Esira 5 - Fulfulde Bible

Nyiɓtol haykaliiru

¹ Annabi Haggay e annabi Zekariya ɓii Iddo mbaɗi annabaaku bee innde Allah Isra'iila dow Yahuudu'en jooɗiiɓe nder lesdi Yahuuda e nder Urusaliima.

² Nden Zorobaabila ɓii Salatiyel e Yeesu'a ɓii Yocadak puɗɗiti nyiɓtaago haykaliiru Allah haa Urusaliima. Annabi'en go ngondi bee maɓɓe, cemmbiɗini ɓe.

³ Saa'i man Tattanay, ngomna lesdi hiirnaaŋge Efratis e Setar-Bosnay e huuwdiɗɗiraaɓe muuɗum'en, ngari haa Yahuudu'en, ƴami ɓe: “Moy duŋani on nyiɓtugo suudu ndu'u e mahitaago mahi maaru?”

⁴ Ɓe ƴami boo: “Noy inɗe nyiɓtooɓe ndu?”

⁵ Ammaa Allah ayni ndotti'en Yahuudu'en, ngam taa goɗɗo haɗa kuugal maɓɓe, sey to ɓe neldi habaru haa laamiiɗo Dariyus, kaŋko boo o lorna jaawaabu bee bataakewol.

⁶ Ndaa bataakewol iwŋgol haa Tattanay ngomna lesdi hiirnaaŋge maayo Efratis e Setar-Bosnay e huuwdiɗɗiraaɓe muuɗum'en Afarsaki'en, yahugo haa laamiiɗo Dariyus.

⁷ Ndaa ko winnda nder kubaruwol ngol ɓe neldi mo: “Yahugo haa laamiiɗo Dariyus: Salaaman laatano ma nder koo ɗume fuu!

⁸ Barkaama, anndu min njehi haa suudu ɗowanteeɗo mawɗo nder lesdi Yahuuda. Yimɓe ton ɗon nyiɓto ndu bee kaa'e mawɗe cehaaɗe, ɓe ɗon nastina leɗɗe nder mahi. Ɓe ɗon kuuwa bee tiinaare, kuugal maɓɓe ɗon yaha yeeso yeeso.

⁹ Min ƴami ndotti'en maɓɓe: Moy duŋani on nyiɓtugo suudu ndu'u e mahitaago mahi maaru?

¹⁰ Min ƴami boo inɗe maɓɓe. Min mbinndi inɗe hoore'en maɓɓe ngam haa min anndine.

¹¹ Ndaa ko ɓe njaabi min: Min maccuɓe Allah marɗo asama e lesdi. Min ɗon nyiɓto haykaliiru nyiɓaanduno haa ɗo nder zamanu ɓooyma. Laamiiɗo Isra'iila mawɗo nyiɓno ndu, timmini ndu boo.

¹² Ammaa kaakiraaɓe amin tikkini Allah mo asama. Ngam maajum o hokki ɓe haa juŋngo Nabukodonosor, laamiiɗo Baabila Kaldiyaajo. Kaŋko yibbini suudu ndun, o dahi yimɓe haa Baabila.

¹³ Ammaa hitaande nde laamiiɗo Koores laamo dow Baabila, o umri nyiɓtaago haykaliiru Allah ndu'u.

¹⁴ Kuuwruɗe haykaliiru Allah boo, kuuje kaŋŋeeri e cardi, Nabukodonosor hoocuno ɗe diga haykaliiru haa Urusaliima, yahruno ɗe haa suudu ɗowanteeɗo maɓɓe haa Baabila. Ammaa laamiiɗo Koores wurtini ɗe, halfitini ɗe haa juŋngo goɗɗo mo o waɗi ngomnaajo, bi'eteeɗo Sesbaccar.

¹⁵ O wi'i mo: Hoo'u kuuje ɗe'e, yah jo'in ɗe nder haykaliiru haa Urusaliima. Sey on nyiɓto haykaliiru Allah haa nokkuure maaru naane.

¹⁶ Nden Sesbaccar wari, saɓɓi caɓɓawal haykaliiru Allah haa Urusaliima. Haa wargo hannde ɓe ɗon nyiɓta, ammaa ɓe timminaay ndu tawon.

¹⁷ Kadi jonta, to ɗum fottani ma, barkaama, umru linyugo nder sigordu defte haa laamorde Baabila ngam anndugo: Gooŋga laamiiɗo Koores umri nyiɓtaago haykaliiru Allah haa Urusaliima na malla naa non? Ɓaawo man a anndina min muuyo maaɗa, barkaama.”