Esaaya 63 - Fulfulde Bible

Kiita Allah dow ummaatooje

¹ “Moy an garanɗo diga Edoom, diga Bosra, jaagniiɗo bee limce ɗelkanɗe boɗeeje coy, mantanɗo e jahanɗo bee semmbe mum fuu?” Ɗum min, Jawmiraawo, bolwanɗo bee adilaaku, baawɗo ngam hisnugo.

² Ngam ɗume limce ma mbooji, ɓornuce ma boo bana ɗe ɓiɗɗoowo inabooje?

³ “Min feere am ɓiɗɗi inabooje nder ɓiɗɗirde. Koo goɗɗo gooto nder ummaatooje wondaayno bee am. Mi yaaɓi ɗe nder tikkere am, mi nami ɗe nder ɓernuki am. Ƴiiƴam maaje wicci dow limce am, mi tunwini ɓornuce am fuu.

⁴ Mi nufi nyalaade waataago konne'en am, hitaande coottuki ummaatoore am yottake.

⁵ Mi laari koo toy, ammaa balloowo yam woodaa. Mi hayɗini, ammaa walaa mo walliti yam. Nden mi waɗi ɗum bee hoore am, tikkere am semmbiɗini yam.

⁶ Nder tikkere am, mi yaaɓi ummaatooje, mi sampiti ɗe ngam daliila ɓernuki am. Mi rufi ƴiiƴam maɓɓe haa lesdi.”

Mbooɗeeŋga Jawmiraawo haa Isra'iila

⁷ Mi siftoran ko Jawmiraawo waɗi nder mbooɗeeŋga mum, mi siftoran kuuɗe maako maŋgteteeɗe ko o waɗani en fuu. O woonani Isra'iila mboondi ɗuuɗndi fodde hinnuye maako e mbooɗeeŋga maako.

⁸ Jawmiraawo wi'i: “Fakat, ɓe yimɓe ummaatoore am, ɓe mbaɗataa yam rikici.” Ngam maajum o hisni ɓe

⁹ diga ɓillaaje maɓɓe fuu. Naa nelaaɗo hisni ɓe, naa malaa'ikaajo boo, ammaa kaŋko bee hoore maako. Ngam daliila yiide e enɗam maako o hisni ɓe. O efti ɓe, o roondi ɓe nyalɗe ɓooymaaje fuu.

¹⁰ Ammaa kamɓe ɓe tuurtani mo, ɓe mettini Ruuhu maako Ceniiɗo. Ngam maajum o wayli, o laati konneejo maɓɓe, o honi ɓe bee hoore maako.

¹¹ Nden ummaatoore maako siftori nyalɗe Muusa ɓooymaaje: Toy Jawmiraawo mo wurtini tokkere muuɗum nder maayo Maaliya bee juuɗe waynaaɓe mum? Toy Jawmiraawo mo nastini Ruuhu mum Ceniiɗo nder maɓɓe,

¹² mo baawɗe muuɗum mawɗe ɗonno haa nyaamo Muusa, mo seeki ndiyamji yeeso maɓɓe, haa o waɗani hoore maako innde duumiinde?

¹³ O saalini ɓe nder ndiyam lugguɗam, bana pucci nder ladde hamaadaare, ɓe pergaaki sam.

¹⁴ Bana dabbaaji jippotooɗi nder waadiwol, non Ruuhu Jawmiraawo yahriri ɓe haa siwtaare. Bana non a ɗowri ummaatoore ma, a waɗani hoore ma innde teddunde.

Tornde ngam enɗam e ballal

¹⁵ Yaa Jawmiraawo, gonɗo haa asama, laar jooɗorde ma woonde seniinde! Toy yiide ma haajunde e cuusal ma? A salani min hinnuye ma e enɗam ma!

¹⁶ Alhaali boo an woni Baabiraawo amin. Ibrahiima anndaa min, Isra'iila boo faalataako min. Ammaa an, yaa Jawmiraawo, a Baabiraawo amin, coottoowo min diga ɓooyma, kanjum woni innde ma.

¹⁷ Yaa Jawmiraawo, ngam ɗume a accata min min cela laabi ma? Ngam ɗume a saatinta ko'e amin, haa min acca hulugo ma? Lora ngam daliila maccuɓe ma, ngam daliila le'i laatiiɗi maral ma!

¹⁸ Wakkati seɗɗa ummaatoore ma senaande marno lesdi, ammaa jonta wanyɓe min njaaɓi suudu ma seniindu.

¹⁹ Diga ɓooyma min laati bana yimɓe ɓe a laamanaaki ɓe, bana min laataaki ewnaaɓe bee innde maaɗa. To a seekino asamanji, to a jippakeno, kooseeje ndiwnanno yeeso maaɗa!