Farillaaji Lewi'en 4 - Fulfulde Bible

Kirseteeɗi ngam ittuki hakkeeji

¹ Jawmiraawo umri Muusa,

² o wi'a Isra'iila'en ni'i: “Ndaa ko mbaɗoton to goɗɗo waɗi hakke, luuti umroore Jawmiraawo koo ndeyeere bilaa anniya:

³ To hooreejo liman'en waɗi hakke, hakke man ɗon dow ummaatoore fuu. Sey o wadda ngaari kalhaldi ndi walaa aybe, o lii'ano ndi Jawmiraawo kirseteendi ngam ittuki hakke maako.

⁴ Sey o yahra ngaari man haa dammugal laymaaru fottirde, o yowa juŋngo maako dow hoore maari, o hirsa ndi ton yeeso Jawmiraawo.

⁵ Nden o hoo'a ƴiiƴam maari, o nastina ɗam nder laymaaru.

⁶ O suuwa hoondu maako nder maajam, o wicca ɗam nde joweeɗiɗi yeeso Jawmiraawo haa wiirndallo nder suudu seniindu.

⁷ Nden o waɗa ƴiiƴam seɗɗa haa luwe gulduɗum uureteeɗum dariiɗum yeeso Jawmiraawo nder laymaaru fottirde. Ƴiiƴam luttuɗam fuu, o rufa ɗam haa les hirsirde wonnde yeeso dammugal laymaaru man.

⁸ Sey o hoo'a ɓellere ngaari kirsaandi fuu, waato ɓellere suddunde kuuje reedu e ɓellere wonnde dow teteki fuu

⁹ e ɓooƴe bee ɓellere wonnde dow maaje e ɓellere dow heŋre.

¹⁰ Bana o waarata bee ɓellere ngaari kirseteendi ngam kawtal yimɓe bee Allah, bana non o ittira ɓellere man, o wula nde dow hirsirde.

¹¹ Ammaa laral ngaari e kusel maari fuu e hoore maari e kolce maari e teteki maari bee coowoowe,

¹² sey o yahra ɗum fuu yaasi saŋngeere haa nokkuure senaande nde ɓe ndufata ndoondi kirsaaɗi, o wula ɗum ton.

¹³ To yimɓe jama'aare Isra'iila fuu mbaɗi hakke bilaa anniya, mooɓre maɓɓe anndaa ɓe mbaɗi aybe bee waɗugo ko Jawmiraawo haɗi.

¹⁴ To hakke man waŋgi, sey jama'aare wadda ngaari kalhaldi kirseteendi ngam ittuki hakkeeji. Ɓe njahra ndi yeeso laymaaru fottirde.

¹⁵ Ndotti'en jama'aare njowa juuɗe muuɗum'en dow hoore maari, ɓe kirsa ndi ton yeeso Jawmiraawo.

¹⁶ Hooreejo liman'en hoo'a ƴiiƴam maari, nastina ɗam nder laymaaru.

¹⁷ O suuwa hoondu maako nder maajam, o wicca ɗam nde joweeɗiɗi haa wiirndallo.

¹⁸ Nden o waɗa ƴiiƴam seɗɗa haa luwe gulduɗum uurle dariiɗum yeeso Jawmiraawo nder laymaaru fottirde. Ƴiiƴam luttuɗam fuu, o rufa ɗam haa les hirsirde wonnde yeeso dammugal laymaaru.

¹⁹ Nden o hoo'a ɓellere ngaari man fuu, o wula nde dow hirsirde.

²⁰ Sey o waɗa ngaari ndi'i bana o waarata ngaari kirseteendi ngam ittuki hakkeeji go. Bana nii limanjo waarata ngam ittuki hakkeeji yimɓe, ɓe keɓan yaafuye boo.

²¹ Nden o yahra ngaari man yaasi saŋngeere, o wula ndi, bana o wuldata ngaari kirsaandi ngam hakkeeji maako. Kanjum woni kirseteeŋga ngam ittuki hakkeeji jama'aare Isra'iila.

²² To ardiiɗo waɗi hakke, to aybe ɗon dow maako ngam o luuti umroore Jawmiraawo koo ndeyeere bilaa anniya,

²³ to goɗɗo feere waŋginani mo aybe man, sey o lii'o njawdiri mbeewa ndi walaa aybe.

²⁴ O yowa juŋngo maako dow hoore maari, o hirsa ndi haa wakeere hirsirde woylaare, haa nokkuure nde ɓe kirsata guleteeɗi. Kanjum woni kirseteeŋga ngam ittuki hakkeeji.

²⁵ Limanjo suuwa hoondu mum nder ƴiiƴam kirsaaŋga, waɗa ɗam haa luwe hirsirde. Nden o rufa ƴiiƴam luttuɗam haa les maare.

²⁶ O wula ɓellere njawdiri fuu dow hirsirde, bana no o waarata bee ɓellere kirseteeɗi ngam kawtal yimɓe bee Allah. Bana nii limanjo lii'orto kirsaaŋga ngam ittuki hakkeeji ardiiɗo, kaŋko boo o heɓan yaafuye.

²⁷ To goɗɗo nder ummaatoore waɗi hakke, to aybe ɗon haa maako ngam o ƴaɓɓi umroore Jawmiraawo koo ndeyeere bilaa anniya,

²⁸ to goɗɗo feere waŋginani mo aybe man, sey o lii'o mbeewa nga walaa aybe.

²⁹ O yowa juŋngo maako dow hoore maaga, o hirsa nga haa wakeere hirsirde woylaare, haa nokkuure nde ɓe kirsata guleteeɗi.

³⁰ Limanjo suuwa hoondu mum nder ƴiiƴam kirsaaŋga, waɗa ɗam haa luwe hirsirde. Nden o rufa ƴiiƴam luttuɗam haa les maare.

³¹ O hoo'a ɓellere mbeewa fuu, bana no o waarata ɓellere kirseteeɗi ngam kawtal yimɓe bee Allah, o wula nde dow hirsirde. Uureeŋgol man belŋgol fottanan Jawmiraawo. Bana nii limanjo lii'orto kirsaaŋga ngam ittuki hakkeeji goɗɗo go, kaŋko boo o heɓan yaafuye.

³² To goɗɗo yiɗi lii'aago mbaalu kirseteeŋgu ngam ittuki hakkeeji, sey o wadda ndewu ngu walaa aybe.

³³ O yowa juŋngo maako dow hoore maagu, o hirsa ngu haa wakeere hirsirde woylaare, haa nokkuure nde ɓe kirsata guleteeɗi.

³⁴ Limanjo suuwa hoondu mum nder ƴiiƴam kirsaaŋga, waɗa ɗam haa luwe hirsirde. Nden o rufa ƴiiƴam luttuɗam haa les maare.

³⁵ O hoo'a ɓellere mbaalu fuu, bana no o waarata ɓellere baali kirseteeɗi ngam kawtal yimɓe bee Allah, o wula nde dow hirsirde hawtaade bee guleteeɗi ngam Jawmiraawo. Bana nii limanjo lii'orto kirsaaŋga ngam ittuki hakkeeji goɗɗo go, kaŋko boo o heɓan yaafuye.”