Farillaaji Lewi'en 14 - Fulfulde Bible

Kirseteeɗi ngam daliila caɗawe

¹ Jawmiraawo wi'i Muusa:

² “Ndaa umroore laɓɓinki goɗɗo mo saɗawre mum yamɗiti. Nyannde laɓɓineeki maako ɓe njahra mo haa limanjo.

³ O wurtina mo yaasi saŋngeere, o laara ɓanndu maako. To o yi'i nyawu maako yamɗiti,

⁴ sey o umra ɓe ngadda colli dagiiɗi geeti ɗiɗi ngam daliila laɓɓinteeɗo, hawtaade bee tayre leggal cemmbiɗŋgal e gaaraaji boɗeeji coy e haako isop.

⁵ Nden limanjo umra hirsugo sonndu wooru dow fayannde loope heewnde ndiyam seeɓoore.

⁶ Nden o hoo'a sonndu yeeru e leggal e leppel boɗeeyel coy e haako isop, o suuwa ɗum nder ƴiiƴam sonndu hirsaandu dow ndiyam seeɓoore go.

⁷ O wicca ƴiiƴam man nde joweeɗiɗi dow laɓɓinteeɗo e nyawu mum, o seedo mo o laaɓɗo. Nden o yoofa sonndu yeeru, ndu fiira haa ladde.

⁸ Laɓɓinteeɗo loota limce mum, laɓa gaasa mum fuu, yiiwo. Bana nii o laaɓrata. O heɓan nastugo saŋngeere, ammaa sey o jooɗo yaasi laymaaru maako nyalɗe joweeɗiɗi.

⁹ Nyannde joweeɗiɗawre o laɓa fahin, gaasa hoore e wakkude e tiimeelooji e gaasa ngoɗka fuu, o loota limce maako, o yiiwo. Nden kam o laaɓɗo.

¹⁰ Nyannde joweetataɓre o hoo'a njawkoy ɗiɗoy e bortel ngel nduuɓu, ɗum fuu ɗum walaa aybe e kuroori ɗiggundi kilo joweenayi njiiɓaandi bee nebbam ngam dokkal nyaamdu e reeta liitir nebbam.

¹¹ Limanjo laɓɓinanɗo yahra laɓɓinteeɗo e dokke ɗe'e fuu yeeso Jawmiraawo haa dammugal laymaaru fottirde.

¹² Nden o hoo'a jawgel gootel, o lii'ano ngel Jawmiraawo kirseteeŋgel ngam joɓki aybe, hawtaade bee reeta liitir nebbam go. O ɓaŋgta ɗum yeeso Jawmiraawo.

¹³ Sey o hirsa ngel haa nokkuure seniinde nde ɓe kirsata kirseteeɗi ngam ittuki hakke e guleteeɗi boo. Kirseteeŋga ngam joɓki aybe laatanto limanjo, bana kirseteeŋga ngam ittuki hakke boo, nga ɓurŋga senaago.

¹⁴ Limanjo hoo'a ƴiiƴam jawgel go seɗɗa, waɗa ɗam haa deblekeere nofru laɓɓinteeɗo nyaamru e hoondu wordu juŋngo maako nyaamo e ndu kosŋgal maako nyaamal.

¹⁵ Nden limanjo loowa nebbam seɗɗa nder newre muuɗum nannde,

¹⁶ suuwa hoondu juŋngo mum nyaamo nder maajam, wicca ɗam nde joweeɗiɗi ton yeeso Jawmiraawo.

¹⁷ Nden o hoo'a nebbam seɗɗa nder newre maako, o waɗa ɗam haa deblekeere nofru laɓɓinteeɗo nyaamru e hoondu wordu juŋngo maako nyaamo e ndu kosŋgal maako nyaamal, dow ƴiiƴam jawgel go.

¹⁸ Nebbam luttuɗam nder newre maako, o rufa ɗam dow hoore goɗɗo go. Bana nii o heɓnirta mo yaafuye haa Jawmiraawo.

¹⁹ Nden limanjo lii'o kirseteeŋga ngam ittuki hakke, ngam o heɓna laɓɓinteeɗo yaafuye. Ɓaawo man o hirsa nguleteeŋga.

²⁰ O wula nga hawtaade bee dokkal nyaamdu go dow hirsirde. Bana nii o heɓnirta mo yaafuye, ngam o laaɓa.

²¹ To laɓɓinteeɗo laatake talakaajo mo waawaay waddugo dokke go, nden kam o wadda jawgel gootel kirseteeŋgel ngam joɓki aybe maako, ngel laato geɗal limanjo keɓnanɗo mo yaafuye. Dokkal man ɓaŋgte yeeso Jawmiraawo. O wadda kuroori ɗiggundi kilo tati, njiiɓaandi bee nebbam ngam dokkal nyaamdu e reeta liitir nebbam.

²² Non boo pooli masar ɗiɗi malla pooloy ɗiɗoy, gootel kirseteeŋgel ngam ittuki hakke, gootel guleteeŋgel.

²³ Nyannde joweetataɓre nde laɓɓineeki maako, o waddana limanjo dokke ɗe'e fuu haa dammugal laymaaru fottirde.

²⁴ Limanjo hoo'a jawgel kirseteeŋgel ngam joɓki aybe e nebbam, ɓaŋgta ɗum yeeso Jawmiraawo.

