Ezekiyel 40 - Fulfulde Bible

Haykaliiru waranndu

¹ Nder nduuɓu noogas e njowaɓu ɓaawo daheeki amin, ɗum nduuɓu sappo e nayaɓu ɓaawo do'ere Urusaliima, haa fuɗɗoode nduuɓu man, nyannde sappoore, juŋngo Jawmiraawo wari dow am, o yahri yam haa Urusaliima.

² O yi'ni yam wahayuuji, o yahri yam haa lesdi Isra'iila, o jippini yam dow hooseere townde masin. Ton ngi'mi irin berniwol.

³ Nde o ɓadini yam ton, mi yi'i goɗɗo ɗelkanɗo bana njamndi mboɗeeri. Haa juŋngo maako o woodi ɓoggol poondirgol e sawru foondirdu, o ɗon dari haa nastirde.

⁴ O wi'i yam: “Ɓii-Aadama, laar, heɗita, hakkilan ko mi hollete fuu. Ngam daliila man Allah waddu ma haa ɗo. Yeccu yimɓe Isra'iila ko ngi'ata fuu.”

Nastirde fuunaaŋgeere

⁵ Mi yi'i haykaliiru, bee mahol taariiŋgol ndu. Goɗɗo go hoo'i sawru foondirdu ndu piyanɗe mawɗe joweego waato meetir tati. Fiyannde mawnde ɗum fiyannde famarde bee njaajirka newre. O foondi njaajirka mahol. Tekkeeŋga maagol waɗi sawru wooru, towirka maagol boo, sawru wooru.

⁶ Nden o yehi haa nastirde fuunaaŋgeere. O wa'i ba'orɗe, o foondi les dammugal. Njaajirka maagal, sawru wooru.

⁷ Haa gaɗa dammugal woodi laawol tawtanŋgol nastirde. Haa wakeere laawol man nyaamre, woodi taytaaji aynooɓe tati, non boo tati haa wakeere nannde. Njuutirka taytaaru fuu, sawru wooru, njaajirka boo, sawru wooru. Tekkeeŋga mahdi hakkunde taytaaji waɗi meetir ɗiɗi bee reeta. Gaɗa man woodi dammugal ɗiɗaɓal. Njaajirka maagal waɗi sawru wooru.

^8-9 Gaɗa maagal gal haykaliiru boo, woodi zawleeru yolndeeru. O foondi njaajirka maaru, meetir nayi. Tekkeeŋga mahdi gal haykaliiru, meetir gootel.

¹⁰ Taytaaji aynooɓe go haa bakeeje laawol tawtanŋgol nastirde ɗiɗi fuu poti kal. Tekkeeŋga mahdi hakkunde maaji boo kal-kal.

¹¹ Ɓaawo maajum o foondi njaajirka laawol nastirde, meetir jowi. Hakkunde pareeje dammugal maɓɓitiiɗe boo, meetir joweego bee reeta.

¹² Yeeso taytaaji aynooɓe go, woodi mahol pamarol ngol reeta meetir, haa bakeeje laawol go ɗiɗi fuu. Taytaaji man mari tolɗi nayi, meetir tati dow tati.

¹³ Nden o foondi njaajirka nastirde nde'e, diga mahol yaasiwol ngol taytaaru aynooɓe wooru, haa yotti mahol yaasiwol ngol taytaaru aynooɓe haa wakeere laawol feere. Ka waɗi meetir sappo e ɗiɗi bee reeta. Dammuɗe taytaaji man ɗon tiitotiri.

¹⁴ Daldal haykaliiru yaasiwal ɗon taari zawleeru yolndeeru go. O foondi njuutirka maaru, meetir sappo.

¹⁵ Njuutirka laawol tawtanŋgol nastirde, diga dammugal yaasiwal haa yotti mahol zawleeru yolndeeru, wakeere babal, meetir noogas e jowi.

¹⁶ Burɗe ɗon dow mahi nder, waato haa mahi yaasiiji taytaaji go, non boo dow mahdi hakkunde maaji e dow mahdi haa laawol tawtanŋgol nastirde. Woodi suuraaji dibinooje cehaaɗi dow mahdi fuu.

