Ezekiyel 27 - Fulfulde Bible

Gimol ngam woyugo Tirus

¹ Ndaa Jawmiraawo wolwani yam, wi'i:

² “Ɓii-Aadama, waɗ gimol ngam woyugo Tirus,

³ berniwol jooɗiiŋgol haa sera mbeela, baɗanŋgol filu bee ummaatooje haa duuɗe ɗuuɗɗe. Yeccu ngol: Ndaa nii Allah Jawmiraawo wi'i: An Tirus, a wi'i a ŋarniiɗo masin.

⁴ Keeri ma ɗon haa caka mbeela. Nyiɓooɓe ma mbooɗini ma bana koommbowal timmuŋgal.

⁵ Ɓe mbaɗi reedu ma bee leɗɗe caatuɗe iwɗe hooseere Seniira, daŋraŋgal ma boo bee leggal cemmbiɗŋgal diga Libanon.

⁶ Ɓe mbaɗi laanyirɗe ma bee leɗɗe towɗe iwɗe lesdi Baasan, ɓe maɓɓi dow koommbowal bee leɗɗe booɗɗe iwɗe duuɗe Kitti'en, ɓe pawni leɗɗe man bee cehaaɗum nyii'e nyiibi.

⁷ Bee limce tuppitaaɗe iwɗe Misra ɓe mbaari leppi mawɗi ɗi henndu yerɓirta koommbowal, ngam maajum koo moy annditi ma bee koyɗum. Limce ɗigguɗe boɗeeje e carwinaaɗe iwɗe duuɗe Elisa laati suddaare ma.

⁸ Yimɓe diga lesdi Sidon e Aruwat ngonno laanyooɓe ma, goni'en wonɓe nder maaɗa, yaa Tirus, ngonno hoore'en maɓɓe.

⁹ Ndotti'en e waawɓe diga Gebal mbo'itini ceekɗi ma. Yimɓe diga koommbooje mbeela fuu mbaɗi filu nder maaɗa.

¹⁰ Honooɓe diga Persiya e Lidiya e Put ɗonno nder jama'aare konu ma. Ɓe ɓili bawarɗe maɓɓe e kufneeje maɓɓe njamndiije nder maaɗa. Kamɓe ngaddani ma tedduŋgal.

¹¹ Honooɓe diga Aruwat ayni mahi taariiɗi ma hawtaade bee honooɓe maaɗa, worɓe Gammadi boo ayni cuuɗi ma towɗi, ɓili bawarɗe muuɗum'en haa mahi taariiɗi ma. Kamɓe ɓe laatini ŋarol ma timmuŋgol.

¹² Yimɓe lesdi Tarsis mbaɗi filu bee maaɗa daliila risku ma fantuŋgu. Ɓe cannji kuuje ma bee cardi e njamndi ɓaleeri e jamɗe goɗɗe.

¹³ Yunaniya e Tubal e Meesek mbaɗi filu bee maaɗa, a hokki ɓe kuuje ma, a heɓi jeyaaɓe e kuuje njamndi mboɗeeri.

¹⁴ Yimɓe Bayti-Togarma cannji kuuje ma bee pucci kuuwooji e pucci konu ba'eteeɗi e alfadariije.

¹⁵ Rodani'en laati fildooɓe bee ma. Yimɓe jooɗiiɓe haa duuɗe ɗuuɗɗe mbaɗi filu bee ma, njoɓi ma bee nyii'e nyiibi e leɗɗe nelɓe.

¹⁶ Yimɓe Edoom laati fildooɓe bee ma. Ɓe cannji kuuje ma ɗuuɗɗe, ɓe ndokki ma kaa'e haako-haakooje e limce carwinaaɗe e tuppitaaɗe e ɗigguɗe e murjamje e kaa'e boɗeeje.

¹⁷ Yahuuda e Isra'iila laati filooɓe ma. Ɓe cannji kuuje ma bee alkamaari iwndi haa Minnit e gawri e njumri e nebbam jaytunje e cittaaje.

¹⁸ Damas filani ma ngam daliila kuuje ma ɗuuɗɗe e risku ma fantuŋgu. Ɓe coodani ma inaboojam diga Helbon e gaasa baali diga Sahar.

¹⁹ Yimɓe Dan e Yunaniya ummi berniwol Uzal, ngari cannji kuuje ma bee njamndi ɓaleeri tappaandi e cittaaje feere feere.

²⁰ Yimɓe Dedan njaɓi kuuje ma, ndokki ma daɗɗaaje pucci.

²¹ Arab'en e laamiiɓe lesdi Keedar mbaɗi filu bee ma. Ɓe cannji kuuje ma bee njawkoy e jawɗi baali e be'i.

²² Filooɓe Seba e Rama pilani ma, njaɓi kuuje ma, ndokki ma cittaaje ɓurɗe welugo e kaa'e ɗuuɗa-samanje e kaŋŋeeri.

²³ Berniiji Haran e Kanne e Eden e filooɓe Seba e Assuura e Kilmat fuu mbaɗi filu bee ma.

²⁴ Ɓe njaɓi kuuje ma, ɓe ndokki ma limce jaage e alkibbaaje carwinaaɗe, tuppitaaɗe e tapiije ɗe noone ɗuuɗɗe e ɓoggi bamaaɗi cemmbiɗɗi.

²⁵ Koommbooje iwɗe haa Tarsis njahri kuuje filu ma. A laati bana koommbowal dow ndiyam, keewŋgal kuuje ɗuuɗɗe masin.

²⁶ Laanyooɓe njahri ma dow ndiyamji mawɗi. Ammaa henndu fuunaaŋge saatundu fusi ma haa caka mbeela.

²⁷ Riskuuji ma e kuuje ma fuu, laanyooɓe ma e hoore'en ma, wo'itinooɓe ceekli ma e filooɓe ma, honooɓe ma wonɓe nder ma fuu e jama'aare koommbowal woɗnde nder ma fuu, ɗum fuu ɗum yolloto nder ndiyam lugguɗam nyalaade koommbowal ma fusata.

²⁸ Hoolo hoore'en ma yahan daayiiɗum, jooɗiiɓe haa fomoonde mbeela ndiwnan.

²⁹ Laanyooɓe e hoore'en e huuwooɓe fuu accan koommbooje muuɗum'en, njippoto haa lesdi.

³⁰ Ɓe fuu ɓe mboyete bee bojji caatuɗi, ɓe ukkan collaaje dow ko'e maɓɓe, ɓe talloto nder ndoondi,

³¹ ɓe pemmban gaasa ko'e maɓɓe, ɓe ɓornoto limce buhuuje. Ɓe mboyete bee ɓerɗe mettuɗe.

³² Ɓe ngiman gimol ngo'ol ngam woyugo ma: Moy nanndi bee Tirus, an berniwol ngol sirwi jonta dow mbeela?

³³ Saa'i a neldi kuuje ma dow ndiyamji, a haarni ummaatooje ɗuuɗɗe. A riskini laamiiɓe duniyaaru bee jawdi ma e kuuje ma ɗuuɗɗe.

³⁴ Ammaa jonta a fusi dow ndiyam, a yolli nder luggeeŋga mbeela! Kuuje ma e jama'aare ma fuu majjidi bee ma nder ndiyam!

³⁵ Masiibo ma hulni jooɗiiɓe haa duuɗe fuu. Koo laamiiɓe maɓɓe boo kultori, kulol waŋgi haa geese maɓɓe.

³⁶ Filooɓe nder ummaatooje fuu ɗon ciika ngam a laati kulniiɗum. A natti haa foroy!”