Ezekiyel 23 - Fulfulde Bible

Deerɗiraaɓe rewɓe halluɓe ɗiɗo

¹ Ndaa Jawmiraawo wolwani yam, wi'i:

² “Ɓii-Aadama, woodino deerɗiraaɓe rewɓe ɗiɗo, daada gooto.

³ Saa'i ɓe faanyɓe, ɓe ɗonno njooɗi haa Misra, ɓe mbaɗi daakaareeku, ɓe acci worɓe pijiri enɗi maɓɓe, karli ɓe.

⁴ Innde mawniraawo, Ohola (ɗum Samariya). Innde minyiraawo boo, Oholiba (ɗum Urusaliima). Mi te'i ɓe ɗiɗo fuu, ɓe ndanyani yam ɓiɓɓe worɓe e rewɓe.

⁵ Ohola te'aaɗo am tokki waɗugo daakaareeku. O heewi suuno ngam Assuura'en waaye'en maako. Kamɓe ɓe honooɓe,

⁶ ɓorniiɓe limce carwinaaɗe, ngomna'en e wakiili'en, ɓe fuu ɓe suka'en wooɗɓe, wa'ooɓe pucci.

⁷ O waɗi daakaareeku bee suɓaaɓe Assuura fuu, o suuni koo moy maɓɓe, o soɓni hoore maako bee sujidango labbi Assuura'en.

⁸ O accaay daakaareeku maako ngu o fuɗɗuno haa Misra, saa'i ɓe pijiri enɗi maako diga o paanyo tawon, woɗɓe mbaaldi bee maako, mbaɗi mo bana daakaareejo.

⁹ Ngam maajum mi hokki mo haa juuɗe Assuura'en, waaye'en maako ɓe o suuni.

¹⁰ Kamɓe ɓorti mo, ɓe kooci ɓiɓɓe maako worɓe e rewɓe, nden kaŋko man boo ɓe mbari mo bee kaafahi. Koo toy fuu rewɓe nani habaru kiita maako.

¹¹ Oholiba deerɗiraawo maako yi'i ɗum fuu, ammaa suuno maako ɓuri ɗuuɗugo, o waɗi daakaareeku ngu ɓuri deerɗiiko.

¹² O suunaama ngomna'en e wakiili'en Assuura'en e honooɓe ɓorniiɓe limce booɗɗe e wa'iiɓe pucci, ɓe fuu ɓe suka'en wooɗɓe.

¹³ Mi yi'i o coɓɗo, o tokki laawol ngol deerɗiiko tokki.

¹⁴ Ammaa daakaareeku maako ɓuri ngu deerɗiiko. O yi'i suuraaji Kaldiya'en diidaaɗi haa mahi bee boɗeejum,

¹⁵ worɓe bee taadorli e meetaleeji jilwanɗi fuu ngoodi jaati laamiiɓe, ɓe ɗon bana ɓiɓɓe Baabila, Kaldiya woni lesdi maɓɓe.

¹⁶ Nde o yi'i suuraaji maɓɓe, o suuni ɓe, o neli nelaaɓe haa maɓɓe nder lesdi Kaldiya.

¹⁷ Yimɓe Baabila ngari ngam waaldugo bee maako, ɓe mbaɗi daakaareeku bee maako, ɓe coɓni mo haa o wanyi ɓe.

¹⁸ O waŋginani koo moy o daakaareejo, o holli koo moy temmbuki maako. O laatani yam nyidduɗo bana deerɗiiko.

¹⁹ O ɗuɗɗini daakaareeku maako, o siftori saa'i nde o paanyono, yaake o waɗno daakaareeku nder lesdi Misra.

²⁰ O heewi suuno ngam daakaare'en mawna-jakari'en bana bamɗe, ɗuuɗa-mani'en bana pucci gorɗi.

²¹ Oholiba, a accaay suuno paanyaaku ma, saa'i Misra'en pijiri enɗi ma.”

Kiita Allah dow deerɗiraaɓe go

²² “Jonta kam, Oholiba, nan ko min Allah Jawmiraawo mi wi'ete: Waaye'en ma ɓe nganyɗa, mi umminan ɓe dow maaɗa, ɓe ngara ɓe taaro ma.

²³ Mi waddan Baabila'en e Kaldiya'en fuu, worɓe Pekoda e So'a e Ko'a, non boo Assuura'en fuu. Ɓe fuu ɓe suka'en wooɗɓe, ɓe fuu ɓe ngomna'en e wakiili'en, hoore'en e mawɓe, wa'iiɓe pucci.

²⁴ Ɓe ngaran dow maaɗa diga woyla, jama'aare konu ɗuuɗnde, bee mootaaji pucci, bee bawarɗe mawɗe e pamare e kufneeje njamndi ɓe taaroto ma. Mi hokkan ɓe baawɗe hiitaago ma, ɓe kiitoto ma fodde kiitaaji maɓɓe.

²⁵ Mi rufan tikkere kaajal am dow ma, ngam maajum accanmi ɓe ɓe kiito ma bee tikkere. Ɓe ta'an kine ma e noppi ma, ɓe mbaran danygol ma bee kaafahi. Ɓe koo'an ɓiɓɓe ma worɓe e rewɓe, ko luttani ma boo, ɓe ngulan ɗum bee yiite.

