Farillaaji Lewi'en 8 - Fulfulde Bible

Lii'eeki Haruna e ɓiɓɓe mum haa kuugal limanku

¹ Jawmiraawo wi'i Muusa:

² “Sey a yahra Haruna e ɓiɓɓe mum haa dammugal laymaaru fottirde. Waddu boo limce limanku e nebbam cenirɗam e ngaari kalhaldi kirseteendi ngam ittuki hakkeeji e jawɗi baali ɗiɗi e silaawo bee tamseeje ɗe ufnaaka.

³ Nden mooɓtu jama'aare fuu ton.”

⁴ Muusa waɗi bana Jawmiraawo umri mo. Nde jama'aare mooɓi,

⁵ o wi'i yimɓe: “Mi waɗan jonta ko Jawmiraawo umri yam.”

⁶ Muusa ɓadini Haruna e ɓiɓɓe mum, yiiwi ɓe.

⁷ O ɓorni Haruna toggoore e alkibbaare, o taadi mo taadorgol. Nden o ɓorni mo ɗancikiire, o haɓɓi nde bee taadorgol maare cannyaaŋgol.

⁸ Nden o haɓɓi jiiba wiɓɓere dow maagel, o nastini nder maaka kaa'e kur'u bi'eteeɗe uriima e tumiima.

⁹ O meeti mo meetaleewol, o waɗi fawne ceniiɗe ɗe kaŋŋeeri ɗelemndi haa yeeso maagol, bana Jawmiraawo umruno mo.

¹⁰ Nden Muusa hoo'i nebbam cenirɗam, wuji jooɗorde Jawmiraawo e ko woni nder maare fuu. Bana non o seniri ɗum.

¹¹ O wicci ɗam seɗɗa dow hirsirde, nde joweeɗiɗi, o wuji hirsirde e kuuje kuugal dow maare e daaro e jo'inirɗum maago, ngam senugo ɗum.

¹² Nden o waɗi ɗam seɗɗa dow hoore Haruna, ngam senugo mo.

¹³ Ɓaawo man o ɓadini ɓiɓɓe Haruna. O ɓorni ɓe toggooje, o taadi ɓe taadorli, o hufni ɓe kufneeje, bana Jawmiraawo umruno mo.

¹⁴ Nden Muusa waddi ngaari kalhaldi kirseteendi ngam ittuki hakkeeji. Haruna e ɓiɓɓe mum njowi juuɗe muuɗum'en dow hoore maari.

¹⁵ Muusa hirsi ndi, hoo'i ƴiiƴam maari seɗɗa, wuji ɗam bee hoondu mum haa luwe hirsirde, ngam senugo nde. O rufi ƴiiƴam luttuɗam haa les hirsirde. Bana non o laɓɓiniri nde, o seni nde.

¹⁶ Muusa hoo'i ɓellere suddunde kuuje reedu e ɓellere dow heŋre e ɓooƴe bee ɓellere wonnde dow maaje e wuli ɗum fuu dow hirsirde.

¹⁷ O hoo'i luttuɗum ngaari, laral maari e kusel maari e coowoowe maari, o wuli ɗum yaasi saŋngeere, bana Jawmiraawo umruno mo.

¹⁸ Nden Muusa waddi njawdiri mbaalu nguleteendi. Haruna e ɓiɓɓe mum njowi juuɗe muuɗum'en dow hoore maari.

¹⁹ Muusa hirsi ndi, wicci ƴiiƴam maari haa bakeeje hirsirde man nayi fuu.

^20-21 O ta'i ndi fodde geɓe maari, o looti teteki maari e kolce maari, o wuli hoore e ɓellere e geɓe maari fuu dow hirsirde, bana Jawmiraawo umruno mo. Ɗum ngulaaŋga ngam Jawmiraawo nga yiite nyaami ɗum, uureeŋgol man fottani mo.

²² Nden Muusa waddi njawdiri mbaalu ɗiɗawri, waato njawdiri ngam kalfitinki kuugal. Haruna e ɓiɓɓe mum njowi juuɗe muuɗum'en dow hoore maari.

²³ Muusa hirsi ndi, hoo'i ƴiiƴam maari seɗɗa, waɗi ɗam haa deblekeere nofru Haruna nyaamru e hoondu wordu juŋngo maako nyaamo e ndu kosŋgal maako nyaamal.

²⁴ Nden o ɓadini ɓiɓɓe Haruna, o waɗi ƴiiƴam seɗɗa haa deblekeeje noppi maɓɓe nyaami e kooli gorɗi juuɗe maɓɓe nyaame e ɗi kosɗe maɓɓe nyaame. Nden o wicci ƴiiƴam luttuɗam haa bakeeje hirsirde man nayi fuu.

²⁵ Muusa hoo'i ɓellere njawdiri e wicco e ɓellere suddunde kuuje reedu e ɓellere dow heŋre e ɓooƴe bee ɓellere wonnde dow maaje, non boo daŋngo maari nyaamo.

²⁶ O hoo'i boo diga silaawo tamseeje ɗe ufnaaka, jo'inaaɗe yeeso Jawmiraawo, tamseere nde ufnaaka woore e tamseere jiiɓaande bee nebbam woore e tamseere wettere woore, o jo'ini ɗe dow ɓellere e daŋngo man.

²⁷ O hokki ɗum fuu haa juuɗe Haruna e ɓiɓɓe mum, ɓe ɓaŋgta dokke ɗe'e, ɓe lii'o ɗe yeeso Jawmiraawo.

²⁸ Nden Muusa hoo'i ɗum fahin, wuli ɗum dow hirsirde, haa dow ngulaaŋga go. Kanjum woni kirsaaŋga ngam kalfitinki kuugal. Ɗum ngulaaŋga ngam Jawmiraawo, uureeŋgol maaga belŋgol fottani mo.

²⁹ Nden Muusa hoo'i biiwol njawdiri, ɓaŋgti ngol, lii'i ngol yeeso Jawmiraawo. Ngol laati geɗal Muusa haa njawdiri kalfitinki kuugal. Muusa waɗi koo ɗume fuu bana Jawmiraawo umruno mo.

³⁰ Ɓaawo man Muusa hoo'i nebbam cenirɗam e ƴiiƴam ngonɗam dow hirsirde. O wicci ɗam dow Haruna e limce mum, non boo dow ɓiɓɓe Haruna e limce muuɗum'en. Bana non o seniri ɓe, kamɓe e limce maɓɓe.

³¹ Muusa wi'i Haruna e ɓiɓɓe mum: “Ndefe kusel nge'el haa dammugal laymaaru fottirde. Nyaame ngel ton hawtaade bee tamseeje gonɗe nder silaawo dokke ngam kalfitinki kuugal mon, bana umrumi on.

³² Luttuɗum kusel e tamseeje, ngule ɗum bee yiite.

³³ Taa cotte haa dammugal laymaaru fottirde nyalɗe joweeɗiɗi, sey to nyalɗe kalfitinki kuugal mon timmi. Ngam sey kalfitinki kuugal mon waɗa nyalɗe joweeɗiɗi.

³⁴ Jawmiraawo umri en waɗugo ko en mbaɗi hannde, ngam ittuki hakkeeji mon.

³⁵ Njooɗe ton haa dammugal laymaaru fottirde nyalɗe joweeɗiɗi, jemma bee naaŋge fuu. Njaggane Jawmiraawo, ngam taa on maaya. Bana non Jawmiraawo umri yam.”

³⁶ Haruna e ɓiɓɓe mum mbaɗi koo ɗume ko Jawmiraawo umri bee hunnduko Muusa.