Esaaya 51 - Fulfulde Bible

Bolle de'itinki ngam Siyona

¹ Naneeɗam, onon yiɗɓe adilaaku, onon ɗakkotirɓe bee Jawmiraawo. Ndaare tapaare nde cehaaɗon nder muuɗum, ngaska ɓulndu boo ndu ngurtinaaɗon nder muuɗum.

² Ciftore kaaka mon Ibrahiima e Saraatu, danyɗo on. Mi ewni Ibrahiima, saa'i o walaano ɓiŋngel. Mi barkiɗini mo, mi ɗuɗɗini mo.

³ Jawmiraawo de'itinan Siyona, o yurminan bille maagol fuu. O wartiran ladde maagol bana Adnin, harde maagol bana jarne Jawmiraawo. Ngol heewan seyo e welwelo, maŋgtooje e gime.

⁴ “Keɗiteeɗam, onon yimɓe ummaatoore am! Naneeɗam, onon yimɓe jama'aaje am! Ngam tawreeta iwan haa am. Mi darnan kiita am ngooŋɗuka haa ka laato annoora ummaatooje.

⁵ Adilaaku am ɓadake, kisndam am waŋgan, juuɗe am kiitoto ummaatooje. Duuɗe tammorto yam, ɗe ngeloto juŋngo am.

⁶ Tijje asama, ndaare lesdi haa les. Ngam asamanji caakoto bana cuurɗe, lesdi hiiɗan bana limce, jooɗiiɓe haa maari maayan bana buubi. Ammaa kisndam am duumoto haa foroy, adilaaku am ɗon tabiti tum.

⁷ Naneeɗam, onon annduɓe adilaaku, onon jogiiɓe tawreeta am nder ɓerɗe mon! Taa kule feloore yimɓe, taa ndiwtore daliila kuudi maɓɓe.

⁸ Ngam gilɗi nyaaman ɓe bana limce, somre nyaaman ɓe bana gaasa baali. Ammaa adilaaku am duumoto haa foroy, kisndam am tabitan diga yidere haa yidere.”

⁹ Fin, fin! Ɓorna baawɗe, an juŋngo Jawmiraawo! Fin bana nder nyalɗe ɓooyma, bana nder wakkati gide caaliiɗe. Naa an ta'i Rahab geɓe geɓe, yuwi kuuŋga mbeela?

¹⁰ Naa an ɓeeɓni mbeela, ndiyamji ilam lugguɗam, a waɗi laawol dow ndiyamji lugguɗi, haa hisnaaɓe ma caalo?

¹¹ Rimɗinaaɓe Jawmiraawo ngartan, nastan Siyona bee hoolo seyo. Seyo duumiiŋgo heewan ɓerɗe maɓɓe. Ɓe keɓan welwelo e seyo, ngam mettamɓeram e uumaali laatantaako ɓe fahin.

¹² Jawmiraawo wi'i: “Min, min feere am de'itinta on. Koni kuloton neɗɗo maayanɗo, ɓii Aadama nannduɗo bee huɗo?

¹³ On ngejjiti Jawmiraawo tagɗo on, mo we'iti asamanji, mo jo'ini lesdi dow caɓɓaaje maari na? On ndiwnan foroy yeeso tikkere ɓillooɓe on, anninɓe halkugo on na? Kadi, toy tikkere maɓɓe yahata?

¹⁴ Nii seɗɗa ɓe njooftan haɓɓaaɓe. Ɓe maayataa nder ngaska. Ɓe cooyataa nyaamdu.

¹⁵ Ngam min woni Jawmiraawo, Allah mooɗon, laanyanɗo mbeela, umminanɗo ƴuuge mbaɗa hoolo. Jawmiraawo honooɓe asama woni innde am.

¹⁶ Mi we'iti asamanji, mi jo'ini lesdi dow caɓɓaaje maari. Mi wi'i jooɗiiɓe haa Siyona: Onon on ummaatoore am. Mi waɗi bolle am nder kunnduɗe mon, mi suddi on bee ɗowdi juŋngo am.”

Timmoode bone Urusaliima

¹⁷ Fin, fin! Umma, an Urusaliima! A yari jardugel tikkere ngel juŋngo Jawmiraawo hokki ma. A yari ko woni nder jardugel fuu haa ɗum hokki ma giilol!

¹⁸ Walaa ɗowuɗo ma caka ɓikkoy koy ndanyɗa fuu. Walaa naŋnguɗo ma juŋngo caka ɓikkoy koy mawninɗa.

¹⁹ Masiibooji ɗiɗi ɗi'i keɓi ma: Lesdi ma wonni, laati bille, yimɓe ma maayi bee dolo e kaafahi. Moy woyete, moy de'itinte?

²⁰ Ɓiɓɓe ma tampi, njani. Ɓe ɗon mbaali haa nyobborle laabi bana jabaare nder tuuforgol. Jawmiraawo Allah maaɗa rufi tikkere mum dow maɓɓe, o telɓani ɓe.

²¹ Ngam maajum, nane ɗu'um, onon yarɓe bone, onon wuykuɓe, ammaa naa bee inaboojam.

²² Ndaa ko Allah, Allah Jawmiraawo mon jiŋnganɗo ummaatoore mum wi'i: “Mi hoositan diga juŋngo maaɗa jardugel tikkere am, ngel hokkino ma giilol. A meetataa yarugo ngel!

²³ Mi hokkan ngel haa juuɗe toonyinooɓe on, wi'ɓe on: Ture haa min njaaɓa dow mooɗon. Onon boo on ngartiri ɓaawe mon bana lesdi, bana laawol ngol yimɓe tokkoto foroy.”