Esaaya 52 - Fulfulde Bible

Allah rimɗinan Siyona

¹ Fin, fin! Ɓorna baawɗe ma, an Siyona, ɓorna jaage ma, an Urusaliima, berniwol ceniiŋgol! Ngam saadooniijo malla coɓɗo nastataa haa ma fahin.

² Fiɗɗu collaaje ma, darta, jooɗa, an Urusaliima! Piiste kaɓɓorli haa daaɗe mon, onon yimɓe Siyona haɓɓaaɓe!

³ Ndaa nii Jawmiraawo wi'i: “Ɓe coorri on meere, min boo mi soottan on bilaa ceede.”

⁴ Allah Jawmiraawo wi'i: “Ɓooyma yimɓe ummaatoore am njippi haa Misra, njooɗoyi ton. Nden Assuura'en ɓilli ɓe bilaa daliila.

⁵ Jonta boo, ko mbaɗanmi? Ɓe kooci yimɓe am bilaa daliila. Toonyooɓe ɓe ɗon koola. Ɓe ɗon nyalla wolwugo kalluka dow innde am.

⁶ Ngam maajum yimɓe am anndan innde am nyannde feere. Nyannde man ɓe anndan min wi'i: Ndaa yam ɗo!”

⁷ Ɗume wooɗiri dow kooseeje bana kosɗe gaazoowo habaru seyo? O ɗon wooyna salaaman, o ɗon wadda kubaruwol ceynanŋgol, o ɗon wooyna kisndam. O ɗon wi'a Siyona: “Allah ma ɗon laamo!”

⁸ Nane hoolo aynooɓe, ɓe ɗon towna sawtu, ɓe ɗon koolda bee seyo. Ngam bee gite maɓɓe ɓe ɗon ngi'a Jawmiraawo ɗon lorto haa Siyona.

⁹ Mbelmbelte hawtaade, onon bille Urusaliima! Ngam Jawmiraawo de'itini ummaatoore muuɗum, sootti Urusaliima.

¹⁰ Jawmiraawo waŋgini juŋngo mum seniiŋgo yeeso ummaatooje fuu. Keeri duniyaaru fuu ngi'an kisndam Allah men.

¹¹ Ndille, ndille, ngurte diga ton! Taa meeme coɓɗum! Ngurte e maagol. Laɓɓine ko'e mon, onon roondotooɓe kuuwruɗe Jawmiraawo.

¹² Taa ngurte bee jaawal, taa ndille bee dogguki ngam Jawmiraawo ardoto on, Allah Isra'iila wonan ɓaawo mooɗon, o faddoto on.

Bone suka Jawmiraawo

¹³ Jawmiraawo wi'i: “Suka am heɓan hayru. O heɓan maŋngu, o ɓaŋgoto ɓaŋgiiɗum masin.

¹⁴ Ɗuuɗɓe kultori daliila maako, ngam jaati maako wayli, nanndaay bee neɗɗo sam, tagdi maako nanndaay ndi ɓii Aadama.

¹⁵ Bana non boo ummaatooje ɗuuɗɗe kayɗinan ngam maako, laamiiɓe maɓɓan kunnduɗe muuɗum'en yeeso maako. Ngam ɓe ngi'an, ɓe paaman ko ɓe meeɗaay nanugo tawon.”