Ezekiyel 14 - Fulfulde Bible

Koŋngol dow teddinki labbi

¹ Woɗɓe ndotti'en Isra'iila ngari, njooɗi yeeso am.

² Ndaa ko Jawmiraawo wolwani yam:

³ “Ɓii-Aadama, ɓerɗe worɓe ɓe'e ɗakkotiri bee labbi muuɗum'en. Gite maɓɓe ɗon cuto ko nastinta ɓe nder aybe. Kadi, mi acca ɓe ngara ɓe ƴama muuyo am na?

⁴ Yeccu ɓe: Ndaa nii Allah Jawmiraawo wi'i: Koo moy Isra'iilaajo mo ɓernde mum ɗakkotiri bee labbi, mo ɗon suto ko nastinta ɗum nder aybe, to o wari haa annabiijo, min Jawmiraawo bee hoore am mi jaaboto mo fodde ɗuuɗeeŋga labbi maako.

⁵ Jaawaabu am naŋngan ɓerɗe Isra'iila'en, ngam ɓe fuu maɓɓe ɓe ndaayi yam ngam daliila labbi maɓɓe.

⁶ Ngam maajum, yeccu yimɓe Isra'iila: Ndaa nii Allah Jawmiraawo wi'i: Lorte, acce labbi mon! Ngaylite, acce kuuɗe mon nyidduɗe fuu!

⁷ Ngam, koo moy Isra'iilaajo malla koɗo nder Isra'iila, mo ɓernde mum daayi yam, ɗakkotiri bee labbi, mo ɗon suto ko nastinta ɗum nder aybe, to o wari yeeso annabiijo ngam ƴamugo yam, min woni Jawmiraawo, mi jaaboto mo bee hoore am.

⁸ Mi huucitan yeeso am dow goɗɗo oo, mi laatinan mo alaama e balndol ngam reentingo yimɓe am fuu, mi nattina mo caka ummaatoore am. Nden kam on paaman min woni Jawmiraawo.

⁹ To annabiijo jaɓi selneego, to waɗi annabaaku, min Jawmiraawo selni mo, mi fortan juŋngo am dow maako, mi nattina mo caka ummaatoore am Isra'iila.

¹⁰ Ɓe ɗiɗo fuu ɓe keɓan kiita aybe maɓɓe, annabiijo e carwiiɗo ɗum fuu.

¹¹ Nden kam yimɓe Isra'iila meetataa yiilaago daayiiɗum bee am, ɓe meetataa soɓnugo ko'e maɓɓe bee tuurtolji maɓɓe fuu. Ɓe laatoto yimɓe ummaatoore am, min boo mi laatoto Allah maɓɓe. Min Allah Jawmiraawo wi'i ɗum.”

Kiitaaji Allah ngooŋɗan

¹² Ndaa ko Jawmiraawo wolwani yam:

¹³ “Ɓii-Aadama, to yimɓe lesdi ngoɗndi ngewi umrooje am, nden kam mi fortan juŋngo am dow lesdi maajum, mi timmina ndesa nyaamdu nder maari, mi neldan weelo ngam nattingo yimɓe e dabbaaji ton.

¹⁴ Koo to Nuuhu e Daniyel e Ayuba, worɓe tato ɓe'e njooɗino ton, yoŋkiiji maɓɓe tan ɓe kisnanno, ngam ɓe adili'en. Min Allah Jawmiraawo wi'i ɗum.

¹⁵ Malla to mi yoofi dabbaaji mbarooji dow lesdi man ngam halkugo yimɓe maari, ndi laato ladde meere, walaa mo saaloto e maari ngam daliila dabbaaji man,

¹⁶ nden kam koo to worɓe tato ɓe'e njooɗino ton, fakat bana min Allah Jawmiraawo mi geeto, ɓe kisnataano ɓiɓɓe maɓɓe worɓe e rewɓe. Kamɓe bee ko'e maɓɓe tan kisanno, ammaa lesdi laatotono ladde meere.

¹⁷ Malla to mi ukki kaafahi dow lesdi man, to mi umri ki ki saalo e maari ngam mi nattina yimɓe e dabbaaji ton,

¹⁸ nden kam koo to worɓe tato go njooɗino ton, fakat bana min Allah Jawmiraawo mi geeto, ɓe kisnataano ɓiɓɓe maɓɓe worɓe e rewɓe, sey kamɓe bee ko'e maɓɓe tan kisanno.

¹⁹ Malla to mi neldi nyawu kalluŋgu ndaaɓoowu nder lesdi man, mi rufi tikkere am bee mbarugo yimɓe e dabbaaji ton,

²⁰ nden kam koo to Nuuhu e Daniyel e Ayuba njooɗino ton, fakat bana min Allah Jawmiraawo mi geeto, ɓe kisnataano ɓiɓɓe maɓɓe worɓe e rewɓe, ɓe kisnanno sey yoŋkiiji maɓɓe tan, ngam ɓe adili'en.

²¹ Ngam ndaa nii Allah Jawmiraawo wi'i: Koo to mi ukkanan Urusaliima kiitaaji am naawɗi feere feere nayi ɗi'i, waato: Kaafahi e weelo e dabbaaji mbarooji e nyawu kalluŋgu ndaaɓoowu ngam nattingo yimɓe e dabbaaji nder berniwol,

²² ammaa ɓiɓɓe maɓɓe worɓe e rewɓe luttan, ɓe ngurtinan ɓe diga maagol. Kamɓe ɓe ngaran haa mooɗon. On ngi'an yahdu maɓɓe e kuuɗe maɓɓe. Ɗum de'itinan on dow sarru ngu ukkanmi dow Urusaliima.

²³ Ɗum de'itinan on, saa'i ngi'oton yahdu maɓɓe e kuuɗe maɓɓe, on paaman mi huuwaay ngol kuuje ɗe'e fuu meere. Min Allah Jawmiraawo wi'i ɗum.”