Farillaaji Lewi'en 24 - Fulfulde Bible

Umroore dow pittirlaaji

¹ Jawmiraawo wi'i Muusa:

² “A umra Isra'iila'en ɓe ngaddane nebbam jaytunje arɓaaɗe laaɓɗam ngam jayŋgol pittirlaaji, ngam ɗi njamne foroy.

³ Haruna jo'ina jo'inirɗum pittirlaaji yaasi wiirndallo seedamku nder laymaaru fottirde, haa gaa'e wiirndallo wiirnanŋgo sundukru alkawal. Pittirlaaji kuɓɓa yeeso am diga kiikiiɗe haa fajiri. Ɗo woni farilla nduumiika ngam gide mon fuu.

⁴ Haruna hakkilana pittirlaaji dow jo'inirɗum maaji baaraaɗum bee kaŋŋeeri laaɓndi, ngam ɗi njayna yeeso Jawmiraawo foroy.”

⁵ Jawmiraawo umri Muusa o hoo'a kuroori ɗiggundi, o tamsa tamseeje sappo e ɗiɗi, tamseere koo ndeyeere tamse bee kuroori kilo joweego joweego.

⁶ Nden o wallina ɗe jabbi ɗiɗi, joweego joweego dow taabal cuddaaŋgal bee kaŋŋeeri laaɓndi, dariiŋgal yeeso Jawmiraawo.

⁷ O rufa uurle laaɓɗe dow jabbi tamseeje, ɗum laato geɗal ciftinorgal guleteeŋgal ngam Jawmiraawo mbattudi maaje.

⁸ Sey limanjo jo'ina tamseeje bana ɗe'e yeeso Jawmiraawo nyannde siwtorde fuu. Kanjum laatani Isra'iila'en alkawal duumiiŋgal bee Jawmiraawo.

⁹ Tamseeje ɗe'e laatanto Haruna e danygol mum, ɓe nyaama ɗe haa nokkuure seniinde, ngam ɗe geɗal ɓurŋgal senaago haa dokke nyaamdu ɗe Isra'iila'en lii'anto Jawmiraawo ngam liman'en. Ɗum farilla nduumiika.

Misaalu kiita ngooŋɗuka

^10-11 Woodi goɗɗo mo daada mum Isra'iilaajo, ammaa baaba mum Misraajo. Innde daada maako, Selomit ɓii Dibiri mo lenyol Dan. Goɗɗo oo yehi nder saŋngeere caka Isra'iila'en, fuɗɗi jokkirgol bee Isra'iilaajo. Nder jokkirgol maɓɓe, o huɗi Allah. Yimɓe naŋngi mo, njahri mo haa Muusa.

¹² Muusa umri ɓe ayna mo, sey to Jawmiraawo yecci ɓe ko ɓe mbaɗata mo.

¹³ Jawmiraawo wi'i Muusa:

¹⁴ “Wurtin mo yaasi saŋngeere. Koo moy nanɗo kuudi maako, yowa juuɗe mum dow hoore maako ngam seedamku aybe maako. Nden jama'aare fuu fiɗa mo bee kaa'e haa o maaya.

¹⁵ Ɓaawo man wi' Isra'iila'en: Koo moy huɗi Allah, sey efta aybe mum.

¹⁶ O mbareteeɗo fakat. Koo moy Isra'iilaajo malla jananno nder Isra'iila mo huɗi Allah, sey jama'aare fuu fiɗa mo bee kaa'e haa o maaya.

¹⁷ Koo moy mbari goɗɗo, o mbareteeɗo fakat.

¹⁸ Koo moy mbari ndabbaawa goɗɗo, sey hokka mo ndabbaawa bana maaga. O yoɓa yoŋki bee yoŋki.

¹⁹ To goɗɗo waɗi sarru haa ɓanndu keeddiɗɗum, sey yimɓe mbaɗa mo bana o waari bee hoore maako:

²⁰ Yewre i'al bee yewre i'al, yiitere bee yiitere, nyiindere bee nyiindere. Fodde ko o sarri goɗɗo, nonnon yimɓe mbaɗanta mo.

²¹ Koo moy mbari ndabbaawa, sey hokka ndabbaawa ngoɗŋga mbattudi maaga. Ammaa koo moy mbari goɗɗo, o mbareteeɗo.

²² Umroore woore laatanto on, onon Isra'iila'en e hoɗɓe wonɓe caka mooɗon. Min woni Jawmiraawo Allah mon.”

²³ Muusa wi'i ɗum Isra'iila'en. Ɓe njahri kuɗɗo Allah go yaasi saŋngeere, ɓe piɗi mo bee kaa'e haa o maayi. Bana non ɓe mbaari ko Jawmiraawo umruno Muusa.