Ezekiyel 34 - Fulfulde Bible

Waynaaɓe Isra'iila

¹ Ndaa Jawmiraawo wolwani yam, wi'i:

² “Ɓii-Aadama, waɗ annabaaku dow waynaaɓe Isra'iila. Waɗ annabaaku dow maɓɓe, yeccu ɓe: Ndaa nii Allah Jawmiraawo wi'i: Onon waynaaɓe Isra'iila, bone laatanto on. On ɗon ndura ko'e mon, ammaa on ndurataa tokkere mon.

³ On ɗon nyaama ɓellere maare, on ɗon ɓorno limce kuuwraaɗe bee gaasa maare, on ɗon kirsa dabbaaji payɗi, ammaa on ndurataa tokkere.

⁴ On cemmbiɗinaay tampuɗi, on kurgaay nyawɗi, on kaɓɓaay kosɗe maaji gewɗe, on lortinaay caŋkitiiɗi, on ɗaɓɓitaay majjuɗi boo. Ammaa on toonyi ɗi bee caatal.

⁵ Ɗi ngalaa gaynaako, ngam maajum ɗi caŋkiti, kuuje ladde paɗɗi ɗi, nyaami ɗi.

⁶ Baali am ɗon ngiilo dow kooseeje e towndiije fuu, ɗi caŋkiti nder lesdi fuu, walaa kakkilananɗo ɗi, walaa ɗaɓɓitanɗo ɗi.

⁷ Ngam maajum, onon waynaaɓe, nane ko min Jawmiraawo mbi'anmi on:

⁸ Fakat bana mi geeto, min Allah Jawmiraawo, mi ɗon wi'a: Kuuje ladde njaɓti baali am, nyaami ɗi ngam gaynaako walaa. Waynaaɓe am kakkilanaay baali am, nduraay ɗi. Ɓe nduri ko'e maɓɓe tan.

⁹ Ngam maajum naneeɗam, onon waynaaɓe!

¹⁰ Min Allah Jawmiraawo mbi'anmi on: Mi honan on! Mi hoocan baali am diga juuɗe mon. On meetataa durugo ɗi, ngam taa on ndura ko'e mon. Mi hisnan baali am diga kunnduɗe mon, mi accataa on on nyaama ɗi.”

Gaynaako booɗɗo

¹¹ Ndaa nii Allah Jawmiraawo wi'i: “Min bee hoore am mi ɗaɓɓitan baali am, mi hakkilana ɗi

¹² bana gaynaako hakkiliranta baali mum caŋkitinooɗi, to o ɗon dari caka maaji. Mi wartiran ɗi diga nokkuuje ɗe ɗi caŋkiti fuu nder nyalaade duule nyiɓɓuɗe.

¹³ Mi wurtinan ɗi lesɗe ummaatooje goɗɗe, mi mooɓta ɗi, mi hoora ɗi haa lesdi maaji. Mi duran ɗi dow kooseeje Isra'iila, non boo nder waadiiji e koo toy yimɓe njooɗoto nder lesdi fuu.

¹⁴ Mi duran ɗi haa durdude woonde, kooseeje Isra'iila towɗe laatoto ngaynaaka maaji. Ton dow kooseeje Isra'iila ɗi keɓan ngaynaaka mbooɗka, ɗi ciwtoto haa durdude woonde.

¹⁵ Min bee hoore am mi duran baali am, mi siwtinan ɗi. Min Allah Jawmiraawo wi'i ɗum.

¹⁶ Mi ɗaɓɓitan majjuɗi, mi wartiran caŋkitinooɗi, gewaaɗi kosɗe boo, mi haɓɓan kosɗe maaji, mi semmbiɗinan tampuɗi, ammaa mi halkan payɗi e marɗi semmbe. Mi duran tokkere am fodde kiita ngooŋɗuka.

¹⁷ Onon boo, tokkere am, min Allah Jawmiraawo mi ɗon wi'a on: Mi hiitoto hakkunde baali, hakkunde baali debbi e jawɗi.

¹⁸ On ɗon nyaama haa durdude woonde. Ɗum he'ataa na? Koni ndammoton luttuɗum bee kosɗe? On ɗon njara ndiyam laaɓɗam. Ɗum he'ataa na? Koni mbonnoton luttuɗam bee kosɗe?

¹⁹ Doole baali am luttuɗi nyaama ko ndammuɗon, ɗi njara ko mbonnuɗon na?

²⁰ Ngam maajum min Allah Jawmiraawo mbi'anmi: Min bee hoore am mi hiitoto hakkunde baali payɗi e pooyɗi.

²¹ Onon payɗi, on ɗon ngerɓa pooyɗi bee balbe mon e buttuli mon, on ɗon kawa ɗi bee luwe mon, haa on ndiiwi ɗi haa yaasi.

²² Ammaa mi hisnan baali am, ɗi meetataa toonyeego. Mi hiitoto hakkunde baali am.

²³ Mi darnanan ɗi gaynaako gooto duranɗo ɗi, jaggiiɗo am Daawuda, kaŋko o laatoto gaynaako maaji kakkilananɗo ɗi.

²⁴ Min Jawmiraawo mi laatoto Allah maɓɓe, jaggiiɗo am Daawuda boo laamanto ɓe. Min Jawmiraawo wi'i ɗum.

²⁵ Mi haɓɓan alkawal salaaman bee maɓɓe. Mi nattinan dabbaaji kalluɗi diga lesdi, haa baali am nguura nder ladde, ɗi mbaalo nder layɗe bee jam.

²⁶ Mi barkiɗinan ɓe nder lesdi taariindi towndiire am seniinde. Mi toɓnanan ɓe iyeele marɗe barka nder saa'iire fottannde.

²⁷ Leɗɗe e gese ndiman ɓiɓɓe, koo moy jooɗoto jam nder lesdi mum. Mi rimɗinan yimɓe am diga juuɗe ɓilluɓe ɓe, mi yewan kaɓɓirɗe maɓɓe. Nden kam ɓe paaman min woni Jawmiraawo.

²⁸ Ummaatooje goɗɗe meetataa jaɓtugo ɓe, kuuje ladde kalluɗe meetataa nyaamugo ɓe. Ɓe njooɗoto jam, walaa kulnanɗo ɓe.

²⁹ Mi hokkan ɓe gese booɗɗe manaaɗe, weelo meetataa halkugo ɓe nder lesdi. Ummaatooje goɗɗe meetataa jancugo ɓe boo.

³⁰ Ɓe paaman min mi ɗon wondi bee yimɓe Isra'iila, kamɓe ɓe laati ummaatoore am. Min Allah Jawmiraawo wi'i ɗum.

³¹ Onon tokkere durdude am, on yimɓe, min boo mi Allah mooɗon.” Non Allah Jawmiraawo wi'i.