Gaazoowo 10 - Fulfulde Bible

Faataare yahran haa halkere

¹ Buubi baatɗi kaccinan nebbam uurɗam, mbonnan ɗam. Faataare seɗɗa wonnan hikma e tedduŋgal.

² Ɓernde hikmaajo ɗon yerɓa mo gal nyaamo, ammaa ɓernde paataaɗo ɗon yerɓa mo gal nano.

³ To paataaɗo ɗon dow laawol, o wi'an koo moy o paataaɗo, nde nii o walaa hakkiilo.

⁴ To mawɗo ma tikkani ma, taa accu kuugal ma, ngam de'ere haɗan aybeeji mawɗi.

⁵ Mi yi'i sarru feere haa duniyaaru, ngu ɗon bana boofol ngol marɗo baawɗe waɗata:

⁶ Faataaɓe njo'inaama haa joole ɓurɗe teddugo, ammaa riskuɓe ɗon njooɗi haa joonde leesnde.

⁷ Mi yi'i maccuɓe ɗon mba'i pucci, ardiiɓe boo ɗon njaha bee kosɗe bana maccuɓe.

⁸ Gasanɗo ngaska do'oto nder maaka, mboodi ŋatan mo yibbinta mahol.

⁹ Ceekanɗo kaa'e, kaa'e naawnan ɗum, ceekanɗo leɗɗe boo ɗon yeeso joote.

¹⁰ To fe'irde ma ta'ataa booɗɗum e to a welnaay nde, doole a ɓesda semmbe. Ammaa hikma waddan nafuuda.

¹¹ To mboodi aarti ŋati, baawɗo fijirgo ndi heɓataa riba.

¹² Bolle gurtiiɗe hunnduko hikmaajo pottanan yimɓe. Ammaa hunnduko paataaɗo yahran mo haa halkere.

¹³ Fuɗɗam bolle maako ɗum faataare, timmoode bolle maako boo ɗum nginnaaku kalluŋgu.

¹⁴ Paataaɗo ɗuɗɗinan bolle. Neɗɗo anndaa ko tammi laataago. Walaa anndinanɗo mo ko laatoto ɓaawo maako.

¹⁵ Kuugal paataaɗo somnan mo, ngam o anndaa koo laawol yahugo berniwol.

¹⁶ Bone laatanto lesdi ndi laamiiɗo mum derkeejo, ndi ardiiɓe mum ndawanta nyaamugo.

¹⁷ Ammaa barka laatanto lesdi ndi laamiiɗo mum o tedda-asliijo, ndi ardiiɓe mum nyaamata to wakkati waɗi ngam semmbiɗingo ɓalli maɓɓe, naa ngam wuykugo.

¹⁸ Mbaateendam yollitinan tiitol suudu, juuɗe jooftiiɗe boo ciinan suudu.

¹⁹ Nyaamdu welndu hokkan seyo, inaboojam boo hokkan welwelo. Ceede hiɓɓinan koo ɗume.

²⁰ Taa naalu laamiiɗo, koo nder numooji ma. Taa naalu boo diskuɗo koo nder waaleteendu ma ngam sonndu yahran haala man, bolle ma mbaɗan bileeji.