Ezekiyel 33 - Fulfulde Bible

Ezekiyel, aynoowo Isra'iila

¹ Ndaa Jawmiraawo wolwani yam, wi'i:

² “Ɓii-Aadama, yeccu yimɓe ummaatoore ma ni'i: To mi yahri konu dow lesdi ngoɗndi, yimɓe lesdi man cuɓi gooto muuɗum'en, ndarni mo aynoowo,

³ kaŋko, to o yi'i konne'en ɗon ngara, o fuufan luwal ngam maatingo yimɓe,

⁴ ammaa nanɗo hoolo luwal hakkilanaay ngo, konne'en boo ngari, mbari mo, nden kam aybe ƴiiƴam maako ɗon dow hoore maako.

⁵ Aybe maayde maako loroto dow hoore maako, ngam o nani hoolo luwal, ammaa o hakkilanaay ngo. To o hakkilno, o hisanno.

⁶ Ammaa to aynoowo yi'i konne'en ɗon ngara, maatinaay yimɓe ummaatoore bee fuufugo luwal, konne'en boo ngari, mbari gooto maɓɓe, nden kam mbaraaɗo oo maayi daliila hakke muuɗum. Ammaa mi ƴaman aybe maayde maako haa aynoowo.

⁷ An, ɓii-Aadama, mi darni ma a aynoowo ngam yimɓe Isra'iila. Sey a nana wolde diga hunnduko am, a maatina ɓe bee innde am.

⁸ To mi wi'i goɗɗo kalluɗo: An kalluɗo, fakat a maayan, an boo a maatinaay mo, to a wolwaay, a maatinaay mo haa o acca yahdu maako hallundu, nden kam kalluɗo oo maayan ngam aybe muuɗum, ammaa mi ƴaman aybe maayde maako haa maaɗa.

⁹ Ammaa to a maatini kalluɗo ngam o acca yahdu maako hallundu, kaŋko boo o accaay ndu, nden kam o maayan daliila aybe maako. Ammaa an a hisni yoŋki ma.”

Koo moy roondoto kiita aybe mum

¹⁰ Jawmiraawo wi'i yam: “Ɓii-Aadama, yeccu yimɓe Isra'iila ni'i: On ɗon mbi'a: Hakkeeji amin e aybeeji amin ɗon teddana min. Kanjum waɗi min ɗon tampi. Noy min ngeeɗirta?

¹¹ Yeccu ɓe: Fakat bana min Allah Jawmiraawo mi geeto, mi seyortaako maayde kalluɗo. Mi yiɗi o acca yahdu maako hallundu, o yeeɗa. Onon Isra'iila'en, acce laabi mon kalluɗi! Koni ngiɗɗon maayugo?

¹² An, ɓii-Aadama, yeccu yimɓe ummaatoore ma ni'i: To adiliijo waɗi hakke, adilaaku maako naane hisnataa mo. To kalluɗo acci waɗugo kalluɗum, halleende maako naane do'ataa mo kiita. Non boo to adiliijo fuɗɗi waɗugo kalluɗum, adilaaku naane hisnataa mo haa o yeeɗa.

¹³ To mi wi'i adiliijo: Fakat a yeeɗan, ammaa kaŋko boo o ɓaari adilaaku maako naane, o fuɗɗi waɗugo sooynde adilaaku, nden kam mi siftortaa kuuɗe maako booɗɗe sam, o maayan daliila sooynde adilaaku nde o waɗi.

¹⁴ Non boo to mi wi'i kalluɗo: Fakat a maayan, ammaa kaŋko boo o acci waɗugo kalluɗum, o fuɗɗi waɗugo gooŋgaaku e adilaaku,

¹⁵ waato o hokkitan ko jaɓɗo nyamaande wallinani mo jeŋngina, o lornan ko o jaɓti, o ɗon tokko farillaaji dokkanɗi ngeendam, nden kam o maayataa, o yeeɗan fakat.

¹⁶ Mi siftortaa hakkeeji maako sam. O yeeɗan ngam o waɗi gooŋgaaku e adilaaku.

¹⁷ Yimɓe lenyol ma ɗon mbi'a: Laawol Jawmiraawo fottaay. Kayya, laabi mooɗon ɗin pottaay!

