Farillaaji Lewi'en 11 - Fulfulde Bible

Dabbaaji nyaameteeɗi

¹ Jawmiraawo umri Muusa e Haruna,

² ɓe mbi'a Isra'iila'en ni'i: “Caka dabbaaji gonɗi nder duniyaaru, ndaa ɗi nyaamoton:

³ Dabbaaji marɗi koloŋgi ceekaaɗi, lornanɗi waacere boo.

^4-6 Ammaa taa nyaame geelooɗi e jama-gudde e boji. Ndaare ɗi bana coɓɗi, ngam ɗi lornan waacere, ammaa ɗi ngalaa koloŋgi ceekaaɗi.

⁷ Taa nyaame gaduuji. Ɗi coɓɗi, ɗi mari koloŋgi ceekaaɗi, ammaa ɗi lornataa waacere.

⁸ Taa nyaame dabbaaji ɗi'i, taa meeme nyawmanɗe maaji boo, ngam ɗum coɓɗum ngam mooɗon.

⁹ Ndaa kuuje ɗe on nyaamata caka kuuje gonɗe nder ndiyam, waato nder beeli e maaje. On nyaama liɗɗi marɗi doŋgi e koɓe fuu.

¹⁰ Ammaa kuuje pamare malla kuuje goɗɗe gonɗe nder ndiyam fuu laatanto on nyidduɗe.

¹¹ Ɗe nyidduɗe, taa nyaame ɗe. To ɗe mbaati, ndaare ɗe ɗe nyidduɗe.

¹² Kuuje gonɗe nder ndiyam koo ɗeye ɗe ngalaa doŋgi e koɓe, laatano on nyidduɗe.

^13-19 Ndaa colli nyidduɗi, ɗi nyaamataake: Dutal, duujiire, ciilal, maafiire, jigaawal maŋngal e pamaral, leekuwal, ndawu, sonndu mbeela raneeru, ngaasiyoowal, cooɗuwal, lamnjatal, naŋngowal liɗɗi, njoofe-be'iiru, non boo wilwildu.

²⁰ Kuukoy markoy bileeji e ladoohoy fuu, laatano on nyiddukoy.

²¹ Sey ko mari kosɗe bee jokke ngam diwugo, kanjum tan nyaamoton,

²² waato baɓɓatti e irin maaji fuu.

²³ Ammaa kuukoy ladoohoy markoy bileeji luttukoy fuu laatano on nyiddukoy.

^24-28 Dabbaaji goɗɗi coɓnan on. Koo moy meemi caaɗŋguuji maaji, soɓan haa kiikiiɗe. Koo moy efti caaɗŋguuji maaji, sey loota limce mum, ammaa coɓki maako tabitan haa kiikiiɗe. Ɗum dabbaaji marɗi koloŋgi, ammaa koloŋgi man ceekaaka, ɗi lornataa waacere. Non boo dabbaaji marɗi kosɗe nayi bee jagge muuɗum'en.

^29-30 Ndaare doombi e pallaaɗe e jukujahe e irin maaje e domdombe fuu bana coɓɗe.

³¹ To ɗe mbaati, koo moy meemi ɗe, soɓan haa kiikiiɗe.

³² To ɗe mbaati, ɗe ndo'ake dow huunde koo ndeye, nde soɓan: Waato kuuje gaɗaaɗe bee leggal e limce e laral e buhu, ko goɗɗo huuwtinirta fuu. Sey on cuuwa ɗum nder ndiyam, ammaa coɓki maajum tabitan haa kiikiiɗe.

³³ To irin kuuje baatɗe ɗe'e ndo'ake nder fayannde loope, ko woni nder maare fuu soɓan, sey on pusa fayannde man boo.

³⁴ To ndiyam ɗon nder fayannde man, goɗɗo rufi ɗam dow nyaamdu koo nduye, ndu soɓan. Non boo to njaram ɗon nder fayannde man, ɗam soɓan.

³⁵ To irin kuuje baatɗe ɗe'e ndo'ake dow huunde, nde soɓan. To ɗum tamsirdu malla fayannde, sey on pusa ɗum, ɗum coɓɗum, ɗum laatanto on coɓɗum boo.

³⁶ Ammaa seeɓoore e waawru soɓataa, sey meemɗo ko waati nder ton, soɓan.

³⁷ To ɗum do'ake dow aawdi aaweteendi, ndi soɓataa.

³⁸ Ammaa to goɗɗo aarti, soofni aawdi man, ɗum do'ake dow maari, nden kam ndi soɓan.

³⁹ To ndabbaawa nyaameteeŋga waati, koo moy meemɗo nga soɓan haa kiikiiɗe.

⁴⁰ Koo moy nyaami kusel ndabbaawa man, sey loota limce mum. Ammaa coɓki maako tabitan haa kiikiiɗe. Koo moy efti nga boo, sey loota limce mum. Ammaa coɓki maako tabitan haa kiikiiɗe.

⁴¹ Kuuje dimmbotooɗe dow lesdi fuu, ɗe nyidduɗe. Taa nyaame ɗe.

⁴² Bana: Ladooji fuu malla ko mari kosɗe nayi fuu malla ko mari kosɗe ɗuuɗɗe fuu. Taa nyaame ɗum.

^43-44 Taa laate on nyidduɓe bee nyaamugo kuuje ɗe'e, taa coɓne ko'e mon bee maaje. Min woni Jawmiraawo Allah mon. Ngam man cene ko'e mon, laate on seniiɓe, ngam min mi ceniiɗo.

⁴⁵ Min woni Jawmiraawo gurtinɗo on lesdi Misra ngam mi laato Allah mon. Laate on seniiɓe, ngam min mi ceniiɗo.

⁴⁶ Kanjum woni umroore dow dabbaaji e colli e marɗum yoŋki nder ndiyam e ko dimmboto dow lesdi fuu.

⁴⁷ Sey on cenndindira coɓɗum bee ko soɓaay, on cenndindira dabbaaji nyaameteeɗi bee ko nyaamataake.”