wooto heewŋgo bee siwtaare dow juuɗe ɗiɗi keewɗe bee torra e naŋngugo henndu.

⁷ Nden mi yi'i meereejum feere haa duniyaaru:

⁸ Ndaa goɗɗo feere mum, o walaa ɓiɗɗo malla deerɗiraawo. Ammaa torra kuugal maako walaa keerol, o saftataa risku boo. Ngam moy o torroto, o haɗata ɓernde maako hayru fuu? Kanjum boo ɗum meere e suklere hallunde.

⁹ Ɗiɗo ɓuri gooto, ngam torra maɓɓe heɓan mbarjaari mboondi.

¹⁰ To gooto maɓɓe do'ake, oya ɓaŋgtan mo. Bone laatanto do'iiɗo to feere mum. Walaa ɗiɗaɓo ngam ɓaŋgtugo mo.

¹¹ Non boo waaldanɓe ɗiɗo, ɓe maatan gulɗum. Ammaa noy goɗɗo feere mum maatirta gulɗum?

¹² Teema goɗɗo jaaloto goɗɗo mo ɗon feere mum, ammaa ɗiɗo ndartanto mo. Ɓoggol baalitaaŋgol bee ɓoggi tati, ta'ataa law.

¹³ Ndikka derkeejo talakaajo hikmaajo dow laamiiɗo nayeejo paataaɗo mo anndaa sarwaago fahin,

¹⁴ koo to derkeejo oo suudu fursina wurti ngam laamaago malla boo o danyaama o talakaajo nder laamu maako.

¹⁵ Mi yi'i yeeɗɓe, waancanɓe haa duniyaaru fuu ɗon ngondi bee derkeejo mo tammi heɓugo pellel oya.

¹⁶ O ardoto yimɓe ɗuuɗɓe ɓe ngalaa limgal. Ammaa bee non fuu, waranɓe ɓaawoɗon ceyortaako mo. Kadi kanjum boo ɗum meere, ɗum naŋngugo henndu.

Faataare togaago bee jaawal

¹⁷ Hakkilan hoore ma to a ɗon yaha suudu Allah. Ɓadita ngam heɗitaago, ɗum ɓuran lii'aago kirseteeŋga faataaɓe, ngam ɓe anndaa ɓe ɗon kuuwa kalluɗum.