Farillaaji Lewi'en 27 - Fulfulde Bible

Joɓki togayeeje

¹ Jawmiraawo umri Muusa,

² o wi'a Isra'iila'en ni'i: “To goɗɗo toganake Jawmiraawo hokkugo mo neɗɗo, o waawan soottugo neɗɗo man bee coottaari deydey saman ka a ta'ata,

^3-7 fodde teddeeŋga ceede suudu seniindu: Ngam gorko mo duuɓi noogas haa yotto cappanɗe joweego: Ceede cardi cappanɗe jowi, ngam debbo: Ceede cardi cappanɗe tati, ngam derkeejo gorko mo duuɓi jowi haa yotto noogas: Ceede cardi noogas, ngam derkeejo debbo: Ceede cardi sappo, ngam ɓiŋngel gorgel ngel waɗaay duuɓi jowi tawon: Ceede cardi jowi, ngam ɓiŋngel deyel: Ceede cardi tati, ngam nayeejo gorko mo ɓuri duuɓi cappanɗe joweego: Ceede cardi sappo e jowi, ngam puldebbo: Ceede cardi sappo.

⁸ To togiiɗo o talakaajo mo waawaay yoɓugo coottaari man, sey o yahra neɗɗo go yeeso limanjo. Limanjo boo usta coottaari deydey ko togiiɗo waawi yoɓugo fodde saman ta'aaɗum.

⁹ To togayeere laatake dow ndabbaawa potanŋga hokkeego Jawmiraawo, nden kam dokkal ngal goɗɗo hokki Jawmiraawo fuu, ɗum cenaaɗum.

¹⁰ Togiiɗo sannjataa nga bee ndabbaawa ngoɗŋga, o hokkataa kalluŋga mbattudi mbooɗŋga malla mbooɗŋga mbattudi kalluŋga. To o waɗi ɗum, ɗiɗi fuu laatanto Jawmiraawo.

¹¹ Ammaa to togayeere laatake dow ndabbaawa coɓŋga nga fotaay lii'aneego Jawmiraawo, sey o yahra nga haa limanjo.

¹² Limanjo ta'a saman maaga fodde wooɗugo maaga malla aybeeji maaga, saman man tabiti.

¹³ To goɗɗo yiɗi soottugo nga, sey o ɓesda yeɓre woore nder geɓe jowi dow saman darnaaɗum.

¹⁴ To togayeere laatake dow suudu, sey limanjo laara ko wooɗi haa maaru, ko wooɗaay boo. Nden o ta'a saman maaru, saman man tabiti.

¹⁵ To togiiɗo suudu yiɗi soottugo ndu, o ɓesda yeɓre woore nder geɓe jowi dow saman darnaaɗum, o marta suudu maako.

¹⁶ To togayeere laatake dow tayre ngesa haa maral maako, sey on darna saman maaka fodde ɗuuɗeeŋga aawdi aaweteendi nder maaka: Ceede cardi cappanɗe jowi ngam buhuure sa'iiruuri fuu.

¹⁷ To o togake ngesa man nder nduuɓu ɓaawo hitaande dimɗineeki, saman darnaaɗum tabiti.

¹⁸ Ammaa to o togake wakkati feere, waato ɓaawo hitaande dimɗineeki, sey limanjo ta'a saman maaka fodde limgal duuɓi luttanɗi hitaande dimɗineeki yaalugo, o usta saman maaka bana non.

¹⁹ To togiiɗo ka yiɗi soottugo ka, o ɓesda yeɓre woore nder geɓe jowi dow saman darnaaɗum, nden o marta ka.

²⁰ To o soottaay ka, ammaa o soorri ka goɗɗo feere, nden kam o heɓataa soottugo ka sam.

²¹ To hitaande dimɗineeki yaalti, ngesa man laatoto maral Jawmiraawo, bana kuuje lii'anaaɗe Jawmiraawo haa foroy. Ka laatanto liman'en.

²² To goɗɗo soodi ngesa, toganake ka Jawmiraawo,

²³ sey limanjo ta'a saman maaka fodde limgal duuɓi luttanɗi hitaande dimɗineeki yaaltugo. Sey o yoɓa saman man nyalaade man, ceede ɗe'e Jawmiraawo jeyi.

²⁴ Nder hitaande dimɗineeki, marnooɗo ngesa malla danygol mum heɓtan ka.

²⁵ Sey saman fuu ta'e fodde etirgal suudu seniindu, suleyje teemerre fuu waɗan baakin kilo gootel.

²⁶ Goɗɗo togantaako Jawmiraawo afi dabbaaji mum, ngam Jawmiraawo mari ɗi fodde umroore mum. To ɗum ɓii nagge malla ɓii ndammoowa, Jawmiraawo mari ɗum.

²⁷ Ammaa to on ngiɗi, on coottan afi dabbaaji karminaaɗi, on njoɓa saman ta'aaɗo, on ɓesda dow maajum yeɓre woore nder geɓe jowi boo. To on coottaay ɗi, limanjo fotan soorrugo ɗi fodde saman ta'aaɗo.

²⁸ Ko goɗɗo lii'ani Jawmiraawo haa foroy fuu, koo neɗɗo koo ndabbaawa koo ngesa maral maako, o fotaay soorrugo ɗum malla soottugo ɗum. Lii'aaɗum ɗu'um fuu laati ɓurɗum senaago, ɗum laatake maral Jawmiraawo.

²⁹ Neɗɗo lii'anaaɗo Jawmiraawo boo soottataake, o mbareteeɗo fakat.

³⁰ Zakka ƴaamle gese e ɓiɓɓe leɗɗe fuu, Jawmiraawo jeyi, ɗum cenaaɗum ngam maako.

³¹ To goɗɗo yiɗi soottugo ɗum, sey o yoɓa saman maajum, o ɓesda dow maajum yeɓre woore nder geɓe jowi boo.

³² Nder dabbaaji saare sappo fuu, sappoowa man Jawmiraawo jeyi, nga cenaaŋga ngam maako.

³³ Taa jawmiiji senndindira booɗɗi bee ɗi mbooɗaay, taa o sannja ɗi boo. To o sannji ngoɗŋga bee ngoɗŋga, ɗiɗi fuu laatoto cenaaɗi ngam Jawmiraawo. Jawmiiji fotaay soottugo ɗi.”

³⁴ Kanjum woni umrooje ɗe Jawmiraawo umri Muusa dow hooseere Sina ngam Isra'iila'en.