²⁵ O hirsa jawgel go, o hoo'a ƴiiƴam maagel seɗɗa, o waɗa ɗam haa deblekeere nofru laɓɓinteeɗo nyaamru e hoondu wordu juŋngo maako nyaamo e ndu kosŋgal maako nyaamal.

²⁶ Nden limanjo loowa nebbam seɗɗa nder newre muuɗum nannde,

²⁷ wicca ɗam bee hoondu juŋngo mum nyaamo ton yeeso Jawmiraawo.

²⁸ Nden o hoo'a nebbam seɗɗa nder newre maako, o waɗa ɗam haa deblekeere nofru laɓɓinteeɗo nyaamru e hoondu wordu juŋngo maako nyaamo e ndu kosŋgal maako nyaamal, dow ƴiiƴam jawgel go.

²⁹ Nebbam luttuɗam nder newre maako, o waɗa ɗam dow hoore goɗɗo go. Bana nii o heɓnirta mo yaafuye haa Jawmiraawo.

³⁰ Nden o lii'o pooli masar malla pooloy, fodde baawal goɗɗo go,

³¹ gootel kirseteeŋgel ngam ittuki hakke, gootel guleteeŋgel hawtaade bee dokkal nyaamdu. Bana nii o heɓnirta laɓɓinteeɗo yaafuye haa Jawmiraawo.

³² Kanjum woni umroore dow goɗɗo mo nyawu mum yamɗiti, mo waawaay dokkal umraaŋgal haa laɓɓineeki muuɗum.”

Umroore dow cidol haa cuuɗi

³³ Jawmiraawo wi'i Muusa e Haruna:

³⁴ “To on nasti lesdi Kanaana ndi marnanmi on, to mi waɗi cidol haa suudu nder lesdi ndi maroton,

³⁵ jawmu suudu man anndina ɗum limanjo.

³⁶ Limanjo umra ɓe ngurtina kuuje gonɗe nder suudu man fuu, hiddeko o yaha laarugo cidol, ngam taa kuuje ɗe'e fuu coɓa. Nden o yaha laarugo ndu.

³⁷ To o yi'i cidol ɗon nyaama mahdi, noonde maagol boo laatake woɗeere seɗɗa malla haako-haakoore seɗɗa,

³⁸ sey o wurto ndu, o maɓɓa ndu nyalɗe joweeɗiɗi.

³⁹ Nyannde joweeɗiɗawre o lorto, o laara ndu fahin. To o yi'i cidol ɓesdi yaajugo haa maaru,

⁴⁰ sey o umra ɓe ngurtina kaa'e marɗe cidol go, ɓe ngudina ɗe haa nokkuure soɓnde yaasi wuro.

⁴¹ Ɓaawo man ɓe itta ɓakkol mahdi nder suudu fuu, ɓe ngudina loope man haa nokkuure soɓnde yaasi wuro.

⁴² Nden ɓe mbaɗa kaa'e goɗɗe haa nokkuuje cottinaaɗe go, ɓe ɓakka mahdi nder maaru bee loope kecce.

⁴³ To cidol fuɗɗiti haa maaru ɓaawo wurtingo kaa'e e ittugo loope e ɓakkol kesol,

⁴⁴ sey limanjo yaha, laara ndu fahin. To o yi'i cidol ɓesdi yaajugo haa maaru, nden kam ɗum cidol nyaamoowol, suudu man soɓi.

⁴⁵ Sey ɓe ngibbina ndu, ɓe ngudina kaa'e e leɗɗe e loope fuu haa nokkuure soɓnde yaasi wuro.

⁴⁶ Koo moy nasti suudu man yaake ɓe maɓɓi ndu, soɓan haa kiikiiɗe.

⁴⁷ Koo moy waali nder suudu man malla nyaami ton, sey loota limce mum.

⁴⁸ To limanjo wari, yi'i cidol fuɗɗitaay haa suudu ɓaawo ɓe ɓakki ndu kesum, sey o seedo ndu ndu laaɓndu, ngam cidol ittake.

⁴⁹ O hoo'a colli ɗiɗi ngam o itta hakke haa maaru. O hoo'a boo tayre leggal cemmbiɗŋgal e leppel boɗeeyel coy e haako isop.

⁵⁰ O hirsa sonndu wooru dow fayannde loope heewnde ndiyam seeɓoore.

⁵¹ Nden o hoo'a leggal e leppel boɗeeyel coy e haako isop man e sonndu yeeru, o suuwa ɗum fuu nder ƴiiƴam sonndu hirsaandu e ndiyam seeɓoore. O wicca ɗam nde joweeɗiɗi dow suudu.

⁵² Bana nii o ittirta hakke haa suudu, bee ƴiiƴam sonndu e ndiyam seeɓoore e sonndu ɗiɗawru e leggel cemmbiɗŋgel e haako isop e leppel boɗeeyel coy.

⁵³ Nden o yoofa sonndu yeeru, ndu fiira yaasi wuro haa ladde. Bana nii o laɓɓinirta suudu, nden ndu laaɓan.

⁵⁴ Kanjum woni umrooje dow caɗawe koo ɗeye e metemetelde koo ndeyeere,

⁵⁵ dow puunol haa limce e cidol haa cuuɗi,

⁵⁶ dow irin paare e ɓuule e puufe.

⁵⁷ Ɗum ekkitinol dow ko wi'ete coɓɗum malla laaɓɗum.”