²⁶ Ɓe ɓortete, ɓe koocan fawne ma marɗe saman fuu.

²⁷ Bana non mi timminirta suuno ma e daakaareeku ma ɗum puɗɗuɗa waɗugo haa Misra. A meetataa rewugo labbi, a meetataa siftorgo lesdi Misra boo.”

²⁸ Ngam ndaa nii Allah Jawmiraawo wi'i: “Mi hokkete haa juuɗe yimɓe ɓe nganyɗa, laataniiɓe ma nyidduɓe.

²⁹ Ɓe nganyete. Ngam maajum ɓe koocan ngeenaari ma fuu, ɓe accete a temmbo. Temmbuki ma waŋginan cemtiniiɗum suuno ma e daakaareeku ma.

³⁰ Ɓe mbaɗante ɗum ngam a waɗi daakaareeku bee ummaatooje, a soɓni hoore ma bee sujidango labbi maaje.

³¹ A tokki laawol deerɗa, ngam maajum njarnanmaami jardugel kiita maako.”

³² Ndaa nii Allah Jawmiraawo wi'i: “A yaran nder jardugel kiita deerɗa lugguŋgel, jaasŋgel. Koo moy yawete, jancete, ngam ngel heewi kiita jur.

³³ Bone maagel wuykinte. Jardugel deerɗa Samariya, ɗum jardugel kultoreeŋgol e halkere.

³⁴ A yardan ngel, a fusan ngel bee nyii'e ma, a seekan enɗi ma bee keeɗe maagel. Ngam min Allah Jawmiraawo wi'i ɗum.”

³⁵ Ngam maajum, ndaa nii Allah Jawmiraawo wi'i: “A yejjiti yam, a wudini yam ɓaawo ma. Ngam maajum kiita suuno ma e daakaareeku ma ɗon dow maaɗa!”

³⁶ Nden Jawmiraawo wi'i yam: “Ɓii-Aadama, a hiitoto Ohola e Oholiba na? Sey a fela ɓe ngam kuuɗe maɓɓe nyidduɗe.

³⁷ Ngam ɓe mbaɗi njeenu, ƴiiƴam ɗon takki haa juuɗe maɓɓe. Ɓe mbaɗi njeenu bee tokkaago labbi, ɓe mbari ɓikkoy koy ɓe ndanyani yam. Ɓe lii'ani labbi ɓiɓɓe am.

³⁸ Naa kanjum tan woni aybe maɓɓe! Nyalaade man ɓe coɓni boo suudu am seniindu e nyalɗe ciwtorɗe ɗe ndarnumi.

³⁹ Ɓe kirsi ɓikkoy maɓɓe, ɓe lii'ani koy labbi maɓɓe, nden ɓe ngari nyalaade man nder suudu am seniindu, ɓe coɓni ndu. Bana nii ɓe mbaɗi nder suudu am.

⁴⁰ Ɓe neli nelaaɗo ngam ewnoygo worɓe warɓe diga daayiiɗum, nden ɓe ngari. Rewɓe ɗiɗo go ngiiwi, mbaɗi pinaari haa gite muuɗum'en, ɓorni fawne muuɗum'en.

⁴¹ Nden ɓe njooɗi dow be'itte booɗɗe. Dow taabal yeeso be'itte ɓe njo'ini uurle e nebbam ɗi ndokkumi ɓe.

⁴² Hoolo mooɓre seyiinde waɗi, worɓe woɗɓe diga ladde kawtani mooɓre man. Ɓe mbaɗi jawe haa juuɗe rewɓe go, ɓe meeti ɓe meetaleeji booɗɗi.

⁴³ Mi wi'i: Debbo mo njeenu tampini ɗum, jonta nasti waɗugo daakaareeku fahin.

⁴⁴ Ɓe tokki yahugo haa maako bana worɓe njahata haa debbo daakaareejo! Bana nii ɓe nastiri haa Ohola e Oholiba, rewɓe ɓe ngalaa semteende.

⁴⁵ Ammaa ndaa worɓe adili'en kiitoto ɓe kiita jeenooɓe e rufooɓe ƴiiƴam, ngam ɓe jeenooɓe, ƴiiƴam ɗon takki haa juuɗe maɓɓe boo.”

⁴⁶ Ngam ndaa nii Allah Jawmiraawo wi'i: “Mooɓte jama'aare dow maɓɓe, nde hulna ɓe, nde jaɓta ɓe!

⁴⁷ Jama'aare man fiɗa ɓe bee kaa'e, ta'a ɓe bee kaafaaje, mbara ɓiɓɓe maɓɓe worɓe e rewɓe, wula cuuɗi maɓɓe.

⁴⁸ Bana nii timminiranmi kuuɗe cemtiniiɗe diga lesdi, ngam taa ɓe mbaɗa sooynde semteende bana ɓeya.

⁴⁹ Onon deerɗiraaɓe ɗiɗo boo, kiita laatanto on ngam sooynde semteende mon e hakke dewki labbi mon. Nden kam on paaman min woni Allah Jawmiraawo.”