Daldal haykaliiru yaasiwal

¹⁷ Goɗɗo go nastini yam haa daldal haykaliiru yaasiwal. Woodi ton taytaaji cappanɗe tati, ɗakkotirɗi bee mahol taariiŋgol daldal haykaliiru yaasiwal. Yeeso taytaaji man, woodi taŋkol kaa'e

¹⁸ taariiŋgol daldal fuu. Njaajirka maagol foti bee njuutirka zawleeru. Daldal haykaliiru yaasiwal nga'al towaay bana daldal haykaliiru nderwal.

¹⁹ Woodi nastirde ɓurnde towugo ngam nastugo haa daldal haykaliiru nderwal. Goɗɗo go foondi daldal yaasiwal hakkunde nastirde maagal e nastirde haa daldal nderwal, meetir cappanɗe jowi haa fombina e haa woyla.

Nastirde woylaare

²⁰ Nden goɗɗo go foondi njaajirka e njuutirka nastirde woylaare yahrannde haa daldal yaasiwal.

²¹ Taytaaji aynooɓe tati tati haa bakeeje laawol nastirgol e mahdi hakkunde maaji e zawleeru yolndeeru poti kal-kal bee nastirde fuunaaŋgeere. Njuutirka nastirde fuu, meetir noogas e jowi, njaajirka maaru boo, meetir sappo e ɗiɗi bee reeta.

²² Zawleeru yolndeeru e burɗe e suuraaji dibinooje nanndi bee ko woni haa nastirde fuunaaŋgeere. Haa ɗo boo, woodi ba'orɗe joweeɗiɗi ngam wa'aago haa nastirde man. Zawleeru go ɗon haa timmoode laawol maare gal daldal yaasiwal.

²³ Nastirde woylaare nde'e tiitotiri bee nastirde yahrannde haa daldal nderwal, bana haa fuunaaŋgeere. Goɗɗo go foondi daldal hakkunde nastirɗe ɗiɗi ɗe'e, meetir cappanɗe jowi.

Nastirde fombinaare

²⁴ Ɓaawo maajum goɗɗo go yahri yam gal fombina. Ton ngi'mi nastirde feere. O foondi mahdi nder maare e zawleeru maare, nde foti kal-kal bee nastirɗe goɗɗe go.

²⁵ Burɗe ɗon taari nde non boo zawleeru maare, bana nder nastirɗe goɗɗe go. Njuutirka maare fuu, meetir noogas e jowi, njaajirka maare boo, meetir sappo e ɗiɗi bee reeta.

²⁶ Woodi ba'orɗe joweeɗiɗi ngam wa'aago haa maare. Zawleeru ɗon haa timmoode laawol maaru gal daldal yaasiwal. Haa nder, dow mahdi haa laawol maaru, woodi suuraaji dibinooje cehaaɗi.

²⁷ Nastirde nde'e boo tiitotiri bee nastirde yahrannde haa daldal nderwal. Goɗɗo go foondi daldal hakkunde nastirɗe ɗiɗi ɗe'e, meetir cappanɗe jowi.

Nastirde fombinaare haa daldal nderwal

²⁸ Goɗɗo go tokkini yam gal nastirde fombinaare, yahri yam haa daldal nderwal. O foondi nastirde man, nde foti kal-kal bee nastirɗe goɗɗe go.

^29-30 Taytaaji maare e zawleeru maare, waato zawleeru cakaaru e mahdi nder maare nanndi bee ko woni haa nastirɗe go. Woodi burɗe taariiɗe nastirde nde'e e zawleeru maare boo. Njuutirka maaru fuu, meetir noogas e jowi, njaajirka maare boo, meetir sappo e ɗiɗi bee reeta.

³¹ Zawleeru ndu'u ɗon heedi daldal yaasiwal. Dow mahdi haa laawol nder maare, woodi suuraaji dibinooje cehaaɗi. Ba'orɗe joweetati ɗon njahra haa maare.

Nastirde fuunaaŋgeere haa daldal nderwal

³² Nden goɗɗo go saalini yam nder nastirde fuunaaŋgeere, yahri yam haa daldal nderwal. O foondi nastirde man, nde foti kal-kal bee nastirɗe goɗɗe go.

³³ Taytaaji maare e zawleeru maare e mahdi nder maare nanndi bee ko woni haa nastirɗe goɗɗe go. Woodi burɗe taariiɗe nde, non boo zawleeru maare. Njuutirka maare fuu, meetir noogas e jowi, njaajirka maaru boo, meetir sappo e ɗiɗi bee reeta.

