Ezekiyel 31 - Fulfulde Bible

Nanndinki Misra bee lekki cemmbiɗki

¹ Nder nduuɓu sappo e go'oowu, lewru tataɓru, nyannde go'oore maaru, Jawmiraawo wolwani yam, wi'i:

² “Ɓii-Aadama, yeccu Firawna, laamiiɗo Misra e mooɓre mum: A mawɗo! Moy nannduɗa?

³ Assuura nanndi bee lekki Libanon cemmbiɗki, marki lice booɗɗe ɗuuɗa-ɗowdiije, towki haa yotti duule.

⁴ Ndiyamji mawnini ki, ilam luggeeŋga towni ki. Ɗam yarni haa ki juba, ɗam yahri maaje haa leɗɗe ladde fuu.

⁵ Ngam daliila ndiyam man ki mawni, ki ɓuri leɗɗe feere fuu. Lice maaki ɗuuɗi, njuuti.

⁶ Asli colli fuu mbaɗi caɓɓe dow lice maaki, kuuje ladde ndimi ɓiɓɓe muuɗum'en les maaki. Ummaatooje ɗuuɗɗe njooɗi haa ɗowdi maaki.

⁷ Ki wooɗi masin! Ki makki, bee lice juutɗe masin, ngam ɗaɗi maaki njotti ndiyamji ɗuuɗɗi.

⁸ Walaa lekki cemmbiɗki nder jarne Allah yotti darnde maaki. Walaa lekki makki mari lice bana ɗe maaki. Walaa lekki cukkuki mari lice bana ɗe maaki. Walaa lekki nder jarne Allah wooɗi bana maaki.

⁹ Mi wo'ini ki bee lice ɗuuɗɗe masin, haa leɗɗe fuu nder Adnin, jarne Allah, kaaji ki.

¹⁰ Ngam maajum mbi'mi, min Allah Jawmiraawo: Lekki man mawni, towi haa yotti duule. Nde ki ɓesdi mawnugo, ki ɓesdi mawnitaago boo.

¹¹ Ngam maajum ngudinmi ki. Mi hokki ki haa juŋngo cemmbiɗɗo, laamaniiɗo ummaatooje, o huuwa ki fodde halleende maaki.

¹² Jananɓe ɓuranɓe saatugo nder ummaatooje fuu pe'i ki, acci ki. Lice maaki coli haa kooseeje e waadiiji fuu. Lice maaki cewɗe gewaaɗe mbaali haa gaaruuji lesdi fuu. Ummaatooje jooɗiiɗe haa ɗowdi maaki, ndilli, acci ki.

¹³ Colli fuu ngari njooɗi dow lekki pe'aaki ki'i, kuuje ladde fuu mbaɗi baalorɗe mum'en caka lice maaki.

¹⁴ Yeeso ɗo walaa lekki haa ndiyam meetata mawnitaago daliila maŋngu muuɗum, meetata towugo haa yotto duule boo ngam leɗɗe fuu njooran. Yimɓe fuu boo maayan, ɓe kawtoyan bee nastuɓe ngaska lugguka.”

¹⁵ Ndaa nii Allah Jawmiraawo wi'i: “Nyalaade lekki go nasti joonde maayɓe, mi waɗi ilamji luggeeŋga cudda ki, mboya ki. Mi haɗi maaje ilugo. Ndiyamji lugguɗi ta'an. Ngam daliila maaki njahrumi nyiɓre dow hooseere Libanon, mi yoorni leɗɗe laynde fuu.

¹⁶ Saa'i nastinmi ki joonde maayɓe hawtaade bee nastuɓe ngaska lugguka, hoolo do'ere maaki dimmbi ummaatooje. Leɗɗe Adnin fuu, leɗɗe Libanon cuɓaaɗe fuu, jubaaɗe haa ndiyam, nde'iti ton nder reedu lesdi.

¹⁷ Kanje boo ɗe nastan bee maaki nder joonde maayɓe, haa nokkuure mbaraaɓe bee kaafahi ngoni. Ɗe ɗonno mballa ki, ɗe ɗonno boo njooɗi haa ɗowdi maaki caka ummaatooje fuu.

¹⁸ Koo leɗɗe Adnin boo mawnaay, mbooɗaay bana maaɗa. Ammaa jonta a jippoto haa joonde maayɓe kal-kal bee leɗɗe Adnin, a hawtoya bee saadooni'en mbaraaɓe bee kaafahi. Ɗum laarani Firawna e mooɓre muuɗum fuu.” Non Allah Jawmiraawo wi'i.