Ezekiyel 25 - Fulfulde Bible

Annabaaku dow Ammoon

¹ Ndaa Jawmiraawo wolwani yam, wi'i:

² “Ɓii-Aadama, laar gal Ammooni'en, waɗ annabaaku dow maɓɓe.

³ Yeccu ɓe: Nane wolde Allah Jawmiraawo! Ndaa nii o wi'i: Saa'i on ngi'i konne'en coɓni suudu am seniindu, mbili lesdi Isra'iila, dahi yimɓe Yahuuda boo, on mbi'i: Yowwa, booɗɗum!

⁴ Ngam maajum ndokkumi on haa juuɗe yimɓe ladde fuunaaŋge, ɓe mara on. Ɓe mbaɗan caŋngeeje nder lesdi mooɗon, ɓe nyiɓan cuuɗi boo. Ɓe nyaaman ƴaamle gese mooɗon, ɓe njaran kosam mooɗon boo.

⁵ Mi wartiran berniwol Rabba durduɗe geelooɗi, lesdi Ammoon laatoto durduɗe dammooji. Nden kam on paaman min woni Jawmiraawo.”

⁶ Ngam ndaa nii Allah Jawmiraawo wi'i: “On kelli juuɗe mon, on ngami bee seyo. On ceyi masin, on njawi lesdi Isra'iila masin.

⁷ Ngam maajum portanmi juŋngo am, mi hokka on haa juuɗe ummaatooje, on laato keɓal maaje. Mi halkan on caka ummaatooje, on meetataa marugo lesdi. Mi nattinan on. Nden kam on paaman min woni Jawmiraawo.”

Annabaaku dow Mo'ab

⁸ Ndaa nii Allah Jawmiraawo wi'i: “Mo'ab e Se'ir mbi'i: Yimɓe Yahuuda foti kal bee ummaatooje goɗɗe!

⁹ Ngam maajum maɓɓitanmi keerol lesdi Mo'ab, konne'en ukkano berniiji maɓɓe, koo berniiji ɓurɗi wooɗugo boo, waato: Bayti-Yesimot e Ba'al-Me'on e Kiriyatayim.

¹⁰ Mi accan yimɓe ladde fuunaaŋge nyaama lesdi Mo'ab e lesdi Ammoon, ngam taa goɗɗo siftora innde Ammoon caka ummaatooje.

¹¹ Mi hiitoto yimɓe Mo'ab. Nden ɓe paaman min woni Jawmiraawo.”

Annabaaku dow Edoom

¹² Ndaa nii Allah Jawmiraawo wi'i: “Yimɓe Edoom koni yimɓe Yahuuda bee suuno waataago. Bana nii ɓe laatori aybuɓe masin.

¹³ Ngam maajum min Allah Jawmiraawo mi fortan juŋngo am ngam honugo lesdi Edoom, mi nattina yimɓe e dabbaaji fuu. Mi wartiran ndi ladde meere, diga berniwol Teman haa yotti berniwol Dedan, yimɓe fuu mbareteeɓe bee kaafahi.

¹⁴ Mi waatoto Edoom bee juuɗe Isra'iila'en, ummaatoore am. Kamɓe ɓe mbaɗan haa Edoom maata tikkere am saatunde fuu. Nden kam Edoom faaman no mi waatorto.” Non Allah Jawmiraawo wi'i.

Annabaaku dow Filisti'en

¹⁵ Ndaa nii Allah Jawmiraawo wi'i: “Filisti'en koni saare Yahuuda bee suuno waataago e nganyŋgu diga ɓooyma. Ɓe mbaati ɓe bee caatal ngam halkugo ɓe.

¹⁶ Ngam maajum min Allah Jawmiraawo mi fortan juŋngo am ngam honugo Filisti'en. Mi nattinan Kereti'en e luttuɓe jooɗiiɓe haa fomoonde mbeela.

¹⁷ Mi fiyan ɓe bee tikkere, mi waatoto ɓe bee caatal. Saa'i mi waatoto ɓe, ɓe paaman min woni Jawmiraawo.”