Ezekiyel 36 - Fulfulde Bible

Barka Allah dow Isra'iila

¹ Jawmiraawo wi'i: “Ɓii-Aadama, waɗ annabaaku dow kooseeje Isra'iila. A wi'a ɗe: Kooseeje Isra'iila, nane wolde Jawmiraawo!

² Ndaa nii Allah Jawmiraawo wi'i: Konne'en mbolwi dow mooɗon, mbi'i: Yowwa! Kooseeje ɓooymaaje ɗe'e laati maral meeɗen!

³ Ngam maajum waɗ annabaaku, wi': Ndaa nii Allah Jawmiraawo wi'i: Ɓe ngiɗno nattingo on e halkugo on koo toy fuu, ɓe ngiɗno on laato maraaɓe ummaatooje goɗɗe. Yimɓe ɓe'e njanci on, kuɗi on.

⁴ Ngam maajum, onon kooseeje Isra'iila, nane wolde Allah Jawmiraawo. Ndaa nii Allah Jawmiraawo wolwi dow kooseeje e towndiije e gaaruuji e waadiiji e nokkuuje bilaaɗe e berniiji accaaɗi fuu, haa ummaatooje taariiɗe njaɓti ɗum kuuje, njanci ɗum.

⁵ Ndaa nii Allah Jawmiraawo wi'i: Nder tikkere kaajal am saatunde mi wolwi dow ummaatooje luttuɗe, sakkomaa dow Edoom fuu, ngam ɗe nyaami lesdi am, ɗe njaɓti durduɗe maari bee seyo maŋngo e jancooje naawɗe.

⁶ Ngam maajum waɗ annabaaku dow lesdi Isra'iila. Yeccu kooseeje e towndiije e maahoy e waadiiji ko min Allah Jawmiraawo mbi'anmi bee tikkere kaajal am ngam daliila jancooje ummaatooje dow lesdi ndi'i.

⁷ Min Allah Jawmiraawo mi ɓaŋgti juŋngo am, mi huni: Fakat ummaatooje taariiɗe on ndoondoto toskaare muuɗum'en.

⁸ Ammaa onon kooseeje Isra'iila, leɗɗe mon mbilitan, ndiman ɓiɓɓe ngam yimɓe am Isra'iila'en. Ngam ɓe ɓadake hootugo.

⁹ Ndaa, mi ɗon wara haa mooɗon, mi wayliti heedi mooɗon. Fakat ɓe ndeman on fahin, ɓe aawan aawdi dow mooɗon.

¹⁰ Yimɓe Isra'iila ɗuuɗan dow mooɗon, ɓe njooɗoto nder berniiji, ɓe nyiɓtoto bille fuu.

¹¹ Mi ɗuɗɗinanan on yimɓe e dabbaaji, ɗum ɗuuɗan ko ɓuri naane, ɗum heɓan ɓikkoy ɗuuɗkoy. Mi waɗan ɓe njooɗo dow mooɗon bana ɓe njooɗorino naane, mi woonanan on ko ɓuri naane boo. Nden kam on paaman min woni Jawmiraawo.

¹² Mi hooran yimɓe am Isra'iila'en, haa ɓe ngaanca dow mooɗon. Ɓe maran on, on laatoto maral maɓɓe. On meetataa halkugo ɓikkoy maɓɓe.

¹³ Min Allah Jawmiraawo mi wi'i: Yimɓe mbi'i on laati lesdi nyaamoori-yimɓe, ndi ɗon halka ɓikkoy ummaatoore maari.

¹⁴ Ammaa yeeso ɗo, a meetataa nyaamugo yimɓe malla jaɓtugo ɓikkoy ummaatoore maaɗa. Min Allah Jawmiraawo wi'i ɗum.

¹⁵ A meetataa nanugo jancooje ummaatooje malla kuudi jama'aaje goɗɗe. A meetataa jaɓtugo ɓikkoy ummaatoore maaɗa. Min Allah Jawmiraawo wi'i ɗum.”

Ngeendam kesam ngam Isra'iila

¹⁶ Ndaa Jawmiraawo wolwani yam, wi'i:

¹⁷ “Ɓii-Aadama, yimɓe Isra'iila njooɗino nder lesdi muuɗum'en, saa'i man ɓe coɓni ndi bee yahdu maɓɓe e kuuɗe maɓɓe. Yahdu maɓɓe soɓi yeeso am bana lootgol debbo.

¹⁸ Mi rufi tikkere am dow maɓɓe ngam daliila ƴiiƴam ɗam ɓe ndufi nder lesdi, ngam ɓe coɓni ndi bee labbi maɓɓe.

