Esira 8 - Fulfulde Bible

Yahduɓe bee Esira

¹ Ndaa limtuki baaba-ci'e'en warduɓe bee am diga Baabila fodde defte asli muuɗum'en, wakkati laamiiɗo Artahasta:

² Nder danygol Pinehas, Gersom. Nder danygol Itamar, Daniyel. Nder danygol Daawuda, Hattus

³ ɓii Sekaniya, nder danygol Par'os, Zekariya e worɓe teemerre e cappanɗe njowo (150) bee maako nder deftere asli maɓɓe.

⁴ Nder danygol Pahat-Mo'ab, Eliho'eenay ɓii Zerahiya e worɓe teemeɗɗe ɗiɗo (200) bee maako.

⁵ Nder danygol Zattu, Sekaniya ɓii Yahajiyel e worɓe teemeɗɗe tato (300) bee maako.

⁶ Nder danygol Adiina, Ebet ɓii Yonatan e worɓe cappanɗe njowo (50) bee maako.

⁷ Nder danygol Elam, Yesa'ya ɓii Ataliya e worɓe cappanɗe njoweeɗiɗo (70) bee maako.

⁸ Nder danygol Sefatiya, Zebadiya ɓii Mika'iilu e worɓe cappanɗe njoweetato (80) bee maako.

⁹ Nder danygol Yo'ab, Obadiya ɓii Yehiyel e worɓe teemeɗɗe ɗiɗo e sappo e njoweetato (218) bee maako.

¹⁰ Nder danygol Baani, Selomit ɓii Yosifiya e worɓe teemerre e cappanɗe njoweego (160) bee maako.

¹¹ Nder danygol Bebay, Zekariya ɓii Bebay e worɓe noogas e njoweetato (28) bee maako.

¹² Nder danygol Asgada, Yohanan ɓii Hakkatan e worɓe teemerre e sappo (110) bee maako.

¹³ Nder danygol Adonikam, ragare'en maɓɓe. Ndaa inɗe maɓɓe: Elifelet e Ye'iyel e Sema'ya e worɓe cappanɗe njoweego (60) bee maɓɓe.

¹⁴ Nder danygol Biguway, Utay e Zakkur e worɓe cappanɗe njoweeɗiɗo (70) bee maako.

Taaskara jahaaŋgal haa Urusaliima

¹⁵ Mi mooɓti yimɓe ɓe'e baŋnge maayo ngo ilata heedi Ahawa. Min caŋngini ton nyalɗe tati. Mi yi'i ummaatoore e liman'en ɗon, ammaa mi tawaay Lewi'en caka maɓɓe.

¹⁶ Ngam maajum nelmi ardiiɓe ɓe'e: Eli'ezer e Ariyel e Sema'ya e Elnatan e Yariba e Elnatan e Natan e Zekariya e Mesullam, non boo Yoyaribu e Elnatan jaŋnginooɓe,

¹⁷ mi hokki ɓe habaru ngam Iddo, hooreejo haa Kasifiya. Mi umri ɓe ɓe mbolida bee Iddo e banndiraaɓe maako huuwooɓe kuuɗe pamare nder haykaliiru wonɓe haa Kasifiya, haa ɓe ngaddana min huuwooɓe kuuɗe dewal haa haykaliiru Allah meeɗen.

¹⁸ Juŋngo Allah men wooɗŋgo wondi bee amin, ngam maajum ɓe ngaddani min goɗɗo kakkilɗo, Serebiya mo danygol Mahali ɓii Lewi taaniraawo Isra'iila, kaŋko e ɓiɓɓe maako e banndiraaɓe maako, worɓe sappo e njoweetato.

¹⁹ Non boo Hasabiya e Yesa'ya mo danygol Meraari e deerɗiraaɓe maako e ɓiɓɓe maɓɓe, worɓe noogas.

²⁰ Haa huuwooɓe kuuɗe pamare nder haykaliiru boo worɓe teemeɗɗe ɗiɗo e noogas (220), ɓe fuu ɓe ewnaama innde innde. Daawuda e saraaki'en muuɗum njo'inno huuwooɓe man ngam wallugo Lewi'en.

