Gaazoowo 2 - Fulfulde Bible

¹ Mi numi: Booɗɗum! Sey mi foonda ɓernde am bee seyo, nde maata ko woni belɗum. Ammaa ndaa, kanjum boo ɗum meere.

² Mi wi'i: Jaleeɗe ɗum nginnaaku, seyo boo ko nafata?

³ Nden mi hoo'i anniya seynugo ɓanndu am bee inaboojam, ammaa ɓernde am tokkoto hikma. Mi hoo'i anniya boo tokkaago faataare, haa mi yi'a ko wooɗani ɓiɓɓe Aadama waɗugo les asama wakkati ngeendam muuɗum'en.

⁴ Mi huuwi kuuɗe mawɗe: Mi nyiɓani hoore am cuuɗi, mi jubani hoore am gese inabooje.

⁵ Mi waɗani hoore am jarne e cuuraaɗe ngam waancugo. Mi jubi ton leɗɗe dimooje feere feere.

⁶ Mi waɗani hoore am okolooje ngam yarnugo lekkon njubaakon.

⁷ Mi soodi maccuɓe e horɓe, mi marno boo jeyaaɓe danyaaɓe haa saare am. Mi marno na'i e dammooji ɗuuɗɗi ko ɓuri aartunooɓe yam nder Urusaliima fuu.

⁸ Mi mooɓtani hoore am cardi e kaŋŋeeri e ndesaaje laamiiɓe e ndesaaje taƴe lesdi. Mi heɓani hoore am yimooɓe worɓe e rewɓe, non boo ko seynata ɓiɓɓe Aadama, waato rewɓe ɗuuɗɓe.

⁹ Mi mawni ko ɓuri aartunooɓe yam nder Urusaliima fuu. Hikma am boo ɗon wondi bee am.

¹⁰ Ko fottani gite am fuu, mi heɓi ɗum, mi salanaaki ɓernde am seyo koo ngoye. Ngam ɓernde am naftori torra kuugal am, kanjum woni geɗal am haa torra kuugal am fuu.

¹¹ Nden mi numti kuuɗe ɗe juuɗe am kuuwi e torra kuugal ngal kuuwmi: Ndaa, ɗum fuu ɗum meere, ɗum naŋngugo henndu. Walaa nafuuda haa ko kuuwmi nder duniyaaru.

¹² Nden mi numti haala hikma e nginnaaku e faataare. Kadi ɗume laamotooɗo ɓaawo laamiiɗo waɗata? Ko ɓe mbaɗi diga ɓooyma!

¹³ Tawmi: Nafuuda hikma ɓuri ka faataare bana nafuuda jayŋgol ɓurdi ka nyiɓre.

¹⁴ Hikmaajo anndi toy o yahata, ammaa paataaɗo ɗon yaha nder nyiɓre. Mi anndi boo hoddiroore woore ukkanto ɗiɗo fuu.

¹⁵ Mi numi mi wi'i: Nde nii hoddiroore nde ukkanto paataaɗo, ɗon ukkano yam min boo, ko ɓurdal hikma am nafi? Ngam maajum mbi'mi: Kanjum boo ɗum meere.

¹⁶ Ngam hikmaajo e paataaɗo poti kal, walaa mo siftorta ɓe haa foroy. Nder nyalɗe garanɗe, law ɓe ngejjitan ɓe ɗiɗo fuu. Kayya, hikmaajo maayan bana paataaɗo!

¹⁷ Ngam maajum mi wanyi ngeendam. Ngam fodde numo am, ko huuwa haa duniyaaru fuu wooɗaay, ngam ɗum fuu ɗum meere e naŋngugo henndu.

¹⁸ Mi wanyi torra kuugal am ngal kuuwmi haa duniyaaru fuu, ngam doole mi accana goɗɗo garanɗo ɓaawo am ko kuuwmi.

¹⁹ Moy anndi to o laatoto hikmaajo malla paataaɗo? Alhaali boo, o maran baawɗe dow ko kuuwmi nder torra haa duniyaaru bee hikma! Kanjum boo ɗum meere.

²⁰ Ngam maajum torra kuugal ngal kuuwmi haa duniyaaru fuu nastini yam nder sooynde tammunde.

²¹ Neɗɗo torroto bee hikma e anndal e goniiku, ammaa o hokkan geɗal maako haa goɗɗo mo torraaki. Kanjum boo ɗum meere e sarru maŋngu.

²² Ɗume laatanto neɗɗo ngam torra kuugal mum ngal o sukli huuwugo haa duniyaaru fuu?

²³ Balɗe maako fuu, suklere maako waddanan mo metteeŋga e bone tan. Koo bee jemma ɓernde maako siwtataako. Kanjum boo ɗum meere.

²⁴ Walaa hayru ngam neɗɗo, sonaa nyaamugo e yarugo e seyoraago nafuuda torra mum. Mi faami, kanjum boo Allah hokkata ɗum.

²⁵ Ngam moy waawata nyaamugo e seyaago to Allah hokkaay mo ɗum?

²⁶ O hokkan neɗɗo pottananɗo mo hikma e anndal e seyo. Ammaa hakkeejo, Allah suklan ɗum bee mooɓtugo e sigaago kuuje, haa ɗum hokka ɗe pottananɗo Allah. Kanjum boo ɗum meere, ɗum naŋngugo henndu.