Gaazoowo 11 - Fulfulde Bible

No kakkilɗo huuwrata

¹ Sakkin tamseere ma dow ndiyam, ngam a tawtan nde ɓaawo nyalɗe ɗuuɗɗe.

² Hokku caahu haa yimɓe njoweeɗiɗo malla njoweetato, ngam a anndaa sarru nguye ukkanto lesdi.

³ To duule keewi iyeende, iyeende toɓan. To lekki do'ake, koo gal fombina koo gal woyla, haa ki do'i, ton ki waaloto.

⁴ Mo ɗon tiima henndu aawataa, mo ɗon tijja duule sodataa.

⁵ Bana a anndaa laawol henndu, a anndaa boo no ɓiŋngel mawnirta nder reedu debbo, non boo a anndaa kuugal Allah mo waɗata koo ɗume fuu.

⁶ Fajiri aaw aawdi ma, asiri boo taa naŋgtu juŋngo ma. Ngam a anndaa ko waŋginta nafuuda, ɗu'um na, koo ɗuma malla ɗum wooɗan ɗiɗi fuu!

⁷ Jayŋgol weli, yi'ugo naaŋge boo fottani gite.

⁸ To neɗɗo yeeɗan duuɓi ɗuuɗɗi, sey o seyoro ɗi fuu, o siftora boo, balɗe nder joonde nyiɓɓunde ɓuran ɗuuɗugo. Ko saaloto fuu, ɗum meere.

Sawari ngam sukaaku

⁹ An suka, seyora sukaaku ma. Seynu ɓernde ma wakkati sukaaku ma. Waɗ ko ɓernde ma e gite ma ngiɗi fuu. Ammaa anndu, ngam kuuje ɗe'e fuu Allah hiitete.

¹⁰ Sottin metteeŋga e ɓernde ma, daaynu sarru e ɓanndu ma ngam sukaaku e semmbe nderkaaku nduurataa.