²¹ Ton baŋnge maayo Ahawa umrumi suumaye, ngam haa min njaŋkina ko'e amin yeeso Allah meeɗen, min toro mo o yahra min jam, minin e ɓikkoy amin e kuuje amin fuu.

²² Mi semti toraago laamiiɗo haa o hokka min honooɓe e wa'iiɓe pucci ngam aynugo min yeeso konne'en haa laawol. Ngam min mbi'no mo: “Juŋngo Allah amin ɗon wondi bee ɗakkotooɓe mo fuu haa o woonana ɓe. Ammaa tikkere maako saatunde waran dow accuɓe mo fuu.”

²³ Ngam maajum min cuumi, min tori Allah men dow haala man, kaŋko boo o jaɓi tornde amin.

²⁴ Nden cuɓmi sappo e ɗiɗo nder mawɓe liman'en, hawtaade bee Serebiya e Hasabiya e sappo nder banndiraaɓe maɓɓe.

²⁵ Mi awnani ɓe cardi e kaŋŋeeri e kuuwruɗe, ɗum dokkal laamiiɗo e dawrooɓe mum e saraaki'en mum e Isra'iila'en wonɓe ton fuu ngam cenki haykaliiru Allah men.

²⁶ Nden ndokkumi awnaaɗum haa juuɗe maɓɓe: Cardi baakin kilo ujine noogas (20.000) e kuuje cardi kilo teemerre (100) e kaŋŋeeri kilo ujine tati (3.000)

²⁷ e bulki kaŋŋeeri noogas (20) ko waɗata ceede kaŋŋeeri ujineere (1.000) e kuuwruɗe njamndi mboɗeeri ɗelkanndi ɗiɗi, marɗe saman bana kaŋŋeeri.

²⁸ Mi wi'i ɓe: “On senaaɓe ngam Jawmiraawo, kuuwruɗe ɗe'e boo ɗe cenaaɗe, cardi e kaŋŋeeri boo ɗum caahu ngam Jawmiraawo, Allah kaakiraaɓe mooɗon.

²⁹ Ayne ɗum booɗɗum haa on awno ɗum yeeso mawɓe liman'en e Lewi'en e baaba-ci'e'en Isra'iila haa Urusaliima, ngam nastingo ɗum nder cigorɗi haykaliiru Allah men.”

³⁰ Liman'en e Lewi'en koo'i cardi e kaŋŋeeri e kuuwruɗe man haa ɓe njahra ɗum haa haykaliiru Allah meeɗen haa Urusaliima.

Jahaaŋgal e jottaaki haa Urusaliima

³¹ Nyannde sappo e ɗiɗawre nder lewru aranndu min ummi haa maayo Ahawa, yahugo Urusaliima. Juŋngo Allah men wooɗŋgo wondi bee amin, ayni min yeeso konne'en e fasooɓe haa laawol.

³² Nden min njotti Urusaliima. Min ciwti nyalɗe tati.

³³ Nyalaade nayaɓre min awni cardi e kaŋŋeeri e kuuwruɗe go nder haykaliiru Allah men, min ndokki ɗe haa Meremot ɓii Uriya, limanjo. Eli'azaaru ɓii Pinehas wondi bee maako. Woodi ton boo Yozabat ɓii Yeesu'a e No'adiya ɓii Binnuy, Lewi'en.

³⁴ Ɓe limti, ɓe awni kuuje fuu, nden ɓe mbinndi teddeeŋga maaje boo.

³⁵ Wartuɓe daheeki ngaddi dabbaaji guleteeɗi ngam Allah Isra'iila: Ga'i kalhali sappo e ɗiɗi ngam Isra'iila fuu e jawɗi baali cappanɗe joweenayi e joweego e njawkoy cappanɗe njoweeɗiɗoy e njoweeɗiɗoy e jawɗi be'i sappo e ɗiɗi ngam ittuki hakkeeji, ɗum fuu ɗum guleteeɗum ngam Jawmiraawo.

³⁶ Nden ɓe ndokki umrooje laamiiɗo haa ngomna'en e wakiili'en nder lesdi hiirnaaŋge Efratis, kamɓe boo ɓe mballi Isra'iila'en haa kuuɗe haykaliiru Allah.