Esaaya 49 - Fulfulde Bible

Annoora ngam ummaatooje

¹ Naneeɗam, onon duuɗe! Keɗite, onon ummaatooje daayiiɗe! Jawmiraawo ewni yam diga mi siwaa danyeego. Diga reedu daada am o ewni innde am.

² O waɗi hunnduko am bana kaafahi belki. O suddi yam bee ɗowdi juŋngo maako. O wartiri yam kurol ceeɓŋgol, o suuɗi yam nder ɓaaru maako.

³ O wi'i yam: “An Isra'iila, a suka am. Bee maaɗa mbaŋginiranmi tedduŋgal am.”

⁴ Ammaa mi wi'i: “Mi somni hoore am meere, mi majjini semmbe am meere, walaa nafuuda. Ammaa fakat geɗal am haa Jawmiraawo woni, mbarjaari am ɗon haa Allah am.”

⁵ Jonta Jawmiraawo ɗon wolwa – O waɗi yam diga reedu daada am haa mi laato suka maako, mi lortina danygol Yaakubu haa maako, mi mooɓta Isra'iila haa maako. Ngam mi tedduɗo haa gite Jawmiraawo, Allah am woni semmbe am –

⁶ O wi'i: “Laataago suka am ummitinanɗo le'i Yaakubu, lortinanɗo luttuɓe Isra'iila, he'aay. Mi waɗete a annoora ummaatooje, haa kisndam am yotto keeri duniyaaru.”

⁷ Ndaa nii Jawmiraawo, Allah Ceniiɗo, kisnoowo Isra'iila wi'i jawaaɗo, ganyaaɗo ummaatoore, maccuɗo toonyooɓe: “Laamiiɓe ngi'an ɗum, ɓe ummoto. Ardiiɓe ngi'an ɗum, ɓe cujidan ngam daliila Jawmiraawo koolniiɗo, ngam daliila Ceniiɗo Isra'iila mo suɓi ma.”

Bo'itinki Siyona

⁸ Ndaa nii Jawmiraawo wi'i: “Wakkati mo'ere mi jaɓi tornde ma, nyalaade kisndam mi walli ma. Mi ɗon ayne haa laatoɗa alkawal ummaatoore, haa mbo'itina lesdi, cenndana yimɓe maral maɓɓe bonniiŋgal jonta,

⁹ haa mbi'a haɓɓaaɓe: Ngurte, wonɓe nder nyiɓre boo: Mbaŋge haa jayŋgol. Ɓe nduran bana tokkere haa laabi, towndiije cooke fuu laatoto durduɗe maɓɓe.

¹⁰ Ɓe maatataa dolo koo ɗomka fahin. Henndu wulndu e naaŋge naawnataa ɓe, ngam kinnotooɗo ɓe ɗowan ɓe, yahran ɓe haa ceeɓooje ndiyam.

¹¹ Mi wartiran kooseeje am fuu laawol. Buuwi am towtan dow lesdi.

¹² Ndaa, yimɓe am ɗon ngara diga daayiiɗum, woɗɓe diga woyla e hiirnaaŋge, woɗɓe boo diga lesdi Sinim haa fombina Misra.”

¹³ Koole bee seyo, onon asamanji, welweltu, an lesdi! Onon kooseeje, mbaɗe hoolo seyo, ngam Jawmiraawo de'itini ummaatoore muuɗum, o ɗon hinno ɓilliiɓe maako.

¹⁴ Ammaa Siyona wi'i: “Jawmiraawo acci yam, Allah yejjiti yam.”

¹⁵ Ngam maajum Jawmiraawo wi'i: “Debbo yejjitan musinanŋgel mum na? O enɗataa ɓii reedu maako na? Koo to daada yejjiti ɓiyum, min mi yejjitittaa ma sam.

¹⁶ Ndaa, mi winndi innde ma nder newe am. Tum mi ɗon numa dow mahi maaɗa.

¹⁷ Ɓiɓɓe ma ɗon ngara bee jaawal, wonnooɓe ma e wilooɓe ma ngurtoto yaasi.

¹⁸ Tijja, laar nder taarde fuu: Yimɓe ma fuu ɗon mooɓo, ɗon ngara haa maaɗa. Fakat bana min Jawmiraawo mi geeto! Mi wi'i ɗum, a jaagnorto ɓe bana fawne, a haɓɓan ɓe haa maaɗa bana ɓaŋgeteeɗo.

¹⁹ Lesdi ma nattinaama, ndi ferwi, ndi laati winnde. Ammaa jonta, fakat ndi faaɗanan jooɗiiɓe ton. Wilooɓe ma boo ndaayoto.

²⁰ Ɓikkoy maaɗa koy cooynooɗa mbi'ete: Nokkuure nde'e faaɗani min, hokku min babal haa min njooɗo.

²¹ An boo a wi'an nder ɓernde ma: Moy danyani yam koy? Mi sooyno ɓikkoy, mi dimarono, mi dahaaɗono, gudinaaɗo. Moy mawnini koy? Ndaa, mi geewaaɗono. Toy koy ngonno?”

²² Ndaa nii Jawmiraawo Allah wi'i: “Mi ɓaŋgtan juŋngo am heedi ummaatooje, mi darnan tuutawal am heedi jama'aaje. Ɓe lortinan ɓiɓɓe ma worɓe dow juuɗe maɓɓe. Ɓe ndoondoto ɓiɓɓe ma rewɓe dow balbe maɓɓe.

²³ Laamiiɓe laatoto nyaamnooɓe ma, mayram'en boo musininooɓe ma. Ɓe cujidante, geese maɓɓe haa lesdi. Ɓe tahan mbulwuldi e kosɗe ma. Nden a anndan min woni Jawmiraawo. Hooliiɓe yam cemtintaake.”

²⁴ Ɓe njaɓtan konoowo keɓal muuɗum na? Haɓɓaaɓe marɗo baawɗe ndaɗan na?

²⁵ Jawmiraawo ɗon wi'a: “Nonnon, ɓe njaɓtan koo haɓɓaaɓe konoowo boo. Keɓal marɗo baawɗe daɗan. Mi honan honanɓe ma, mi hisnan ɓikkoy ma.

²⁶ Mi nyaamnan ɓillooɓe ma kusel ɓalli muuɗum'en. Ɓe nguykiran ƴiiƴam maɓɓe bana bee inaboojam kesam. Nden kam, yimɓe fuu anndan min woni Jawmiraawo, kisnoowo ma, coottoowo ma, Baawɗo Yaakubu.”