Farillaaji Lewi'en 17 - Fulfulde Bible

Umroore dow ƴiiƴam

¹ Jawmiraawo umri Muusa:

² “Yeccu Haruna e ɓiɓɓe mum e Isra'iila'en ndaa ko Jawmiraawo umri on:

³ To Isra'iilaajo hirsi nagge malla mbaalu malla mbeewa, nder saŋngeere malla yaasi maare,

⁴ ammaa o waddaay ɗum haa dammugal laymaaru fottirde ngam o lii'ano ɗum Jawmiraawo yeeso jooɗorde mum, nden kam ɗum laatoto aybe ƴiiƴam dow maako. O rufi ƴiiƴam, ngam man o gurtinteeɗo diga jama'aare maako.

⁵ Isra'iila'en mboowi hirsugo dabbaaji muuɗum'en haa ladde. Ammaa jonta ɓe ngadda ɗi haa limanjo haa dammugal laymaaru fottirde, ɓe lii'o ɗi ton kirseteeɗi ngam kawtal yimɓe bee Allah.

⁶ Limanjo wicca ƴiiƴam maaji haa hirsirde Jawmiraawo yeeso dammugal laymaaru. O wula ɓellere maaji, haa uureeŋgol man belŋgol fottana Jawmiraawo.

⁷ Taa Isra'iila'en tokko zammboraago Jawmiraawo bee hirsugo dabbaaji muuɗum'en haa ladde ngam labbi nannduɗi bee be'i ɗi ɓe ndewata. Ɗum laatano ɓe farilla nduumiika haa gide maɓɓe fuu.

⁸ To Isra'iilaajo malla jananno nder Isra'iila mo yiɗi lii'aago nguleteeŋga malla kirseteeŋga feere,

⁹ ammaa o waddaay nga haa dammugal laymaaru fottirde ngam o lii'ano nga Jawmiraawo, o gurtinteeɗo diga jama'aare maako.

¹⁰ To Isra'iilaajo malla jananno nder Isra'iila nyaami kusel ngel ƴiiƴam mum rufaaka, Jawmiraawo honan mo, nattinan mo caka lenyol maako.

¹¹ Yoŋki marɗum ɓanndu fuu ɗon nder ƴiiƴam. Ngam man Jawmiraawo umri on on ndufa ƴiiƴam fuu haa hirsirde ngam ittuki hakkeeji yimɓe.

¹² Ngam man o wi'i Isra'iila'en e hoɗɓe wonɓe caka maɓɓe, taa ɓe nyaama ƴiiƴam sam.

¹³ To Isra'iilaajo malla jananno nder Isra'iila mbari ndabbaawa ladde nyaameteeŋga malla sonndu nyaameteendu, sey o rufa ƴiiƴam man fuu haa lesdi, o sudda ɗam bee mbulwuldi.

¹⁴ Ngam marɗum ɓanndu fuu, ƴiiƴam woni yoŋki mum. Ngam man Jawmiraawo umri Isra'iila'en taa ɓe nyaama kusel ngel ƴiiƴam mum rufaaka. Koo moy nyaami ɗam, o gurtinteeɗo diga jama'aare maako.

¹⁵ Koo moy Isra'iilaajo malla jananno nder Isra'iila nyaamɗo kusel ndabbaawa mbaatŋga malla nga huunde ladde faɗɗi ɗum, sey loota limce mum, yiiwo. O nyallan o coɓɗo.

¹⁶ To o lootaay limce maako, o yiiwaaki boo, nden kam o kiiteteeɗo.”