Farillaaji Lewi'en 5 - Fulfulde Bible

Daliilaaji kirseteeɗi ngam ittuki hakkeeji

¹ “Ndaa daliilaaji ɗi goɗɗo lii'oto kirseteeɗi ngam ittuki hakkeeji: To goɗɗo ɗon yeeso kiita, o nani o naaleteeɗo sonaa o waŋgina ko o yi'i malla ko o nani, ammaa o waŋginaay ɗum, nden kam ɗum aybe dow maako.

² To goɗɗo hakkilaay, meemi coɓɗum koo ɗume, bana caaɗŋgu huunde ladde malla caaɗŋgu ndabbaawa saare malla caaɗŋgu ladoojum, o laatoto coɓɗo, ɗum aybe dow maako.

³ To goɗɗo hakkilaay, meemi coɓɗum koo ɗume haa neɗɗo, saa'i o anndi ɗum, ɗum laatoto aybe dow maako.

⁴ To goɗɗo hakkilaay, yaawi, hunake hunayeere o waɗan booɗɗum malla kalluɗum, saa'i o faamti ɗum, ɗum laatoto aybe dow maako.

⁵ To goɗɗo laatake aybuɗo nder kuuje ɗe'e, sey o waŋgina hakke maako,

⁶ o waddana Jawmiraawo mbaalu malla mbeewa kirseteeɗum ngam ittuki hakke maako. Limanjo lii'o kirseteeɗum man ngam ittugo hakke goɗɗo oo.

⁷ To goɗɗo waawaay heɓugo ɗum, nden kam o waddana Jawmiraawo pooli masar ɗiɗi malla pooloy ɗiɗoy, gootel kirseteeŋgel ngam ittuki hakke, gootel boo guleteeŋgel.

⁸ Sey o hokka ɗi limanjo. Limanjo aarta lii'aago poola kirseteeŋga ngam ittuki hakke. O yewa daande maaga, ammaa taa o itta hoore maaga.

⁹ O wicca ƴiiƴam maaga seɗɗa haa wuttudu hirsirde, o ɓiɗɗa ƴiiƴam luttuɗam haa les maare. Kanjum woni kirseteeŋga ngam ittuki hakke.

¹⁰ Nden limanjo lii'o poola feere nguleteeŋga, fodde umroore. Bana nii limanjo lii'orto kirsaaŋga ngam ittuki hakke goɗɗo go, kaŋko boo o heɓan yaafuye.

¹¹ To goɗɗo waawaay heɓugo pooli masar ɗiɗi malla pooloy ɗiɗoy, nden kam o wadda kuroori ɗiggundi kilo tati, ɗum dokkal ngam ittuki hakke. Taa o waɗa nebbam dow maari, taa o ɓesda uurle boo, ɗum dokkal ngam ittuki hakke, naa dokkal nyaamdu.

¹² O yahra kuroori man haa limanjo. Kaŋko o hoo'a haa maari geɗal ciftinorgal, deydey tamndande, o wula ɗum dow hirsirde, hawtaade bee guleteeɗi ngam Jawmiraawo. Kanjum woni dokkal ngam ittuki hakke.

¹³ Bana nii limanjo lii'orto dokkal ngam daliila hakke goɗɗo go, kaŋko boo o heɓan yaafuye. Kuroori luttundi laatanto liman'en, bana dokke nyaamdu boo.”

Kirseteeɗi ngam joɓki aybeeji

¹⁴ Jawmiraawo wi'i Muusa:

¹⁵ “To goɗɗo yewi umroore Allah, waɗi hakke bilaa anniya ngam o hokkaay Jawmiraawo ko woodani ɗum, sey o waddana Jawmiraawo njawdiri mbaalu ndi walaa aybe, ndi kirseteendi ngam joɓki aybe maako. Saman maari fota bee ceede cardi fodde etirgal suudu seniindu.

¹⁶ Kadiboo o yoɓa ko o hokkaayno, o ɓesda dow maajum yeɓre woore nder geɓe jowi boo. O hokka ɗum fuu limanjo. Limanjo lii'o njawdiri kirseteendi ngam joɓki aybe goɗɗo go, kaŋko boo o heɓan yaafuye.

¹⁷ To goɗɗo hakkilaay, luuti umroore Jawmiraawo koo ndeyeere, ɗum aybe dow maako.

¹⁸ Sey o yahrana limanjo njawdiri mbaalu ndi walaa aybe, ndi kirseteendi ngam joɓki aybe maako. Saman maari fota deydey no a ta'ata. Limanjo lii'o kirseteendi man ngam daliila aybe ko goɗɗo waɗi bilaa anniya go, kaŋko boo o heɓan yaafuye.

¹⁹ Kanjum woni kirseteeŋga ngam joɓki aybe, ngam o waɗi aybe dow Jawmiraawo fakat.”

²⁰ Jawmiraawo ɓesdi wi'ugo Muusa:

²¹ “Ndaa daliilaaji ɗi goɗɗo lii'oto kirseteeŋga ngam joɓki aybe: To goɗɗo waɗi hakke, yewi umroore Jawmiraawo, ngam o sali hokkititgo ko keeddiɗɗiraawo maako sigi haa maako malla ko o hooci haa keeddiɗɗiiko malla ko o wujji malla ko o jaɓti mo bee doole

²² malla o tawi huunde majjunoonde, o fewi dow maajum, o hunake dow fewre, o wi'i o tawaay ɗum malla o hunake dow fewre ngam suuɗugo aybewol koo ngole irin maajum,

^23-24 to goɗɗo waɗi hakkeeji irin ɗi'i, sey o yoɓa koo ɗume ko o heɓi bee rikici maako. Nyalaade nde o lii'oto kirseteeŋga joɓki aybe maako, sey o hokkita ɗum jawmiijum, o ɓesda dow maajum yeɓre woore nder geɓe jowi boo.

²⁵ Sey o waddana Jawmiraawo njawdiri mbaalu ndi walaa aybe, ndi kirseteendi ngam joɓki aybe maako. Saman maari fota deydey no a ta'ata.

²⁶ Limanjo lii'ano ndi Jawmiraawo kirseteendi. Goɗɗo go heɓan yaafuye aybeeji mum ɗi o waɗi fuu.”