Esaaya 64 - Fulfulde Bible

¹ Bana yiite wulirta cannji, bana yiite waywinirta ndiyam, war, anndin wanyɓe ma innde ma, haa ummaatooje ndiwna yeeso maaɗa!

² Naane a waɗi kaayeefiiji ɗi min tammaaki. Nde a jippi, kooseeje ndiwni yeeso maaɗa.

³ Diga ɓooyma, walaa mo meeɗi anndugo koo nanugo malla yi'ugo no ɗowanteeɗo waɗani hooliiɓe ɗum, sonaa an!

⁴ Seyortooɓe waɗugo adilaaku ma, siftoranɓe laabi ma, a fotti bee maɓɓe. A tikkani min ngam min mbaɗi hakke. Dow laabi ɗi'i boo, min kisan na?

⁵ Min fuu min laatake bana soɓɓe, adilaaku amin nanndi bee limce tunwuɗe. Min fuu min ɗayli bana haako, aybeeji amin ɗon nduuyna min bana henndu.

⁶ Walaa mo ewnoto innde ma, mo ummoto ngam ɗakkotirgo bee maaɗa. Ngam a waylitani min ɓaawo, a acci min min ndo'o nder aybeeji amin.

⁷ Asee boo, yaa Jawmiraawo, an woni Baabiraawo amin. Minin min loope kecce, an a mahoowo min, min fuu juuɗe ma mbaɗi min.

⁸ Yaa Jawmiraawo, taa tikkere ma ɗuuɗa. Taa siftor aybe amin haa foroy. Laar useni, min fuu min yimɓe ummaatoore ma!

⁹ Berniiji ma ceniiɗi laatake ladde, Siyona laatake ladde, Urusaliima laatake bille.

¹⁰ Suudu amin seniindu, wooɗndu haa kaakiraaɓe amin maŋgtuno ma nder maaru, yiite wuli ndu. Ko min ngiɗno fuu natti.

¹¹ Yaa Jawmiraawo, nattere nde'e fuu ɓillataa ma sam na? A jeeɗoto na, a toskinan min naawɗum bana nii na?