³⁴ Zawleeru maare ɗon heedi daldal yaasiwal. Dow mahdi haa laawol nder maare, woodi suuraaji dibinooje cehaaɗi. Ba'orɗe joweetati ɗon njahra haa maare.

Nastirde woylaare haa daldal nderwal

³⁵ Nden goɗɗo go yahri yam haa nastirde woylaare. O foondi nde, nde foti kal-kal bee nastirɗe goɗɗe go.

³⁶ Nde woodi taytaaji e mahdi nder maare e zawleeru e burɗe taariiɗe nde, bana nastirɗe goɗɗe go. Njuutirka maare fuu, meetir noogas e jowi, njaajirka maare boo, meetir sappo e ɗiɗi bee reeta.

³⁷ Zawleeru maare ɗon gal daldal yaasiwal. Dow mahdi haa laawol nder maare, woodi suuraaji dibinooje cehaaɗi. Ba'orɗe joweetati ɗon njahra haa maare.

Cuuɗi baŋnge nastirde woylaare

³⁸ Woodi suudu woɗndu haa daldal yaasiwal, ndu ɗon ɗakkotiri bee nastirde woylaare haa daldal nderwal. Dammugal maare ɗon haa zawleeru maare. Haa ton ɓe ngiiwata dabbaaji guleteeɗi.

³⁹ Taabe nayi njo'inaama nder zawleeru, ɗiɗi haa wakeere nde'e, ɗiɗi boo haa wakeere ndeya. Dow taabe ɗe'e ɓe kirsata dabbaaji guleteeɗi ngam Allah, non boo kirseteeɗi ngam ittuki hakke e joɓki aybe.

⁴⁰ Haa yaasi zawleeru, woodi taabe nayi goɗɗe, ɗiɗi haa wakeere nastirde nde'e, ɗiɗi boo haa wakeere maare ndeya.

⁴¹ Bana non woodi taabe nayi nder zawleeru go, nayi boo yaasi maaru, waato taabe joweetati ngam hirsugo dabbaaji.

⁴² Taabe nayi ngam taaskitingo guleteeɗi nyiɓaama bee kaa'e cehaaɗe. Towirka maaje, reeta meetir. Dow maaje mari tolɗi nayi, reeta e reetita meetir dow reeta e reetita meetir. Kuuje hirsugo dabbaaji guleteeɗi e kirseteeɗi ɗon mbaali dow taabe man.

⁴³ Faddorde bana njaajirka juŋngo ɗon taaro taabe haa sera maaje. Kusel kirsaaɗi fuu, ɓe mballinan ngel dow maaji.

⁴⁴ Baŋnge nastirde woylaare, wakeere daldal nderwal, woodi suudu woɗndu gal fombina. Non boo suudu haa nastirde fombinaare gal woyla.

⁴⁵ Goɗɗo go wi'i yam: “Suudu tiitiindu fombina, ndu liman'en huuwooɓe nder haykaliiru,

⁴⁶ tiitiindu woyla boo ndu liman'en huuwooɓe haa hirsirde. Ɓe fuu ɓe Lewi'en, danygol Cadok. Kamɓe feere maɓɓe ɓe keɓi duŋayeere ɓaditaago Jawmiraawo ngam jagganaago mo.”

Daldal nderwal e haykaliiru

⁴⁷ Goɗɗo go foondi daldal nderwal, marŋgal tolɗi nayi. Njuutirka maagal, meetir cappanɗe jowi, njaajirka maagal boo meetir cappanɗe jowi. Hirsirde ɗon dari yeeso haykaliiru.

⁴⁸ Nden o yahri yam haa zawleeru haykaliiru sakkitiindu. O foondi mahi haa bakeeje dammugal ɗiɗi fuu, meetir ɗiɗi bee reeta ɗo bee to. Njaajirka dammugal waɗi meetir joweeɗiɗi, tekkeeŋga mahi haa buttuli dammugal boo, meetir gootel bee reeta ɗo bee to.

⁴⁹ Njaajirka zawleeru man waɗi meetir sappo, njuutirka boo, meetir joweego. Woodi ba'orɗe sappo ngam wa'aago haa zawleeru man. Daŋraŋge ɗon ndari yeeso mahi dammugal, haa bakeeje ɗiɗi fuu.