¹⁹ Mi hiiti ɓe fodde yahdu maɓɓe e kuuɗe maɓɓe, mi saŋkiti ɓe nder lesɗe jananne.

²⁰ Nde ɓe njehi haa ummaatooje jananne, ɓe lasbini innde am seniinde, ngam yimɓe ton ɗon mbolwa dow maɓɓe, ɗon mbi'a: Kamɓe, ɓe yimɓe ummaatoore Jawmiraawo, ammaa ɓe ngurti diga lesdi maako.

²¹ Ammaa min mi hakkilani innde am seniinde nde yimɓe Isra'iila lasbini ɗum koo toy ɓe njehi fuu.

²² Ngam maajum yeccu yimɓe Isra'iila ko min Allah Jawmiraawo mbi'anmi ɓe: Ko mi tammi waɗugo, mi waɗataa ɗum ngam mooɗon, ammaa ngam daliila innde am seniinde nde lasbinɗon caka ummaatooje fuu.

²³ To mi waŋginani ummaatooje no innde am mawnde senori, nde lasbinɗon caka maaje, ɗe paaman min woni Jawmiraawo. Min Allah Jawmiraawo wi'i ɗum. Mi huuwtiniran on ngam waŋginango ɗe senaare innde am.

²⁴ Mi wurtinan on diga caka ummaatooje man, mi mooɓtan on diga lesɗe fuu, mi hoora on haa lesdi mon.

²⁵ Mi wiccan ndiyam laaɓɗam dow mooɗon ngam laɓɓingo on diga coɓe mon e labbi mon fuu.

²⁶ Mi hokkan on ɓerɗe kese e ruuhuuji kesi. Mi wurtinan ɓerɗe tuurtanɗe nder mon, mi hokka on ɓerɗe ɗowtiiɗe.

²⁷ Mi nastinan Ruuhu am nder mooɗon, haa on tokko farillaaji am, on ɗowtano kiitaaji am.

²⁸ On njooɗoto nder lesdi ndi ndokkumi kaakiraaɓe mon. On laatoto ummaatoore am, min boo mi laatoto Allah mon.

²⁹ Mi hisnan on diga kuuje ɗe coɓni on fuu. Mi umran alkamaari ndi ɗuuɗa, mi meetataa ukkango on weelo.

³⁰ Mi ɗuɗɗinan ɓiɓɓe leɗɗe e ƴaamle gese, ngam taa ummaatooje meeta huɗugo on ngam daliila weelo.

³¹ On ciftoran laabi mon kalluɗi e kuuɗe mon kalluɗe, on ndaaran ko'e mon on nyidduɓe ngam daliila hakkeeji mon e kuuɗe mon nyidduɗe.

³² Onon Isra'iila'en, annde mi waɗataa ɗum ngam daliila mooɗon. Sey on maata semteende e mbustu kuuɗe mon! Min Allah Jawmiraawo wi'i ɗum.”

³³ Ndaa nii Allah Jawmiraawo wi'i: “Nyalaade nde mi laɓɓini on diga aybeeji mon fuu, mi accan on on njooɗo nder berniiji mon fahin, on nyiɓto bille maaji.

³⁴ Naane, koo moy jahɗo nder gese mon yi'i no ɗe laatori ladde. Ammaa mi accan on on ndema ɗe fahin.

³⁵ Koo moy gi'anɗo ɗum wi'an: Lesdi ndi'i, ndi laatino ladde, ammaa jonta ndi laati bana jarne Adnin. Berniiji bilaaɗi gibbuɗi boo laati cemmbiɗɗi jonta, yimɓe ɗon njooɗi ton.

³⁶ Nden ummaatooje taariiɗe on luttuɗe fuu paaman min Jawmiraawo nyiɓti berniiji bilaaɗi, min jubi gese laatinooɗe ladde. Min Jawmiraawo wi'i ɗum, mi waɗan ɗum boo.”

³⁷ Ndaa nii Allah Jawmiraawo wi'i: “Mi waɗan ko ɓuri kuuje ɗe'e boo: To yimɓe torake yam, mi jaɓan tornde maɓɓe, mi ɗuɗɗinan ɓe bana tokkere dammooji.

³⁸ Berniiji maɓɓe laatiiɗi bille jonta, keewan yimɓe bana Urusaliima heewruno baali kirseteeɗi nder nyalɗe juulɗe. Nden kam ɓe paaman min woni Jawmiraawo.”