Ezekiyel 15 - Fulfulde Bible

Balndol leggal inabohi ngal nafataa koo ɗume

¹ Ndaa Jawmiraawo wolwani yam, wi'i:

² “Ɓii-Aadama, ɗume leggal inabohi ɓurdata lice leɗɗe goɗɗe nder laynde?

³ Kadi goɗɗo hoo'an leggal maaki ngam waɗugo huunde na? Koo o waɗan ɓilduɗum bee maagal na?

⁴ Woodaa, o huɓɓiran ngal. To yiite nyaami seɓattooji maagal ɗiɗi, wuli caka maagal boo, kadi ngal woodi nafuuda na?

⁵ To ngal keccalno maa, ngal he'aay waɗugo huunde bee maagal, sakkomaa to yiite nyaami ngal malla wuli ngal!

⁶ Ngam maajum min Allah Jawmiraawo mbi'anmi: Bana leggal inabohi caka leɗɗe laynde ngal cakkinanmi nder yiite, bana non kuuwranmi yimɓe Urusaliima.

⁷ Mi huucitan yeeso am dow maɓɓe ngam honugo ɓe. Koo to ɓe ndaɗi yiite, nge nyaaman ɓe. Saa'i ndaaranmi ɓe ngam waɗugo sarru, on paaman min woni Jawmiraawo.

⁸ Mi wartiran lesdi maɓɓe ladde meere, ngam ɓe ngewi umrooje am. Min Allah Jawmiraawo wi'i ɗum.”