Ezekiyel 39 - Fulfulde Bible

Do'ere Gog

¹ Allah wi'i: “Ɓii-Aadama, waɗ annabaaku dow Gog, yeccu mo: Ndaa nii Allah Jawmiraawo wi'i: An Gog, laamiiɗo mawɗo dow Meesek e Tubal, mi honete.

² Mi dasete, mi wurtinte nokkuure ma daayiiɗum haa woyla, mi yahrete dow kooseeje Isra'iila.

³ Nden mi yewan lagaawal ma nder juŋngo ma nano, mi soldinan kuri ma boo diga juŋngo ma nyaamo.

⁴ A yanan dow kooseeje Isra'iila, an e jama'aaje konu ma fuu e ummaatooje gonduɗe bee maaɗa. Mi wartiran ɓalli mon nyaamdu colli nyaamooji kusel fuu e kuuje ladde.

⁵ On njanan haa yaasi. Min Allah Jawmiraawo wi'i ɗum.

⁶ Mi neldan yiite nder lesdi Magog, non boo haa duuɗe, haa yimɓe ɗon njooɗi nder jam. Ɓe paaman min woni Jawmiraawo.

⁷ Mi waŋginan innde am seniinde caka yimɓe am Isra'iila'en, mi accataa nde soɓa fahin. Nden ummaatooje paaman min woni Jawmiraawo, mi Ceniiɗo nder Isra'iila.”

⁸ Allah Jawmiraawo wi'i: “Nyalaade nde anndinnoomi ɓadake laataago.

⁹ Jooɗiiɓe nder berniiji Isra'iila ngurtoto ngam mooɓtugo balmi accaaɗi. Ɓe njamnan yiite, ɓe kuɓɓiran nge bee bawarɗe mawɗe e pamare e lagaaje e kuri e cabbi e labbe, duuɓi joweeɗiɗi.

¹⁰ Walaa haaje ɓe teena leɗɗe haa ladde malla ɓe pe'a ɗe haa laynde, ngam ɓe kuɓɓiran yiite man bee balmi ɗi'i. Ɓe njaɓtan jaɓtooɓe ɓe, ɓe mbiftan wiftooɓe ɓe.” Non Allah Jawmiraawo wi'i.

Uweeki Gog

¹¹ Jawmiraawo wi'i: “Nyalaade man kuuje ɗe'e fuu laatoto, mi hokkan Gog uwirde nder Isra'iila, nder Waadiwol Saalotooɓe haa fuunaaŋge weendu. Waadiwol man haɗan saalotooɓe dow laawol ngam haa ton ɓe uwan Gog e mooɓre maako fuu, ɓe mbi'an ngol Waadiwol-Mooɓre-Gog.

¹² Isra'iila'en mbaɗan lebbi joweeɗiɗi ngam uwugo maayɓe fuu haa lesdi laaɓa fahin.

¹³ Yimɓe fuu nder lesdi kawtan, uwan ɓe. Ngam maajum ɓe keɓan tedduŋgal nder nyalaade nde teddinanmi hoore am. Min Allah Jawmiraawo wi'i ɗum.

¹⁴ Ɓaawo lebbi joweeɗiɗi go, ɓe cuɓan woɗɓe saalotooɓe lesdi foroy ngam ɓe uwa maayɓe luttuɓe, ɓe laɓɓina lesdi fahin.

¹⁵ Koo ndey ɓe caaloto lesdi, to gooto maɓɓe yi'i i'e maayɗo, o darna alaama haa uwooɓe ngara, uwa mo nder Waadiwol-Mooɓre-Gog.

¹⁶ Woodi boo wuro wi'eteeŋgo Hamona, waato Wuro-Mooɓre. Bana nii ɓe laɓɓinirta lesdi fahin.”

¹⁷ Allah Jawmiraawo wi'i yam: “Ɓii-Aadama, ewna colli e dabbaaji fuu ɗi kawta, ɗi ngara, ɗi nyaama kirseteeɗum ɗum kirsanmi ngam maaji. Ɗum kirseteeɗum mawɗum dow kooseeje Isra'iila, haa ɗi nyaama kusel, ɗi njara ƴiiƴam.

¹⁸ Sey ɗi nyaama nyawmanɗe honooɓe semmbiɗɓe, ɗi njara ƴiiƴam laamiiɓe duniyaaru, ɓe fuu ɓe hirsaaɓe bana jawɗi e baali e be'i e ga'i kalhali payɗi iwɗi haa Baasan.

¹⁹ Mi hokkan colli e dabbaaji kirseteeɗi ɗi'i. Ɗi nyaaman ɓellere haa ɗi cafta, ɗi njaran ƴiiƴam haa ɗi nguyka.

²⁰ Ɗi kaaran bee nyaamdu ndu ndokkanmi ɗi, bee kusel pucci e wa'iiɓe ɗi e honooɓe e yimɓe jama'aare konu koo ɓeye. Min Allah Jawmiraawo wi'i ɗum.”

Jawmiraawo wo'itini Isra'iila

²¹ Jawmiraawo wi'i: “Mi waŋginanan ummaatooje tedduŋgal am. Ɗe fuu ɗe ngi'an kiita ka mbaɗanmi e juŋngo am tedduŋgo ngo njowanmi dow maaje.

²² Ɓaawo maajum yimɓe Isra'iila paaman min woni Allah Jawmiraawo maɓɓe.

²³ Ummaatooje boo paaman Isra'iila'en laati dahaaɓe ngam ɓe ngewno umroore am, mi wiirni ɓe gite am, mi hokki ɓe haa juuɗe ɓillooɓe ɓe, haa ɓe fuu ɓe maayi bee kaafahi.

²⁴ Mi waɗi ɓe fodde coɓki maɓɓe e tuurtolji maɓɓe, mi wiirni ɓe gite am.”

²⁵ Ndaa nii Allah Jawmiraawo wi'i: “Jonta mi wartiran dahaaɓe danygol Yaakubu haa lesdi muuɗum'en, mi enɗan yimɓe Isra'iila fuu. Mi aynan innde am seniinde bee yiide haajunde.

²⁶ Nden kam, ɓe ngejjitan yawaare maɓɓe e kuuɗe ɗe ɓe kuuwi ngam yewugo umrooje am. Ɓe njooɗoto nder lesdi maɓɓe bee jam, walaa kulnanɗo ɓe.

²⁷ To mi wartiri ɓe diga ummaatooje, mi mooɓti ɓe diga lesɗe konne'en maɓɓe, ɓe mbaŋginan senaare am haa ummaatooje ɗuuɗɗe.

²⁸ Nden kam ɓe paaman min woni Allah Jawmiraawo maɓɓe, ngam mi dahi ɓe, jonta boo mi hooran ɓe haa lesdi maɓɓe, mi accataa koo gooto maɓɓe ɓaawo.

²⁹ Mi waanjan Ruuhu am dow yimɓe Isra'iila, mi meetataa wiirnugo ɓe gite am. Min Allah Jawmiraawo wi'i ɗum.”