Farillaaji Lewi'en 3 - Fulfulde Bible

Kirseteeɗi ngam kawtal yimɓe bee Allah

¹ “To goɗɗo yiɗi lii'aago kirseteeŋga ngam kawtal yimɓe bee Allah, sey o hoo'a ngaari ndi walaa aybe malla nagge nge walaa aybe.

² Sey o yowa juŋngo maako dow hoore ndabbaawa man, o hirsa nga haa dammugal laymaaru fottirde. Liman'en danygol Haruna mbicca ƴiiƴam maaga haa bakeeje hirsirde man nayi fuu.

³ Nden ɓe lii'ano Jawmiraawo geɗal guleteeŋgal haa kirsaaŋga ngam kawtal yimɓe bee Allah: Ɓellere suddunde kuuje reedu e ɓellere wonnde dow teteki fuu

⁴ e ɓooƴe bee ɓellere wonnde dow maaje e ɓellere dow heŋre.

⁵ Liman'en ngula ɗum nder yiite hirsirde, hawtaade bee guleteeɗi. Uureeŋgol man belŋgol fottanan Jawmiraawo.

⁶ To goɗɗo yiɗi lii'anaago Jawmiraawo ndammoowa ngam kawtal yimɓe bee Allah, sey o hoo'a ngorga malla ndewa, nga walaa aybe.

⁷ To mbaalu woni dokkal maako, sey o yahra ngu yeeso Jawmiraawo.

⁸ O yowa juŋngo maako dow hoore maagu, o hirsa ngu haa dammugal laymaaru fottirde. Liman'en danygol Haruna mbicca ƴiiƴam maagu haa bakeeje hirsirde nayi fuu.

⁹ Nden ɓe lii'ano Jawmiraawo geɗal guleteeŋgal haa kirsaaŋga ngam kawtal yimɓe bee Allah: Waato ɓellere e wicco ta'aaŋgo haa seŋgorde e ɓellere suddunde kuuje reedu e ɓellere wonnde dow teteki fuu

¹⁰ e ɓooƴe bee ɓellere wonnde dow maaje e ɓellere dow heŋre.

¹¹ Limanjo wula ɗum fuu dow hirsirde, ɗum nyaamdu wuleteendu ngam Jawmiraawo.

¹² To dokkal maako woni mbeewa, sey o yahra nga yeeso Jawmiraawo,

¹³ o wallina juŋngo maako dow hoore maaga, o hirsa nga haa dammugal laymaaru fottirde. Liman'en danygol Haruna mbicca ƴiiƴam maaga haa bakeeje hirsirde nayi fuu.

¹⁴ Nden ɓe lii'ano Jawmiraawo geɗal kirsaaŋga man guleteeŋgal, waato ɓellere suddunde kuuje reedu e ɓellere wonnde dow teteki fuu

¹⁵ e ɓooƴe bee ɓellere wonnde dow maaje e ɓellere dow heŋre.

¹⁶ Limanjo wula ɗum fuu dow hirsirde, ɗum nyaamdu wuleteendu ngam Jawmiraawo, uureeŋgol man belŋgol fottanan mo. Ɓellere fuu Jawmiraawo jeyi.

¹⁷ Taa on nyaama ɓellere e ƴiiƴam sam. Koo toy njooɗoton fuu, ɗum laati farilla nduumiika haa gide mon fuu.”