¹⁸ To adiliijo acci adilaaku mum, waɗi sooynde adilaaku, nden kam o maayan ngam kuuɗe maako kalluɗe.

¹⁹ Non boo to kalluɗo acci halleende mum, waɗi gooŋgaaku e adilaaku, nden kam o yeeɗan ngam kuuɗe maako booɗɗe.

²⁰ Ammaa on ɗon mbi'a: Laawol Jawmiraawo fottaay. Onon Isra'iila'en, mi hiitoto on, koo moy fodde kuuɗe muuɗum.”

Habaru do'ere Urusaliima

²¹ Nder nduuɓu sappo e ɗiɗaɓu ɓaawo daheeki amin, nder lewru sappooru, nyannde jowaɓre maaru, goɗɗo daɗɗo diga Urusaliima wari haa am, wi'i: “Berniwol do'ake!”

²² Haŋki man, diga daɗɗo oo waraay tawon, juŋngo Jawmiraawo wari dow am. Hiddeko o yotto fajiri, Jawmiraawo maɓɓiti hunnduko am. Hunnduko am maɓɓiti, mi meetaay muukɗugo.

Hakkeeji luttuɓe nder lesdi Isra'iila

²³ Ndaa Jawmiraawo wolwani yam, wi'i:

²⁴ “Ɓii-Aadama, jooɗiiɓe nder bille lesdi Isra'iila ɗe'e ɗon mbi'a: Ibrahiima o goɗɗo gootono tan, ammaa o mari lesdi ndi'i. Enen en ɗuuɗɓe, ngam maajum enen mari ndi jonta.

²⁵ Yeccu ɓe: Ndaa nii Allah Jawmiraawo wi'i: On ɗon nyaama kusel bee ƴiiƴam fuu. On ɗon ndewa labbi mooɗon. On ɗon ndufa ƴiiƴam yimɓe. Nden on mara lesdi!

²⁶ On ɗon koolo kaafaaje mon. On ɗon mbaɗa nyidduɗum. Koo moy mooɗon ɗon toskina debbo keeddiɗɗum. Nden on mara lesdi!

²⁷ Yeccu ɓe: Ndaa nii Allah Jawmiraawo wi'i: Fakat bana mi geeto, jooɗiiɓe nder bille maayran bee kaafahi. Wonɓe haa yaasi boo, kuuje ladde nyaaman ɓe. Nyukkiiɓe nder tapaaje kooseeje e lowi maayan bee nyawu kalluŋgu ndaaɓoowu.

²⁸ Mi wartiran lesdi ladde meere, hulniinde, mi timminan baawɗe maɓɓe ɗe ɓe mantori ɗum. Kooseeje Isra'iila boo laatoto nokkuure nde goɗɗo waawataa saalaago.

²⁹ Saa'i ngartiranmi lesdi ladde meere, hulniinde ngam daliila kuuɗe maɓɓe nyidduɗe ɗe ɓe mbaɗi fuu, ɓe paaman min woni Jawmiraawo.”

Yimɓe cali wolde Allah

³⁰ Jawmiraawo wi'i: “Ɓii-Aadama, yimɓe ummaatoore ma ɗon mbolwa dow maaɗa koo ndeye ɓe kawri haa mahi berniwol e jolɗe ci'e maɓɓe. Ɓe ɗon mbi'mbi'tira: Njemme nanugo wolde nde Jawmiraawo neldi en jonta.

³¹ Nden yimɓe am ngaran, ɓe mooɓo haa maaɗa, ɓe njooɗo yeeso ma ngam nanugo ko mbi'ata. Ammaa ɓe mbaɗataa ko a wi'ata ɓe. Ɓe ɗon mbaɗa ko fottanta ɓe tan, ɓerɗe maɓɓe ɗon ɗaɓɓa ko nafata ɓe tan.

³² A laatani ɓe bana bammbaaɗo malla piyoowo moolooru. Ɓe nanan bolle ma fuu, ammaa ɓe tokkataako koo woore maaje.

³³ Fakat ko mbi'ɗa laatoto. To ɗum laatake, nden kam ɓe paaman annabiijo wonduno bee maɓɓe.”