Esaaya 59 - Fulfulde Bible

Baŋginki halleende yimɓe

¹ Kay! Juŋngo Jawmiraawo rammaay ngam hisnugo on. Noppi maako pahɗaay ngam nanango on.

² Ammaa aybeeji mon cenndata on bee Allah mooɗon, hakkeeji mon laati bana wiirndallo hakkunde maako bee mooɗon. Kanji kaɗata mo nanugo on.

³ Juuɗe mon coɓi bee ƴiiƴam, kooli mon boo bee aybeeji. Kunnduɗe mon ɗon mbolwa fewre, ɗemɗe mon ɗon mbaŋgina sooynde adilaaku.

⁴ Walaa gullotooɗo bee haala ndarnuka, walaa kiitotooɗo bee gooŋga. Ɓe ɗon koolo kuuje meereeje, ɓe ɗon mbolwa fewre. Ɓe kaari toonyaare, ɓe ndanyan sarru.

⁵ Ɓe ɗon cosɓina geeraaɗe poosokje, ɓe ɗon cannya cannyudi canycanyɗo. Nyaamanɗo geeraaɗe man maayan. To woore fusi, foosokre wurtoto.

⁶ Cannyaaɗum man he'ataa ngam waɗugo limce, goɗɗo waawataa suddugo ɓanndu bee maajum. Kuuɗe maɓɓe ɗum kuuɗe sarru, toonyaare woni haa juuɗe maɓɓe.

⁷ Kosɗe maɓɓe ɗon njaawɗa haa ɓe mbaɗa kalluɗum, ɓe ɗon njaawa rufugo ƴiiƴam yimɓe ɓe ngalaa aybe. Ɓe ɗon numa haala sarru tan. Bonnonda e halkere waɗan koo toy ɓe njehi fuu.

⁸ Ɓe anndaa laawol jam, woodaa gooŋga nder kuuɗe maɓɓe. Ɓe ɗon tokko laabi leliiɗi, koo moy tokki ɗi heɓataa salaaman.

⁹ Ngam maajum kiita ngooŋɗuka daaytake min, adilaaku boo yottataako min. Min ngenwi annoora, ammaa ndaa nyiɓre. Min ngenwi jayŋgol, ammaa min ɗon njaha nder jemmaare nyiɓɓunde.

¹⁰ Min ɗon mamo bana wumɓe kommbi mahol, min ɗon mamo bana mo walaa gite. Min ɗon pergo caka nyalawma bana to jemma waɗi. Min yamɓe ammaa min ɗon bana maayɓe.

¹¹ Min fuu min ɗon ngurɓo bana dabbaaji ladde, min ɗon mboya bana pooli. Min ngeli kiita ngooŋɗuka – ka woodaa. Min ngeli kisndam – ɗam daaytake min.

¹² Yaa Jawmiraawo, zunuubaaji amin ɗuuɗi yeeso maaɗa, hakkeeji amin ɗon ngullo min. Tuurtolji amin ɗon ngondi bee amin, aybeeji amin boo min anndi ɗi:

¹³ Min tuurtani ma, min zammbi ma, min acci tokkaago ma. Min mbolwi haala toonyaare e tuurtol. Ɓerɗe amin numi pewe, kunnduɗe amin mbolwi ɗe.

¹⁴ Kiita ngooŋɗuka lori ɓaawo, adilaaku ɗon dari daayiiɗum. Gooŋga fergi haa luumo, darnuɗum heɓataa nastugo.

¹⁵ Gooŋga majji. To goɗɗo daayake halleende, ɓe ɓortan ɗum. Jawmiraawo yi'i ɗum, sooynde adilaaku fottanaay mo sam.

Jawmiraawo walli yimɓe muuɗum

¹⁶ O hayɗini ngam o yi'i walaa koo gooto ummi wallugo yimɓe maako. Ngam maajum o waɗi ɗum bee hoore maako, adilaaku maako hokki mo portaagu.

¹⁷ O ɓorni adilaaku bana sulke, o waɗi kisndam dow hoore maako bana hufneere njamndi. O ɓorni anniya baatuki bana limce e tikkere haajunde bana alkibbaare.

¹⁸ O warjoto koo moy fodde kuuɗe mum, o waatoto wanyɓe mo bee tikkere, konne'en maako boo bana no haandani ɓe, non boo jooɗiiɓe haa duuɗe.

¹⁹ Koo moy fuu, diga fuunaaŋge haa hiirnaaŋge, hulan innde Jawmiraawo e tedduŋgal muuɗum. To konneejo wari bana ƴuuge maayo ɗe henndu yerɓata, poofɗe Jawmiraawo ndiiwan mo.

²⁰ Jawmiraawo wi'i: “Coottoowo waran haa Siyona ngam Isra'iila'en tuubuɓe, accuɓe tuurtol muuɗum'en.

²¹ Ndaa alkawal am bee maɓɓe: Mi waɗi Ruuhu am dow mooɗon, mi nastini bolle am nder kunnduɗe mooɗon. Mi ittataa ɗe diga kunnduɗe mon e diga kunnduɗe ɓikkoy mon e diga kunnduɗe taaniraaɓe mon, diga jonta haa foroy.” Non Jawmiraawo wi'i.